“Shindamijayi mitshima yenu”
“Nudi nukengela ditantamana, bua se: panyima pa nuenu bamane kuenza disua dia Nzambi, nupete dikumbana dia dilaya.”—EBELU 10:36, NW.
1, 2. (a) Ntshinyi tshiakenzekela bamue bena Kristo mu siekele wa kumpala? (b) Bua tshinyi mbipepele bua ditabuja kuteketadi?
KU BAFUNDI bonso ba Bible kakuena wakatela ditabuja misangu ya bungi kupita mupostolo Paulo nansha. Misangu ne misangu, wakakula bua bantu bena ditabuja diakateketa anyi diakafua. Tshilejilu, Himenayo ne Aleksandre ‘bakapueka ne mâyi mu ditaba.’ (1 Timoteyi 1:19, 20, MMM) Dema wakalekela Paulo bualu ‘wakasua malu a pa buloba.’ (2 Timote 4:10) Bamue, bua bienzedi biabu bia budinangi ne kabiyi bia buena Kristo, ‘bakadiula ditabuja.’ Bakuabu bavua babadinge kudi meji a dishima ne ‘bakapambuka [ku] ditabuja.’—1 Timote 5:8; 6:20, 21.
2 Bua tshinyi bena Kristo abu bela manyi bakajimija mushindu’eu difutu divuabu mua kupeta? Bushuwa, “ditabuja ndindila dishindika dia malu matekemena, dileja patoke dia malu malelela nansha mudiwu kaayi amueneka.” (Ebelu 11:1, NW) Tudi tuleja ditabuja mu tshintu tshitudi katuyi mua kumona. Katuena dijinga ne ditabuja bua bintu bitudi tumona nansha. Kuenza mudimu bua kupeta bubanji budi bumueneka nkupepele bikole kupita kuenza mudimu bua bubanji bua mu nyuma budi kabuyi bumueneka. (Matayo 19:21, 22) Bintu bia bungi bidi bimueneka—bu mudi “lukuka lua mubidi, ne lukuka lua mesu”—bitu bitamba kukoka mubidi wetu mupange bupuangane ne bidi mua kutekesha ditabuja dietu.—1 Yone 2:16.
3. Nditabuja dia mushindu kayi didi muena Kristo ne bua kuikala nadi?
3 Kadi Paulo udi wamba ne: ‘Muntu udi ulua kudi Nzambi budiye nabu mbua kuitabuja ne: Yeye udiku, ne udi mufutshi wa badi bamukeba.’ Mose uvua ne ditabuja dia mushindu’au. ‘Wakatangila ku dipingajila dia difutu’ ne ‘wakatantamana bu [uvua] utangila Yeye udi kayi umueneka ku mêsu.’ (Ebelu 11:6, 24, 26, 27) Muena Kristo udi ne bua kuikala ne ditabuja dia mushindu’eu. Anu mudibi bileja mu tshiena-bualu tshia kumpala, Abalahama uvua tshilejilu tshilenga mu muanda eu.
Tshilejilu tshia Abalahama tshia ditabuja
4. Mmunyi muvua ditabuja dia Abalahama dikale ne buenzeji pa nsombelu wende?
4 Abalahama uvua mu Ula pakapetaye dilaya dia kudi Nzambi dia se: uvua ne bua kulela dimiinu divua ne bua kuikala dibenesha bua bantu ba bisamba bionso. (Genese 12:1-3; Bienzedi 7:2, 3) Bilondeshile dilaya adi, Abalahama wakatumikila Yehowa, diambedi kuyaye mu Halana ne pashishe mu Kanâna. Ne Yehowa wakalaya bua kupesha dimiinu dia Abalahama buloba bua Kanâna. (Genese 12:7; Nehemiya 9:7, 8) Kadi malu a bungi a ku avua Yehowa mulaye avua ne bua kukumbana kunyima kua lufu lua Abalahama. Tshilejilu, Abalahama muine kavuaku ne tshitupa nansha tshimue tshia Kanâna—pa kumbusha lubuebue lua ku Makepela, luakasumbaye bu muaba wa kujikilangana. (Genese 23:1-20) Nansha nanku uvua ne ditabuja mu dîyi dia Yehowa. Kupita bionso, uvua ne ditabuja mu ‘musoko udi ne bishimikidi [utshidi kumpala], mulongolodi wawu ne muibaki wawu muikale Nzambi.’ (Ebelu 11:10) Ditabuja dia nunku diakamukuatshisha mu nsombelu wende mujima.
5, 6. Mmu mushindu kayi muvua ditabuja dia Abalahama ditetshibue pa bidi bitangila dilaya dia Yehowa?
5 Muanda eu udi umueneka nangananga bua dilaya dia se: dimiinu dia Abalahama divua ne bua kulua tshisamba tshinene. Bua dilaya edi kukumbana, Abalahama uvua dijinga ne muana, ne wakindila mutantshi mule bua kumubeneshabu ne muana umue. Katuena bamanye bidimu bivuaye nabi pakumvuaye dilaya dia Nzambi bua musangu wa kumpala, kadi pakenzaye luendu lule mutangile ku Halana, Yehowa kavua muanji kumupesha muana nansha. (Genese 11:30) Wakashala mu Halana mutantshi mule bushuwa bua ‘kupeta bintu ne bantu.’ Ne pakayaye mu Kanâna, uvua ne bidimu 75 ne Sala uvua ne bidimu 65. Kadi muana kavua muanji kuikalaku to. (Genese 12:4, 5) Pakakumbajaye bidimu 70 ne pa mutu, Sala wakakoma ne: kavua kabidi mua kulelela Abalahama muana mukavuaye mupite kukulakaja. Bua bualu ebu, bilondeshile tshilele tshia mu tshikondo atshi, wakafila Hagâ mupika wende mukaji kudi Abalahama, ne wakalela nende muana. Kadi eu kavua muana mulaya nansha. Kunyima kua matuku bakipata Hagâ ne muanende Yishemaele. Nansha nanku, pakabakuila Abalahama kudi Yehowa, Yehowa Nzambi wakalaya bua kubenesha Yishemaele.—Genese 16:1-4, 10; 17:15, 16, 18-20; 21:8-21.
6 Mu tshikondo tshijadika kudi Nzambi nkayende—tshikondo tshile menemene panyima pa buobu bamane kumvua dilaya bua musangu wa kumpala—Abalahama, muntu wa bidimu 100, ne Sala, bidimu 90, bakapeta muana wa balume, Isaka. Buvua ne bua kuikala bualu bua dikema! Bua bena dibaka aba bakulakaje, bivua anu bu dibika ku lufu pavua mibidi yabu ‘mimane kufua’ milele muntu mupiamupia. (Lomo 4:19-21) Bavua bindile mutantshi mule, kadi ndekelu wa bionso pakakumbana dilaya, biakamueneka ne: dindila edi kadivua dia patupu.
7. Mmunyi mudi ditabuja disuikakaja ku ditantamana?
7 Tshilejilu tshia Abalahama tshidi tshituvuluija ne: ditabuja kadiena ne bua kuikala dia katantshi kîpi nansha. Paulo wakasuikakaja ditabuja ne ditantamana pakafundaye ne: “Nudi nukengela ditantamana, bua se: panyima pa nuenu bamane kuenza disua dia Nzambi, nupete dikumbana dia dilaya. . . . Katuena ba ku badi bapingana tshianyima bua kabutu, kadi ba ku badi ne ditabuja bua kulama anyima ne muoyo.” (Ebelu 10:36-39, NW) Bantu ba bungi mbindile dikumbana dia dilaya mutantshi mule. Bamue mbindile matuku abu onso a muoyo. Ditabuja diabu dikole ndibakuatshishe. Ne bu Abalahama, nebapete difutu mu tshikondo tshijadika kudi Yehowa.—Habakuka 2:3.
Tutelejayi Nzambi
8. Mmunyi mutudi tuteleja Nzambi lelu’eu, ne bua tshinyi muanda au neukoleshe ditabuja dietu?
8 Malu matue ku anayi akakolesha ditabuja dia Abalahama, ne malu a muomumue adi mua kutuambuluisha. Bua kumpala: ‘wakitabuja ne: Nzambi udiku’ pa kuteleja pavua Yehowa wakula. Nenku, uvua mushilangane ne bena Yuda ba mu matuku a Yelemiya, bavua bitabuja Yehowa kadi kabayi bitabuja mêyi ende. (Yelemiya 44:15-19) Lelu’eu, Yehowa udi wakula netu ku diambuluisha dia Bible, Dîyi diende dipudija ku spiritu, diakamba Petelo ne: didi bu “muinda udi utema mu muaba wa mîdima . . . mu mitshima yenu.” (2 Petelo 1:19) Patudi tubala Bible ne ntema, badi benda ‘batukolesha ne miaku ya ditaba.’ (1 Timoteyi 4:6, MMM; Lomo 10:17) Kabidi, mu matuku aa a ku nshikidilu, “mupika wa lulamatu ne wa budimu” udi ufila “biakudia [bia mu nyuma] mu tshikondo tshiakanyine,” ufila buludiki bua kutumikila mêyi a mu Bible ne kujingulula milayi idimu. (Matayo 24:45-47, NW) Kuteleja Yehowa ku butuangaji bua mishindu eyi kudi ne mushinga wa bungi bua kuikala ne ditabuja dikole.
9. Ntshinyi tshienzeka bituikala bushuwa ne ditabuja mu ditekemena dia buena Kristo?
9 Ditabuja dia Abalahama divua disuikila bikole ku ditekemena diende. ‘Wakitabuja ne ditekemena, bua kuluaye nkambua wa bisamba bia bungi.’ (Lomo 4:18) Ebu mbualu buibidi budi mua kutuambuluisha. Katuena ne bua kupua muoyo se: Yehowa udi “mufutshi wa badi bamukeba.” Mupostolo Paulo wakamba ne: “Tudi tuenza mudimu mukole ne tudi tutshinta, bua tuakutekemena Nzambi udi ne muoyo.” (1 Timote 4:10) Bituikala bushuwa ne ditabuja mu ditekemena dia buena Kristo, nsombelu wetu mujima neikale tshijadiki tshia ditabuja dietu, anu bu muvuabi bua Abalahama.
Tuakulayi ne Nzambi
10. Mmasambila a mushindu kayi akolesha ditabuja dietu?
10 Abalahama uvua wakula ne Nzambi, ne ebu buvua bualu buisatu buakakolesha ditabuja diende. Lelu’eu, tuetu petu tudi mua kuakula ne Yehowa, mu dienza mudimu ne dipa dia disambila ku butuangaji bua Yezu Kristo. (Yone 14:6; Efeso 6:18) Panyima pa dilonda mufuanu uvua wela kashonyi pa mushinga wa kutungunuka ne kusambila ke pavua Yezu muele lukonko lua se: ‘Palua Muana wa muntu, neasangane ditabuja pa buloba anyi?’ (Luka 18:8) Disambila didi dikolesha ditabuja didi dilomba meji ne madikolela. Mmuanda udi uleja meji mondoke. Tshilejilu, disambila dia muoyo mujima didi ne mushinga wa bungi patudi ne mapangadika manene a kuangata anyi patudi mu kanyinganyinga kakole.—Luka 6:12, 13; 22:41-44.
11. (a) Mmunyi muvua Abalahama mupete bukole pakunzuluilaye Nzambi mutshima wende? (b) Ntshinyi tshitudi mua kulongela ku malu akafikila Abalahama?
11 Pavua Abalahama wenda ukulakaja ne Yehowa kayi muanji kumupesha dimiinu dilaya, Abalahama wakakuatshila Nzambi bualu buvua bumutonde. Yehowa wakamupesha dishindika. Tshipeta tshivua se: Abalahama ‘wakitabuja Yehowa, ne Yehowa wakabala kuitabuja kuende ne: Mbuakane buende.’ Pashishe Yehowa wakafila tshimanyinu bua kujadika mêyi ende. (Genese 15:1-18) Bitunzuluila Yehowa mitshima yetu mu disambila, bituitaba malu adi Yehowa utujadikila mu Bible Dîyi diende, ne bituamutumikila ne ditabuja dia tshishiki, nanku Yehowa pende neakoleshe ditabuja dietu.—Matayo 21:22; Yuda 20, 21.
12, 13. (a) Mmunyi muvua Abalahama mupete dibenesha pavuaye mulonde buludiki bua Yehowa? (b) Mmalu a mushindu kayi akolesha ditabuja dietu?
12 Bualu buinayi buakakolesha ditabuja dia Abalahama buvua dikuatshisha dia kudi Yehowa pakalondaye buludiki buende. Pakaya Abalahama bua kusungila Lota ku bianza bia bakalenge bavua balue kuela mvita, Yehowa wakamuambuluisha bua kubatshimuna. (Genese 14:16, 20) Pavua Abalahama musombe bu muenyi ne muena luendu mu buloba buvua dimiinu diende ne bua kupiana, Yehowa wakamubenesha pa kumuvudijila bintu bia ku mubidi. (Fuanyikija ne Genese 14:21-23.) Yehowa wakalombola madikolela a musadidi wa Abalahama bua kupetela Isaka mukaji uvua mukumbane. (Genese 24:10-27) Bushuwa, Yehowa ‘wakasankisha Abalahama mu malu ende onso.’ (Genese 24:1) Bu tshipeta, ditabuja diende divua dikole menemene ne uvua ne malanda matambe kushemakana ne Yehowa Nzambi mu mushindu wa se: Yehowa wakamubikila ne: “mulunda wanyi.”—Yeshaya 41:8; Yakobo 2:23.
13 Lelu’eu tudiku mua kupeta ditabuja dikole mushindu’eu anyi? Eyowa. Bituateta Yehowa, anu bu Abalahama, mu ditumikila mêyi ende, neatubeneshe petu, ne abi nebikoleshe ditabuja dietu. Tshilejilu, Luapolo lua Tshidimu tshia Mudimu tshia 1998 ludi luleja ne: bantu ba bungi bavua bapete dibenesha mu mushindu wa dikema pakatumikilabu dîyi didiye mutume bua kuyisha lumu luimpe.—Mâko 13:10.
Muyuki wa ditabuja lelu’eu
14. Mmunyi muvua Yehowa mubeneshe kampanye kenza ne Ngumu ya Bukalenge No. 35?
14 Mu Kasuamansense 1997, kampanye kenza ne Ngumu ya Bukalenge No. 35 pa buloba bujima kakapatula bipeta bimpe bia pa buabi bua lukunukunu ne musangelu wa Bantemu miliyo mivule. Tuangate tshilejilu tshia bualu buakenzeka mu ditunga dia Ghana. Bakabanya trakte mitue ku 2 500 000 mu miakulu inayi, ne tshipeta tshivua se: bantu bakalomba malonga a Bible mafike ku 2 000. Mu ditunga dia Chypre Bantemu babidi bavua benda babanya Ngumu ya Bukalenge e kumonabu nsaserdose wenda ubalonda. Panyima pa mutantshi, buobu kumupesha trakte wa Ngumu ya Bukalenge. Ukavua mupete trakte mukuabu, ne wakamba ne: “Mukenji udimu uvua munkemeshe bikole, ke pamvua musue kuela bantu bavua baufunde kalumbandi.” Mu ditunga dia Danemark, bakapatula bipeta bilenga mu diabanya Ngumu ya Bukalenge 1 500 000. Muntu mukaji kampanda udi wenza mudimu mu tshibambalu tshia dienzelangana kampanye wakamba ne: “Trakte eu udi ne mukenji udi utangila muntu yonso. Mmutekete bua kumumvua, ne udi ukusaka, ukupesha dijinga dia kumanya malu a bungi. Mmulenge pa bualu menemene!”
15. Mmalu menzeke kayi adi aleja ne: Yehowa wakabenesha madikolela menza bua kupeta bantu muaba wonso?
15 Mu 1998 bakenza madikolela bua kuyisha bantu ki ng’anu ku nzubu yabu, kadi muaba wonso. Mu ditunga dia Côte d’Ivoire, muntu mulume ne mukajende bikale ba-misionere bakakumbula mazuwa 322 avua mimane ku bitudilu. Bakabanya mikanda 247, bibejibeji 2 284, broshire 500, ne nkama ya trakte, pamue ne bande ya video bua bena mazuwa kuikalabu bamona padibu benza luendu. Mu ditunga dia Canada, Ntemu kampanda wakaya mu ditanda mudibu balongoluela bisasa bia mashinyi. Muena ditanda edi wakasankidila bulelela, ne muanetu wakashalamu mêba anayi ne tshitupa, nansha muvuaye muenze anu dîba dimue anyi kupita apu mu diyisha bantu bavua balue kuenzeja midimu. Ndekelu wa bionso, bakalongolola bua kuenza dilonga pa dîba 10:00 wa butuku. Kadi imue misangu divua dilua kubanga anu mundankulu, dinenga too ne pa dîba ibidi wa butuku. Ndongamu uvua pamu’apa ufila lutatu, kadi bipeta bimpe biakamueneka. Muntu eu wakapangadija bua kuikala ukanga ditanda diende mu Dia lumingu dionso bua kumona mua kubuela mu bisangilu. Katupa kîpi yeye ne dîku diende bakatuadija kudiunda bimpe mu nyuma.
16. Mmalu menzeke kayi adi aleja ne: broshire wa Utulomba ne mukanda wa Dimanya mbiamu bia bukole mu mudimu wa diyisha ne dilongesha?
16 Broshire wa Ntshinyi tshidi Nzambi utulomba? ne mukanda wa Dimanya didi difikisha ku muoyo wa kashidi bidi bitungunuka ne kuikala biamu bia bukole mu mudimu wa diyisha ne wa dilongesha. Mu ditunga dia Italie, mansere mukuabu muindile bise wakitaba trakte wa Ngumu ya Bukalenge. Dituku diakalonda, bakamonangana kabidi nende ne wakitaba broshire wa Utulomba. Panyima, dituku dionso bavua benza dilonga dia Bible dia minite 10 peshi 15 ku tshimanyikilu tshia bise. Kunyima kua ngondo umue ne tshitupa, wakapangadija bua kumbuka mu nzubu wa badiambike ne kuya kuabu ku Guatemala bua kutungunuka ne dilonga diende. Mu ditunga dia Malawi, Lobina, mulondi wa ekleziya wa tshisumi, kakasanka to pakatuadija bana bende ba bakaji kulonga Bible ne Bantemu ba Yehowa. Nansha nanku, bansongakaji aba bavua bambila mamuabu bulelela bua mu Bible pavuabu ne mushindu. Mu Kabalashipu 1997, Lobina wakamona mukanda wa Dimanya, ne tshiambilu “Dimanya didi difikisha” tshiakakoka ntema yende. Mu Kashipu wakitaba bua kulonga Bible. Mu Tshimungu wakabuela mu mpungilu wa distrike ne kutelejaye ndongamu yonso ne ntema. Ku ndekelu kua ngondo au, ukavua mumbuke mu ekleziya wende ne mukumbaje malu-malomba bua kuikala mumanyishi udi kayi mutambule. Wakatambula mu Kasuabanga 1997.
17, 18. Mmunyi mudi bande ya video ya Société mimueneke ikuatshisha mu diambuluisha bantu bua “kumona” malu a mu nyuma?
17 Bande ya video ya Société mmiambuluishe bantu ba bungi bua “kumona” malu a mu nyuma. Mu tshidiila tshia Maurice, muntu mulume mukuabu wakumbuka mu ekleziya wende bualu kamuvua buobumue nansha. Misionere wakamuleja buobumue bua Bantemu ba Yehowa, pa kuenza mudimu ne bande wa video wa Unis grâce à l’enseignement divin. Muntu eu wakakema wamba ne: “Nuenu Bantemu ba Yehowa nukadi mu Mparadizu!” Wakitaba bua kulonga Bible. Muanetu wa bakaji mu ditunga dia Japon wakaleja bayende uvua kayi muena kuitabuja bande wa video wa Les Témoins de Jéhovah: un nom, une organisation, kudiumvuaye musakibue bua kubanga kulonga Bible pa tshibidilu. Panyima pa mumane kumona Unis grâce à l’enseignement divin, wakajinga bua kulua Ntemu wa Yehowa. Bande isatu idi ne tshiena-bualu tshia: La Bible: Un récit historique exact, des prophéties dignes de foi, yakamuambuluisha bua kutumikila mêyi-maludiki a mu Bible mu nsombelu wende. Ku ndekelu, bande wa La fermeté des Témoins de Jéhovah face à la persécution nazie wakamuleja ne: Yehowa udi ukolesha bantu Bende mu mvita idi Satana ubela. Muntu eu wakatambula mu Kasuamansense 1997.
18 Aa mmalu makese patupu a ku malu a bungi menemene menzeke mu tshidimu tshia mudimu tshishale. Adi aleja ne: Bantemu ba Yehowa badi ne ditabuja dia tshisumi ne se: Yehowa udi ukolesha ditabuja adi pa kubenesha mudimu wabu.—Yakobo 2:17.
Nuikale ne ditabuja dikole lelu’eu
19. (a) Mmunyi mutudi mu nsombelu mulenga kupita Abalahama? (b) Mbantu bungi kayi bakasangila tshidimu tshishale bua kuvuluka lufu lua Yezu lua mulambu? (c) Mmatunga kayi avua ne bungi bua pa buabu bua bantu bavua babuele mu Tshivulukilu tshidimu tshishale? (Tangila tablo mu dibeji dia 12 too ne dia 15.)
19 Mu mishindu ya bungi tuetu lelu’eu tudi mu nsombelu mulenga kupita muvua Abalahama. Tudi bamanye ne: Yehowa wakakumbajila Abalahama malaya ende onso. Tunkanunuina tua Abalahama tuakapiana Kanâna, ne tuakalua tshisamba tshinene. (1 Bakelenge 4:20; Ebelu 11:12) Kabidi, bidimu bitue ku 1 971 kunyima kua Abalahama mumane kumbuka ku Halana, Yezu, kankanunuina kende, uvua mutambuisha mu mâyi kudi Yone Mubatiji. Ne pashishe Yehowa nkayende wakamutambuisha ne spiritu munsantu bua kuluaye Masiya, Dimiinu dia Abalahama mu ngumvuilu mujima wa mu nyuma. (Matayo 3:16, 17; Galatia 3:16) Mu dia 14 Nizan 33 B.B., Yezu wakafila muoyo wende bu tshia-bupikudi bua bantu bavua ne bua kuleja ditabuja kudiye. (Matayo 20:28; Yone 3:16) Mpindieu bantu miliyo mivule badi mua kudibenesha ku diambuluisha diende. Tshidimu tshishale, bantu 13 896 312 bakasangila mu dia 14 Nizan bua kuvuluka tshienzedi etshi tshilenga tshia dinanga. Ndibingishibua kayipu bua Yehowa, Mulami Munene wa malaya!
20, 21. Mmunyi muakadibenesha bantu ba mu bisamba bionso ku butuangaji bua Dimiinu dia Abalahama mu siekele wa kumpala, ne mmunyi mudibu badibenesha lelu’eu?
20 Mu siekele wa kumpala, bantu ba bungi ba mu bisamba bionso—kubanga ne Izalele wa ku mubidi—bakaleja ditabuja kudi Dimiinu edi dia Abalahama ne kuluabu bana ba Nzambi bela manyi, bena mu “Izalele wa Nzambi” mupiamupia wa mu nyuma. (Galatia 3:26-29; 6:16, NW; Bienzedi 3:25, 26) Bavua ne ditekemena dishindika dia kupeta muoyo kauyi kufua wa mu nyuma mu diulu bu bakokeshi mu Bukalenge bua Nzambi. Anu bantu 144 000 ke bavua ne bua kubeneshibua mu mushindu’eu, ne bakese ba kudibu ke batshidi bashale. (Buakabuluibua 5:9, 10; 7:4) Tshidimu tshishale, bantu 8 756 bakafila tshijadiki tshia ditaba diabu dia se: bavua munkatshi mua bungi ebu pa kudia ne kunua bimanyishilu mu musekelelu wa Tshivulukilu.
21 Lelu’eu Bantemu ba Yehowa pabuipi ne bonso mbena mu “musumba munene” mudianjila kumanyisha mu Buakabuluibua 7:9-17 (NW). Bualu badi badibenesha ku butuangaji bua Yezu, badi ne ditekemena dia kupeta muoyo wa kashidi mu buloba bua mparadizu. (Buakabuluibua 21:3-5) Bantu 5 888 650 bakenza mudimu wa buambi mu 1998 badi tshijadiki tshia se: musumba eu udi bushuwa “munene.” Bivua nangananga bisankisha bua kumona ditunga dia Russie ne dia Ukraine afila luapolo lua bamanyishi bapite pa 100 000 bua musangu wa kumpala. Tshivua tshikemesha kabidi nduapolo lua ku États-Unis—bamanyishi 1 040 283 mu Tshimungu. Aa avua anu asatu a ku matunga 19 akafila luapolo lua bamanyishi bapite pa 100 000 tshidimu tshishale.
Ditekemena didi ne bua kukumbana mu katupa kîpi emu
22, 23. (a) Bua tshinyi tudi ne bua kushindamija mitshima yetu lelu’eu? (b) Mmunyi mutudi mua kudileja bafuane Abalahama, katuyi bu bantu bapange ditabuja batela kudi Paulo?
22 Bakavuluija bantu bavua babuele mu Tshivulukilu bua se: tukadi kule mu dikumbana dia malaya a Yehowa. Mu 1914, Yezu uvua mujadika mu nkuasa bu Mukalenge wa Bukalenge bua Nzambi bua mu diulu, kutuadijaye dikalaku diende mu bukokeshi bua Bukalenge. (Matayo 24:3; Buakabuluibua 11:15) Bushuwa, Dimiinu dia Abalahama didi dikokesha mpindieu mu diulu! Yakobo wakambila bena Kristo ba mu tshikondo tshiende ne: “Lejayi lutulu; shindamijayi mitshima yenu, bualu dikalaku dia Mukalenge ndisemene pabuipi.” (Yakobo 5:8, NW) Bushuwa, dikalaku adi didi mpindieu muanda mulelela! Aka nkabingila kakuabu bua tuetu kukolesha mitshima yetu!
23 Tukoleshayi dieyemena dietu mu malaya a Nzambi pa kulonga Bible pa tshibidilu ne pa kuenza masambila a muoyo mujima misangu yonso. Katupangi kupeta dibenesha dia kudi Yehowa pa kutumikila Dîyi diende. Nenku netuikale bu Abalahama, ki mbu bantu bena ditabuja diakateketa ne diakafua, bu muakaleja Paulo nansha. Kakuena tshintu tshiatutapulula ne ditabuja dietu ditambe bunsantu. (Yuda 20) Tudi tusambila bua bikale nanku bua basadidi bonso ba Yehowa mu tshidimu tshia mudimu tshia 1999 too ne ku dipeta dia muoyo wa tshiendelele udi kumpala.
Udi mumanye anyi?
◻ Mmunyi mutudi mua kuteleja Nzambi lelu’eu?
◻ Mbipeta bimpe kayi bidi bifumina ku disambila Nzambi ne muoyo mujima?
◻ Bitualonda buludiki bua Yehowa ne butumike, mmunyi muakola ditabuja dietu?
◻ Mmalu kayi a mu luapolo lua ku tshidimu (mabeji 12 too ne 15) audi mumone atamba kusankisha?
[Tablo mu mabeji 12-15]
LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 1998
(Bua kumona malu bimpe, tangila mu mukanda)
[Tshimfuanyi mu dibeji 16]
Bituateleja Dîyi dia Yehowa, dieyemena dietu mu malaya ende nedikole
[Tshimfuanyi mu dibeji 18]
Ditabuja dietu didi dikola patudi tuenza mudimu wa buambi