Mandamuna ku nkonko yenu

▪ Mbudimu kayi butudi ne bua kuikala nabu patudi tuyisha bena buloko?

Mu buloba bujima mudi miliyo mitue ku muanda-mukulu ya bantu badi balama mu buloko, bamue ba kudibu badi baleja dijinga diabu dia kumvua lumu luimpe. (1 Tim. 2:4) Biro bia filiale kampanda bitu bipeta ngondo yonso mikanda mifunda kudi bena buloko anyi bena mêku abu mitue ku 1 400 balomba mikanda yetu anyi bua baya kubakumbula. Nansha mudi dijinga dileja kudi bena buloko ba bungi dikale dilelela, malu akadi bantu bamonamone adi aleja kabidi ne: bamue batu bashima, eku bakeba kulabidila bantu ba Nzambi. Bua bualu ebu, bantu bonso badi ne bua kulonda mibelu idi idimuija eyi idi itangila diyisha bena buloko.

Misangu ya bungi batu bayishila bena buloko mu mikanda mibafundila. Kabiena bikengela nansha kakese bua bana betu ba bakaji kufundilabu bena buloko bantu balume mikanda to, nansha bikale ne tshipatshila tshia kubambuluisha mu nyuma. Bujitu ebu mbua kuambulabu anu kudi bana betu balume badi bapie mu nyuma. Badi mua kusungula bana betu ba bakaji bapie mu nyuma bua kufundilangana mikanda ne bena buloko bantu bakaji badi baleja dijinga dilelela dia kulonga Bible. Kanuena mua kutumina bena buloko makuta anyi dipa kampanda to, nansha biobi mua kuikala bilombibue bua kuenza nanku.

Pikala muena buloko kampanda uleja dijinga dia kumanya bivule, afile dîna diende ne adrese wende bua nuabitumina tshisumbu tshidi mu teritware watshi muikale nzubu wa buloko. Pa tshibidilu bana betu ba balume bapie mu nyuma ba muine amu batu bamanye mua kupita ne malu kabukabu adi mua kujuka. Bikala tshisumbu katshiyi tshimanyike, nudi mua kumanyisha Biro bia filiale.

Ki mbibi bua bana betu badibu bapeshe bujitu ebu kuenzabu bisangilu mu tshibungi ne bena buloko bua se: bantu ba bungi bamone mua kulonga musangu umue to. Kadi, bualu bua pa buabu budi mua kusangisha bamanyishi ne bena buloko pamue kabiyi bikandikibue kabuena ne bua kuenzekela mu buloko to. Kabidi, ki mbualu bua meji bua bamanyishi kuyabu kukumbula bantu badi mu buloko kampanda ne kushemeja nabu malanda padibu kabayi babatume to.

Tuikalayi ne ‘‘budimu bu bua nyoka ne bu nyunyu ya nkutshi idi kayiyi iluishangana’’ patudi tuyisha bena buloko lumu luimpe.​—Mat. 10:16.