Udi muvuluke anyi?

Udi mubale nimero ya ndekelu ya Tshibumba tshia Nsentedi anyi? Biwikala muyibale, nebikusankishe bua kuvuluka malu adi alonda aa:

◻ Bua tshinyi tudi mua kueyemena bantu badi Yehowa musungule bua kulombola tshisamba tshiende?

Bua imue midimu, Yehowa udi usungula bantu badi ne ngikadilu idi ikengedibua bua kulombola bantu bende mu mushindu udiye musue bua bende mu tshikondo kampanda tshisunguluke.​—15/8, dibeji 14.

◻ Ntshinyi tshitudi mua kulongela ku bualu buakafikila Yona?

Yona uvua utamba kuela meji a bungi buende yeye, makese menemene bua bakuabu. Tudi mua kulongela kudi Yona pa kuditeka tuetu bine ne meji etu pa muaba muibidi.​—15/8, dibeji 19.

◻ Mmunyi mutudi mua kuamba ne: “dina dia Yehowa didi tshibumba tshikole”? (Nsumuinu 18:10)

Kusokomena mu dîna dia Nzambi kudi kumvuija kueyemena anu Yehowa nkayende. (Musambu 20:1; 122:4) Kudi kumvuija kutua bumfumu buende bukulu nyama ku mikolo, kulamata mikenji ne mêyi-maludiki ende, kuitabuja malaya ende, ne kumuleja bulamate kabuyi buabanya. (Yeshaya 50:10; Ebelu 11:6)​—1/9, dibeji 10.

◻ Mmunyi mudi ngenzelu wa Paulo wa difila bumanyishi kumpala kua banene muikale tshilejilu kutudi?

Mu diakula ne Mukalenge Agripa, Paulo wakatumika ne budimu, pa kuzangika malu avuaye yeye ne Agripa bikale bapetanganapu. Bia muomumue, tudi ne bua kuela kashonyi pa malu malenga a lumu luimpe ne pa matekemena atudi nawu bonso. (1 Kolinto 9:22)​—1/9, dibeji 31.

◻ Mbanganyi badi bapetela disanka ku lutulu lua Yehowa?

Bua lutulu lua Yehowa, lelu’eu miliyo mikuabu mivule ya bantu idi yenda ipeta mpunga bua kupanduka ku “dituku dia Yehowa” didi dilua. (2 Petelo 3:9-15, NW) Lutulu luende ludi kabidi lupesha yonso wa kutudi mushindu wa ‘kudienzeja bua kushikija lupandu luende ne ditshina ne dizakala.’ (Filipoi 2:12)​—15/9, dibeji 20.

◻ Mmushinga kayi uvua nawu nkudimuinu wa Bible wa Septante?

Nkudimuinu eu mmuambuluishe bikole bua kutangalaja dimanya dia Yehowa Nzambi ne Bukalenge buende, ne dia Yezu Kristo bu Mukalenge. Ku diambuluisha dia nkudimuinu wa Septante, bakajadika tshishimikidi tshia mushinga bua bena Yuda ne Bampangano bavua bakula tshiena-Greke mu siekele wa kumpala bua kuitababu lumu luimpe lua Bukalenge.​—15/9, dibeji 30.

◻ Lusumuinu lua muana muena bitulatula ludi lutulongesha tshinyi bua Nzambi?

Tshia kumpala ntshia se: Yehowa udi ne “luse ne dinanga, kena ukuata tshiji lubilu, udi mûle tente ne luse lujalame ne bushuwa.” (Ekesode 34:6) Tshibidi ntshia se: ‘mmusue kubuikidilangana,’ padi dishintuluka dia mutshima difila kabingila bua kuleja luse. (Musambu 86:5)​—1/10, mabeji 12, 13.

◻ Ndîba kayi diakumbana nsombelu ya ditalala milaya mu Yeshaya 65:21-25?

Bu mudibu batendeledi ba Yehowa badi mu buobumue mu mparadizu wa mu nyuma, bela manyi ne bantu ba mu “mikoko mikuabo” badi bapeta mpindieu ditalala didi Nzambi ufila. (Yone 10:16) Ne ditalala edi neditangalake mu Mparadizu muena dîna, pikala ‘disua dia Nzambi mua kuenzeka pa buloba, bu mudidi dienzeka mu diulu.’ Dîba adi mêyi a muprofete Yeshaya neakumbane tshishiki. (Matayo 6:10, NW)​—15/10, dibeji 24.

◻ Bua tshinyi bena nkristo badi basekelela mifikilu ya dibaka ne babenga ya diledibua?

Bible kêna udiula dibaka to. Biasungula bena nkristo bua kuenza mufikilu wa dibaka, kuela meji pa disanka dia muanda au ne pa dipangadika diabu dia kuenza madikolela bua kusomba bimpe bu bena dibaka, abu mbualu bubatangile anu buobu. Kadi, misekelelu ya dituku dia diledibua ya mu miyuki ya Bible idi anu ya bampangano ne mmisuikakaja ku malu a tshikisu.​—15/10, dibeji 30, 31.

◻ Mu mufuanu wa Paulo mufunda mu 1 Kolinto 3:12, 13, ‘kapia’ kadi kaleja tshinyi, ne ntshinyi tshidi bena nkristo bonso ne bua kumanya?

Kudi kapia katutu tupeta tuetu bonso mu nsombelu​—mateta a ditabuja dietu. (Yone 15:20; Yakobo 1:2, 3) Muntu yonso utudi tulongesha bulelela neatetshibue. Bikala ndongeshilu wetu kayi wa nsongo, pamu’apa bipeta nebikale bibi, bu muakadimuija Paulo. (1 Kolinto 3:15)​—1/11, dibeji 11.

◻ Mmunyi muvua Nowa ‘muende ne Nzambi mulelela’? (Genese 6:9)

Nowa wakenda ne Nzambi mu ngumvuilu wa se: wakenza malu avua Nzambi mumuambile bua kuenza. Bualu Nowa wakafila muoyo wende mu dienza disua dia Nzambi, uvua mu malanda mimpe ne mashême ne Nzambi.​—15/11, dibeji 10.

◻ Dibenga kumanya tshikondo tshijalame tshikala Nzambi mua kudisombuela kudi bantu babi didi ditunzuluila mpunga kayi?

Didi ditupesha mushindu wa kujadika ne: tudi banange Yehowa bushuwa ne tudi basue kuenda mu njila yende kashidi. Didi kabidi dileja ne: tudi ne bulamatshi kudi Nzambi ne tudi tuitaba ngenzelu wende wa malu. Kabidi, didi dituambuluisha bua kushala badimuke ne batabale mu nyuma. (Matayo 24:42-44)​—15/11, dibeji 18.

◻ Kuleja ditabuja mu ‘dîna dia Muana wa Nzambi’ kudi kumvuija tshinyi? (1 Yone 5:13)

Kudi kumvuija kutumikila mêyi onso a Kristo, pamue ne dîyi diende dia ‘kunangangana.’ (Yone 15:14, 17, MMM) Dinanga didi dikeba bua kuenzela bakuabu bimpe. Didi diumbusha meji mabi onso a kansungasunga ka bisamba, ka bitendelelu ne ka dishilangana dia mu nsombelu.​—1/12, dibeji 7.

◻ Bua tshinyi mbakine Bantemu ba Yehowa? (Matayo 10:22)

Mbakine Bantemu ba Yehowa tshianana amu bua tubingila tua muomumue tuvuabu bakengeshile bena nkristo ba kumpala. Ka kumpala: Bantemu ba Yehowa badi balonda mitabuja a tshitendelelu tshiabu mu mishindu idi ifikisha bamue bantu ku dibenga kubananga. Kibidi: mbabashiminyine malu​—mashimi a patoke ne malu makonyangaja bua mitabuja abu.​—1/12, dibeji 14.