“Nudi bashintulule lungenyi lumvua nalu pa Bantemu ba Yehowa”

KE MUAKAMBA munene kampanda muena Pologne utu utangila buloko pa tshiena-bualu tshivua tshiakula bua mudimu wa Bantemu ba Yehowa, mu Tshibumba tshia Nsentedi tshia dia 15 Kasuamansense 1998. Tshiena-bualu tshia: “Padi mitshima ya mabue ilua ya lumvu,” tshiakaleja bipeta bimpe bidi Bantemu ba Yehowa bapete pavuabu bambuluisha bena buloko mu Wołów, mu ditunga dia Pologne.

Kumpala kua kupatula Tshibumba tshia Nsentedi tshitela kuulu eku, bakenza tshisangilu tshia pa buatshi bua kutshipesha bena buloko, mu dia 13 Kabitende 1998, ku nzubu wa buloko wa ku Wołów. Bavua babikile Bantemu ba Yehowa ba muaba au mu tshisangilu etshi, bena buloko bakavua batambule ne bantu bakuabu bavua basankidila bulelela, ne bamue banene batu batangila buloko. Tangila amue a ku malu akambabu kudi bavua mu tshisangilu etshi.

Jerzy, Ntemu wa Yehowa uvua mutambule mu buloko bidimu bipite pa bitanu kumpala, wakamba ne: “Ndi ne disanka dia bungi, mundi mua kubala lelu malu adi aleja madikolela a bungi avua bana betu ba mu bisumbu bia pabuipi apa benze bua kutuambuluisha.” Wakasakidila ne: “Ndi ndifila muanyi muonso bua kushintuluka, ne kumona mudi Yehowa ungakaja.”

Zdzisław, muena buloko pende, wakamba bua mudimu wa buambi uvuabu benza mu nzubu wa lukanu ne: “Mpindieu, bena buloko banayi badi badilongolola bua kutambula, ne aba batshidi batshisankidilaku bulelela mbatungunuke ne kubuela mu bisangilu mu nzubu ututu tubienzela. Tshiena-bualu etshi ntshitusake bikole bua kuenza mudimu wa bungi muaba eu.” Se mmuenenu muimpe menemene bua Zdzisław, utshidi ne bidimu 19 bia kuenza mu buloko!

Kunyima kua mumane kubala tshiena-bualu tshivua tshiakula bua buloko bua ku Wołów, munene kampanda udi utangila buloko wakamba ne: “Mbatupe lumu mu mushindu wa pa buawu. Tshivua ngela meji nansha kakese ne: badi mua kufunda malu mimpe nunku bua nzubu eu wa buloko mu miakulu 130 mu buloba bujima nansha. Ndi mununange, ne ndi nganyisha madikolela anudi nuenza bua kukuatshisha bena buloko.” Munene mukuabu wakasakidila ne: “Nudi bashintulule lungenyi lumvua nalu pa Bantemu ba Yehowa. Kumpala, mvua nnuangata bu tshitendelelu tshia bena bitabataba. Mpindieu, ndi mujadike se: nudi bantu ba nsongo.”

Marek Gajos, mfumu wa buloko bua Wołów, wakatua mimuemue wamba ne: “Kumpala tuvua bele meji se: kanuakuenza bua nsongo to. Tuvua anu ne meji a se: nuvua amu tshitendelelu tshivua tshisue kudia lumu pa kupingajilula bena buloko mu njila muimpe ku diambuluisha dia Bible. Kadi patuakamona bipeta bia mudimu wenu wa kumpala, tuakapangadija bua kueleshangana nenu diboko. Nudi batambakane muaba eu kanuyi nupungila kukadi mpindieu mvula tshitema, ne ndi nganyisha bikole binudi benze too ne lelu.”

Kadi, mmunyi muvua bantu bakuabu bonso bavua mu buloko bua Wołów bakidile tshiena-bualu atshi? Bantemu bavua mu buloko bakabanya bibejibeji bionso bivuabu nabi bualu bena buloko bavua ne dijinga dikole dia kubibala. Tshibejibeji etshi tshiakasankisha kabidi banene batu batangila buloko e kulombeshabu bibejibeji bikuabu 40. Bisumbu bia muaba au biakambuluisha bana betu bavua mu buloko, kubapeshabu bibejibeji bikuabu 100 bu muvua bantu batamba kubikeba. Bungi bua bavua babuela mu bisangilu buakavula.

Piotr Choduń, munene udi utangila buloko uvua muambuluishe Bantemu ba Yehowa bikole, wakamba ne: “Tuvua bapangadije bua kuteka tshiena-bualu etshi muaba utubu bateka bintu bua kubimonabu mu nzubu wetu wa lukanu. Tudi batekemene se: bena buloko bonso badi kabayi banji kulonga nenu Bible nebabale tshibejibeji etshi.”

Tshilejilu tshimpe tshia Bantemu ne madikolela a muoyo mujima adibu benza bua kuyisha mbitungunuke ne kupatula bipeta bimpe. Pa kumusha bena buloko 15 badi bafike too ne ku batismo, banene 2 badi batangila buloko mbalambule mioyo yabu kudi Yehowa ne munene mukuabu mmulombe dilonga dia Bible. Bushuwa, bana betu badi bayisha mu nzubu wa lukanu wa ku Wołów badi bapesha Yehowa butumbi buonso bua bipeta bimpe bidibu bapatula.​—Tangila 1 Kolinto 3:6, 7.

[Tshimfuanyi mu dibeji 28]

Bantemu basatu ne muena buloko dîba divuabu balue kuleja tshibejibeji mu nzubu wa dielela miyuki wa buloko