Mushikuluji udi ufundulula tshikondo tshia maniskri a Bible

Bilondeshile Carsten Peter Thiede, muena mu Allemagne mupiluke mu dilonga dia papirise, kudi tshijadiki tshikole tshia se: bavua bafunde bipese bisatu bia papirise wa Evanjeliyo wa Matayo (mumanyike bu Papirise wa Magdalen) mu siekele wa kumpala.

Panyima pa difuanyikija bipese ebi (bikale ne bitupa bia Matayo nshapita 26) ne mukanda kampanda wa kale wa malu a mudimu musangana mu Ejipitu, Thiede wakaleja ne: mukanda wa mu Ejipitu mmufuanangane “bikole ne Papirise wa Magdalen​—ku mmuenekelu mujima ne ku bunene ne mushindu udibu bafunde dileta ne dileta.” Thiede ne mufundi nende Matthew D’Ancona badi bakoma mu mukanda wabu ne: difuanangana pankatshi pa mikanda eyi ibidi didi dileja ne: bavua bayifunde bu mu tshikondo tshimue. Mu tshikondo kayi? Mbafunde mukanda wa malu a mudimu “‘Mu tshidimu tshia 12 tshia Néron Mfumu, dia 30 Epeiph’​—bilondeshile kalandriye ketu, mmu dia 24 Kashipu 66 [B.B.].”​—Eyewitness to Jesus​—Amazing New Manuscript Evidence About the Origin of the Gospels.

“Mbia mushinga wa bungi menemene bikala tshikondo tshidibu baleje etshi tshijalame,” ke mudi Mulongeshi Philip W. Comfort umvuija mu tshiena-bualu tshipatula mu tshikandakanda tshia Tyndale Bulletin, “bualu tshidi tshiamba ne: maniskri a Evanjeliyo wa Matayo nga mu siekele umue-umue muvuabu bafunde Evanjeliyo eu.” Tshikondo etshi tshileja tshidi kabidi mua kuvuija Papirise wa Magdalen bipese bia Evanjeliyo bia kale menemene bidiku lelu.

[Tshimfuanyi mu dibeji 29]

Papirise wa Magdalen, muleja bunene buende

[Mêyi a dianyisha]

Ku dianyisha dia Muludiki ne baludiki nende ba mu Université wa Magdalen, mu Oxford