Udi ne ditabuja bu dia Abalahama anyi?

‘Palua Muana wa muntu, neasangane ditabuja pa buloba anyi?’​—LUKA 18:8.

1. Bua tshinyi ki mbipepele bua muntu kulamaye ditabuja diende dikole lelu’eu?

LELU’EU, ki mbipepele bua muntu kulamaye ditabuja diende dikale dikole nansha. Bulongolodi ebu budi bubueja bena Kristo mu disumpakana dikole bua kumona mua kumbusha ntema yabu ku malu a mu nyuma. (Luka 21:34; 1 Yone 2:15, 16) Ba bungi badi ne bua kudienzeja bua kupanduka ku mvita, bipupu, masama anyi nzala. (Luka 21:10, 11) Mu matunga a bungi mudi mmuenenu mutangalake wa dibenga malu a Nzambi, ne bonso badi balonda ditabuja diabu batu babangata bu bantu kabayi ne meji, anyi bena bulamate bunekesha. Kabidi, badi bakengesha bena Kristo ba bungi bua ditabuja diabu. (Matayo 24:9) Lukonko lua Yezu, luela kukadi bidimu bitue ku 2 000, nduakanyine bushuwa: ‘Palua Muana wa muntu, neasangane ditabuja pa buloba anyi?’​—Luka 18:8.

2. (a) Bua tshinyi ditabuja dikole didi ne mushinga wa bungi bua muena Kristo? (b) Ntshilejilu tshia ditabuja tshia nganyi tshitudi ne bua kukonkonona?

² Kadi bulelela budi se: ditabuja dikole didi ne mushinga wa bungi bituasua bua matuku etu a muoyo wa mpindieu ikale mimpe ne bua kupeta muoyo wa kashidi mulaya bua matuku atshilualua. Muikale utela mêyi a Yehowa mambila Habakuka, mupostolo Paulo wakafunda ne: ‘Muakane wanyi neikale ne muoyo bua ditabuja; ne bialukaye tshianyima, muoyo wanyi kawena usanka mu bualu buende. Bikalaku kakuyi ditabuja, muntu kêna mua kusankisha [Nzambi].’ (Ebelu 10:38–11:6; Habakuka 2:4) Paulo wakambila Timote ne: ‘Uluangane mvita mimpe ya ditabuja, ulamate ku muoyo wa tshiendelele, kuwakabikidibua.’ (1 Timote 6:12) Kadi mmunyi mutudi mua kufika ku dikala ne ditabuja dikole bobobo? Patudi tukonkonona lukonko elu, nebituambuluishe bua kutangila muntu uvua ne muoyo kukadi bidimu bitue ku 4 000, muena ditabuja ditshidibu bangata ne mushinga wa bungi mu bitendelelu binene bisatu​—Islame (ba-Mizilman), Buena-Yuda ne Buena-Kristo. Muntu au ng’Abalahama. Bua tshinyi ditabuja diende divua dia pa buadi? Tudiku mua kumuidikija lelu’eu anyi?

Ditumikila bulombodi bua Nzambi

3, 4. Bua tshinyi Tela wakumbuka ne dîku diende ku Ula mutangile ku Halana?

³ Mbatele Abalahama (mubikila bangabanga ne: Abalama) bua musangu wa kumpala ku ntuadijilu menemene mu Bible. Mu Genese 11:26, tudi tubala ne: ‘Tela wakalela Abalama ne Nahô ne Halana.’ Tela ne dîku diende bavua basombele mu Ula wa bena Kasada, tshimenga tshia bubanji bua bungi ku Sud kua Mesopotamia. Kadi kabakashalamu to. ‘Tela wakangata Abalama, muanende mulume, ne Lota, muana wa Halana, muikulu wende, ne Salai, mukaji wa muanende mulume Abalama; bakamuangala mu buloba bua Ula wa Kasada bua kuya ku buloba bua Kanâna; bakafika ku Halana, bakashikamaku.’ (Genese 11:31) Nahô muanabu ne Abalahama wakamuangala pende ne dîku diende batangile ku Halana. (Genese 24:10, 15; 28:1, 2; 29:4) Kadi bua tshinyi Tela wakamuangala umbuka mu Ula wa bubanji bua bungi mutangile ku Halana mutantshi mule?

⁴ Bidimu bitue ku 2 000 kunyima kua lufu lua Abalahama, muena lulamatu Stefane, muikale kumpala kua kabadi ka Sanhedrin ka bena Yuda, wakumvuija tshimuangi etshi katshiyi tshia pa tshibidilu tshienza kudi dîku dia Tela. Wakamba ne: ‘Nzambi wa butumbi wakamueneka kudi tatu wetu Abalahama, pakadiye mu Mesopotamia, diambedi yeye kayi muanji kushikama mu Halana, wakamuambila ne: Umuke mu buloba buebe ne munkatshi mua bena kuenu, ulue mu buloba bundualua kukuleja. Yeye wakumuka mu buloba bua bena Kasada, wakashikama mu Halana.’ (Bienzedi 7:2-4) Tela wakenza tshivua disua dia Yehowa bua Abalahama pakayaye ne bena mu dîku diende menemene ku Halana.

5. Abalahama wakaya penyi kunyima kua lufu lua tatuende? Bua tshinyi?

⁵ Bena mu dîku dia Tela bakasombela mu tshimenga tshiabu tshipiatshipia. Kunyima kua bidimu pakakula Abalahama bua “kuanyi,” uvua wamba bua Halana, ki mbua Ula to. (Genese 24:4) Nansha nanku, Halana kavua ne bua kuikala tshisombelu tshia kashidi tshia Abalahama. Bilondeshile Stefane, ‘pakafua tatu wende [wa Abalahama], Nzambi wakamumushaku, wakamuteka mu buloba ebu bunudi bashikamemu katataka.’ (Bienzedi 7:4) Muikale utumikila bulombodi bua Yehowa, Abalahama, pamue ne Lota, bakasabuka musulu wa Pelata (Euphrate) ne kubuelabu mu ditunga dia Kanâna.a

6. Ndilaya kayi divua Yehowa muambile Abalahama?

⁶ Bua tshinyi Yehowa wakenza bua Abalahama kuyaye mu Kanâna? Kabingila kavua katangila malongolola a Nzambi bua muntu eu muena lulamatu. Yehowa uvua muambile Abalahama ne: ‘Umuke mu musoko webe ne kudi bana benu ne ku nzubu wa tatuebe; ya biebe mu muaba undualua kukuleja. Nenkuvuije tshisamba tshinene, nenkusankishe, nemvuije dîna diebe dinene, ne wewe neuvudijile bakuabu disanka. Nensankishe bantu badi bakuvudijila wewe disanka; nengele muntu mulawu udi ukuela wewe mulawu. Bisamba bionso bia pa buloba [“nebidibeneshe,” NW] bua bualu buebe.’ (Genese 12:1-3) Abalahama uvua ne bua kuikala tatu wa tshisamba tshinene tshivua Yehowa ne bua kukuba ne tshivua ne bua kuangata buloba bua Kanâna. Divua dilaya dilenga be! Kadi Abalahama uvua ne bua kuenza mashintuluka manene mu nsombelu wende bua kumona mua kupiana buloba abu.

7. Abalahama uvua ne bua kuikala mulongolola bua kuenza mashintuluka kayi bua kumonaye mua kupiana dilaya dia Yehowa?

⁷ Pakumbuka Abalahama ku Ula, wakashiya tshimenga tshia bubanji bua bungi ne pamu’apa kushiya too ne dîku dialabale dia tatuende​—nsombelu ya mushinga ivua mua kumupetesha bukubi mu bikondo abi bivua bankambua ne bukokeshi bua bungi. Pakumbukaye mu Halana, wakatapuluka ne dîku dia tatuende, pamue ne dîku dia muanabu Nahô, ne wakaya ku buloba kabuyi bumanyike. Kakakeba bukubi munda mua lumbu lua tshimenga kampanda mu Kanâna nansha. Bua tshinyi kakenza nanku? Katupa kîpi kunyima kua Abalahama mumane kubuela mu buloba abu, Yehowa wakamuambila ne: ‘Wendakana mu buloba buonso, mu bule buabu ne mu butshiama buabu; bualu bua nenkupebu.’ (Genese 13:17) Abalahama​—bidimu 75—​ne mukajende Sala​—bidimu 65—​bakalonda mêyi aa. ‘Bua ditabuja wakashikama mu buloba bua mulayi; bu udi mu buloba bua bende, wakashikama biende mu nzubu wa bilulu.’​—Ebelu 11:9; Genese 12:4.

Ditabuja bu dia Abalahama lelu’eu

8. Pa kumona tshilejilu tshia Abalahama ne tshia bakuabu bantemu ba kale, ntshinyi tshitudi ne bua kudima?

⁸ Mbabale Abalahama ne dîku diende munkatshi mua bantu badi mu “divuba dinene dia bantemu [ba kumpala kua Buena-Kristo]” batela mu Ebelu nshapita 11. Pa kumona ditabuja dia basadidi ba Nzambi aba ba kale, Paulo udi ukankamija bena Kristo bua ‘kumbusha bujitu buonso ne mpekatu [dipanga ditabuja] udi utujingakaja bipepele.’ (Ebelu 12:1, NW) Bushuwa, dipanga ditabuja didi mua ‘kutujingakaja bipepele.’ Kadi mu matuku a Paulo ne etu aa, bena Kristo ba bushuwa mbapete mushindu wa kudima ditabuja dikole difuane dia Abalahama ne dia bakuabu ba mu bikondo bia kale. Wakula buende yeye ne bua bena Kristo nende, Paulo udi wamba ne: “Katuena ba ku badi bapingana tshianyima too ne ku kabutu, kadi ba ku badi ne ditabuja bua kulama anyima ne muoyo.”​—Ebelu 10:39, NW.

9, 10. Ntshijadiki kayi tshidi tshileja ne: bantu ba bungi lelu’eu badi ne ditabuja bu dia Abalahama?

⁹ Bushuwa, bulongolodi ebu mbushintuluke kubangila mu tshikondo tshia Abalahama. Nansha nanku, tudi anu tuenzela ‘Nzambi [umue-umue] wa Abalahama’ au mudimu, ne katu ushintuluka nansha. (Bienzedi 3:13; Malaki 3:6) Yehowa mmuakanyine kumutendelela lelu’eu anu bu muvuaye muakanyine mu tshikondo tshia Abalahama. (Buakabuluibua 4:11) Bantu ba bungi badi badilambula ne muoyo mujima kudi Yehowa ne, bu Abalahama, benza mashintuluka onso adi akengedibua mu nsombelu wabu bua kumona mua kukumbaja tshidi Nzambi musue. Tshidimu tshishale, bantu 316 092 bakafila tshijadiki tshia patoke tshia didilambula diabu pa kutambula mu mâyi ‘mu dîna dia Tatu ne mu dia Muana ne mu dia [“spiritu munsantu,” NW].’​—Matayo 28:19.

¹⁰ Bavule ba ku bena Kristo bapiabapia aba kabavua ne bua kuya ku matunga a ku ba bende mutantshi mule bua kukumbaja mutshipu wabu nansha. Kadi mu ngumvuilu wa mu nyuma, ba bungi ba kudibu bakenza luendu lule. Tshilejilu, mu tshidiila tshia Maurice, Elsie uvua mpaka-manga. Bantu bonso bavua bamutshina. Mpanda-njila wa pa buende wakabanga kulonga Bible ne muana wa bakaji wa Elsie, ne dilonga edi diakunzuluila Elsie njila ‘bua kukomaye nyima ku mîdima mutangile ku munya.’ (Bienzedi 26:18) Pa kumona muvua muanende usankidila bulelela, Elsie wakitaba bua kulonga mukanda wa Miyuki ya mu Mukanda wa Nzambi. Bavua balonga misangu isatu ku lumingu bualu uvua dijinga ne makankamija a ku musangu ne ku musangu. Malu ende a nyuma mibi kaavua mamupeshe disanka nansha, ne uvua ne ntatu ya bungi. Kadi ndekelu wa bionso wakajikija luendu lule lua kumbuka ku malu a ba-demon mutangile ku ntendelelu mulelela. Pavua bantu balua bua kubapakilaye manga, uvua ubumvuija ne: anu Yehowa ke uvua mua kubakuba ku nyuma mibi. Elsie udi mpindieu Ntemu mutambule, ne bantu 14 ba mu dîku diende ne bamanyangana nabu mbitabe bulelela.

11. Mmashintuluka kayi adi bantu badi badilambula kudi Yehowa basue bua kuenza?

¹¹ Bavule ba ku bantu bavua badilambule tshidimu tshishale bua kukuatshila Nzambi mudimu kabavua ne bua kuenza mashintuluka manene a mushindu’eu nansha. Kadi bonso bakumbuka ku dikala bantu bafue mu nyuma bua kuikala bantu ba muoyo mu nyuma. (Efeso 2:1) Nansha mutshidibu mu bulongolodi ebu ku mubidi, kabena kabidi benamu nansha. (Yone 17:15, 16) Bafuanangane ne bena Kristo bela manyi, badi ‘kuabu mene kuikale mu diulu,’ badi bu ‘benyi ne bena luendu pa buloba.’ (Filipoi 3:20; 1 Petelo 2:11) Bakakaja nsombelu wabu biumvuangane ne mêyi-makulu a Nzambi, basaka diambedi kudi dinanga bua Nzambi ne bua muntu nabu. (Matayo 22:37-39) Kabena balonda bipatshila bia budinangi ne bia dikeba bintu bia ku mubidi anyi bumvua dijinga dia kukumbaja malu abu nkayabu mu bulongolodi ebu. Pamutu pa nanku, mbatangije mêsu abu ku ‘diulu dipiadipia ne buloba bupiabupia [bidibu babalaye] muikala buakane.’​—2 Petelo 3:13; 2 Kolinto 4:18.

12. Mmudimu kayi muleja mu luapolo lua tshidimu tshishale udi ufila tshijadiki tshia se: mu tshikondo tshia dikalaku diende, Yezu mmusangane ‘ditabuja pa buloba’?

¹² Pakaya Abalahama ku Kanâna, uvua anu yeye ne dîku diende, bikale anu ne Yehowa bua kubakuatshisha ne kubakuba. Kadi bena Kristo aba 316 092 badi bafuma ku ditambula kabena nkayabu nansha. Bushuwa, Yehowa udi ubakuatshisha ne ubakuba ku diambuluisha dia spiritu wende, anu bu muakenzaye bua Abalahama. (Nsumuinu 18:10) Kusakidila apu, udi ubakuatshisha ku diambuluisha dia “tshisamba tshia bantu” tshia bukole tshia mu bukua-matunga tshidi ne bantu ba bungi kupita amue matunga adiku lelu’eu. (Yeshaya 66:8) Tshidimu tshishale, bantu ba bungi bena mu tshisamba etshi 5 888 650 bakafila tshijadiki tshia ditabuja diabu dia tshisumi mu diambila bantu nabu bua malaya a Nzambi. (Mâko 13:10) Bakenza mu mudimu eu bungi bupite bua pa tshibidilu bua mêba 1 186 666 708, bakeba bantu badi basankidila bulelela. Bu tshipeta, bakalombola malonga a Bible 4 302 852 ne bantu bakuabu badi basue kupeta ditabuja. Bu tshijadiki tshikuabu tshia lukunukunu luabu, bantu 698 781 ba mu “tshisamba” etshi bakenza mudimu wa bumpanda-njila, bua ku dîba ne ku dîba anyi bua ngondo umue peshi ya bungi. (Malu a bungi a mudimu wa tshidimu tshishale wa Bantemu ba Yehowa adi mu dibeji dia 12 too ne dia 15.) Luapolo elu lua pa bualu ndiandamuna dilenga ne dia bukole ku lukonko lua Yezu lua se: ‘Palua Muana wa muntu, neasangane ditabuja pa buloba anyi?’

Ne lulamatu nansha mu mateta

13, 14. Umvuija imue ntatu ivua Abalahama mupete ne dîku diende mu Kanâna.

¹³ Misangu mivule malu avua makolele Abalahama ne dîku diende mu Kanâna. Misangu ya bungi, kuvua nzala mikole yakamumbushisha mu Kanâna ne kuyaye mu Ejipitu. Kabidi, mukokeshi wa Ejipitu ne wa Gelâ (pabuipi ne Gaza) bakateta kuangata Sala mukaji wa Abalahama, bua kushalaye mukajabu. (Genese 12:10-20; 20:1-18) Kuvua kabidi makokangana pankatshi pa balami ba bimuna bia Abalahama ne balami ba bimuna bia Lota, ne muanda eu wakakebesha dipanduluka pankatshi pa mêku aa abidi. Kayi ne budinangi, Abalahama wakambila Lota bua adianjile kusungula buloba, ne Lota wakasungula bua kusombela mu Distrike dia Yordane, divua dimueneka bu Edene bua bufuke ne bulengele buadi.​—Genese 13:5-13.

¹⁴ Pashishe, bakakuata Lota dîba divuaku mvita pankatshi pa mukalenge wa mu Elama uvua mutantshi mule ne bena diende, ne bakalenge ba mu bimenga bitanu mu Tshibanda tshia Sidima. Bakalenge aba bavua balue bakatshimuina bakalenge bakuabu aba muabu, kupaulabu bintu bia bungi, kuyabu ne Lota ne bintu biende. Pakumvua Abalahama tshivua tshienzeke, ne dikima dionso wakalonda bakalenge abu ba ku ba bende ne kubanyengaye Lota ne dîku diende, pamue ne bintu bia bakalenge bivuabu banyenge. (Genese 14:1-16) Kadi abu kabuvua bualu butambe bubi buvua Lota mumone mu Kanâna nansha. Bua kabingila kampanda wakasombela mu Sodome, nansha muvua tshimenga etshi tshiende lumu bua tshiendenda.b (2 Petelo 2:6-8) Pakamudimuija banjelu babidi bua se: bavua ne bua kubutula tshimenga atshi, Lota wakanyema ne mukajende ne bana bende ba bakaji. Kadi mukaji wa Lota wakalengulula mêyi masunguluke avua banjelu babambile ne, bu tshipeta, wakandamuka mukele. Bua tshikondo kampanda Lota uvua ne bua kusombela mu lubuebue mu musoko wa Soâ ne bana bende babidi ba bakaji. (Genese 19:1-30) Malu aa avua ne bua kuikala matatshishe Abalahama bikole, nangananga bu muvua Lota mulue mu Kanâna bu muena mu dîku dia Abalahama.

15. Nansha muvua Abalahama mupete ntatu pavuaye musombele mu ntenta mu buloba bua ku ba bende, kakuyi mpata mmeji mabi kayi avuaye muepuke?

¹⁵ Abalahama uvuaku mudiebeje bua se: yeye ne Lota bavua ne bua kuikala bashale mu bukubi mu Ula ne dîku dialabale dia tatuende peshi mu Halana ne muanabu Nahô anyi? Uvuaku mudijinge ne: uvua mua kuikala musombele mu bukubi munda mua tshimenga tshinyungulula ne lumbu pamutu pa kusombela mu ntenta anyi? Bivuaku pamu’apa bimufikile bua kudikonka bikalabi bivua bia meji bua muvuaye mudipangishe bintu mu dikala mutambakanyi mu buloba bua ku ba bende anyi? Muikale wakula bua Abalahama ne dîku diende, mupostolo Paulo wakaleja ne: ‘Bu buobu bele meji bua muaba wakumukabu, bakadi kuikala ne tshikondo tshia kupinganaku.’ (Ebelu 11:15) Pabi kabakapinganaku to. Kabayi batekesha mu mikolo kudi ntatu, bakashala muaba uvua Yehowa musue bua buobu kusombela.

Ditantamana lelu’eu

16, 17. (a) Nntatu kayi idi bena Kristo ba bungi bapeta lelu’eu? (b) Mmuenenu muimpe kayi udi nende bena Kristo? Bua tshinyi?

¹⁶ Lelu’eu tudi tumona bena Kristo ne ditantamana dia muomumue. Nansha mudi dienzela Nzambi mudimu dibapesha disanka dia bungi, nsombelu ki mmupepele bua bena Kristo balelela mu matuku aa a ku nshikidilu. Nansha mudibu basombele mu mparadizu wa mu nyuma, badi bapeta ntatu ya malu a mfranga bu bantu nabu bakuabu. (Yeshaya 11:6-9; 66:8) Ba bungi mbafue patupu mu mvita ya matunga, ne bamue mbabueja mu bupele bukole kabiyi ku tshilema tshiabu. Kabidi, badi batantamena ntatu bua mudibu kabayi babanange kudi bantu ba bungi. Mu matunga a bungi badi bayisha lumu luimpe munkatshi mua bantu badi kabayi batamba kusankidila bulelela. Mu makuabu matunga, badi babashiminyina malu kudi bantu badi ‘bapangadija malu mabi adi alonda mikenji yabu’ ne ‘bapisha badi kabayi ne bualu.’ (Musambu 94:20, 21) Nansha mu matunga mudibu kabayi baluisha bena Kristo ne mudibu babela kalumbandi kudi bamue bantu bua mudibu ne mêyi-makulu matumbuke, mbamanye bimpe bua se: mbashilangane ne balongi nabu ne bena mudimu nabu​—anu bu Abalahama, wakasombela mu ntenta pavua eku bantu ba bungi bavua bamunyunguluke basombele mu bimenga. Bushuwa, ki mbipepele bua kusombela mu bulongolodi ebu kadi kubenga kuikala benamu.​—Yone 17:14.

¹⁷ Nenku tudiku tunyingalala bua mutudi badilambule kudi Nzambi anyi? Tudiku tudijinga ne: tuvua kuikala bashale mu bulongolodi ebu, kuikala bu bantu bakuabu bonso anyi? Tudiku tudiabakena bua bintu bitudi badipangishe mu dienzela Yehowa mudimu anyi? Nansha kakese! Pamutu pa kujinga bintu bitudi bashiye kunyima, tudi tuitaba ne: tshintu tshionso tshitudi mua kuikala badipangishe katshivua ne mushinga mulelela mufuanangane ne mabenesha atudi tupeta mpindieu ne atuapeta mu matuku atshilualua nansha. (Luka 9:62; Filipoi 3:8) Kabidi, bantu badi mu bulongolodi ebu badi ne disanka anyi? Bulelela budi se: ba bungi ba kudibu badi bekeba mandamuna atukadi tuetu bapete. Badi bakenga bua mudibu kabayi balonda buludiki bua kudi Nzambi butudi tulonda ku diambuluisha dia Bible. (Musambu 119:105) Ne ba bungi ba kudibu badi bajinga bulunda bua bena Kristo ne buwetu bua musangelu butudi nabu ne bena kuitabuja netu.​—Musambu 133:1; Kolosai 3:14.

18. Ntshipeta kayi tshia ndekelu tshidi tshipatuka padi bena Kristo baleja dikima bu dia Abalahama?

¹⁸ Bulelela, imue misangu bidi bitukengela kuikala ne dikima bu dia Abalahama pakalondaye bantu bavua bakuate Lota. Patudi ne dikima, Yehowa udi ubenesha bipeta. Tshilejilu, mu ditunga dia Irlande wa ku Nord, nkuna mmilue kujama mu bantu bua tshikisu tshia bena tusumbu tua malu a Nzambi, ne bidi bikengela kuikala ne dikima bua kulama ndubidilu. Kadi bena Kristo ba lulamatu mbalonde mêyi a Yehowa mambila Yoshua ne: ‘Ikala ne bukole ne mutshima wa dikima; kutshinyi, kukuatshiki buôwa, bualu bua Yehowa, Nzambi webe, udi nebe kuonso kuwaya.’ (Yoshua 1:9; Musambu 27:14) Munkatshi mua bidimu bia bungi, mmuenenu wabu wa dikima mmufikishe bantu ku dibanemeka, ne lelu’eu badi mua kuyisha bipepele bantu ba bisumbu bionso mu ditunga adi.

19. Mmuaba kayi udi bena Kristo basanka bua kuikala, ne ntshipeta kayi tshidibu batekemene ne dishindika padibu batumikila bulombodi bua Yehowa?

¹⁹ Katuena ne bua kuela mpata nansha kakese bua se: nsombelu yonso utudi tupeta, bituatumikila bulombodi bua Yehowa, tshipeta tshia ndekelu netshikale bua butumbi buende ne bua diakalenga dietu dia kashidi. Nansha mutudi ne ntatu ne badipangishe bimue bintu, kakuena muaba mukuabu utuvua kuikala mupite dikala mu mudimu wa Yehowa, munkatshi mua bana betu bena Kristo ne batekemene ne dishindika muoyo wa tshiendelele udi Nzambi mulaye.

[Mêyi adi kuinshi]

Udi muvuluke anyi?

◻ Bua tshinyi ditabuja dikole didi ne mushinga wa bungi?

◻ Mmunyi muakaleja Abalahama ne: uvua ne ditabuja dikole?

◻ Mmunyi mudi didilambula dienda pamue ne mashintuluka menza mu nsombelu?

◻ Bua tshinyi tudi ne disanka bua kuenzela Nzambi mudimu nansha tuetu mua kupeta ntatu ya mushindu kayi?

[Bimfuanyi mu dibeji 7]

Abalahama uvua mudiakaje bua kuenza mashintuluka manene mu nsombelu wende bua kumona mua kupiana dilaya

[Bimfuanyi mu dibeji 9]

Tshijadiki tshidi tshileja ne: Yezu mmusangane ‘ditabuja pa buloba’ mu tshikondo tshia dikalaku diende