Dipinganyina bantu batuvua bayishe didi ditufikisha ku dilonga nabu Bible
1. Bua tshinyi dipinganyina bantu batudi tuyisha didi ne mushinga?
1 Yezu kakapesha bayidi bende anu mudimu wa diyisha nkayawu, kadi wakabapesha kabidi wa ‘dienza bayidi, dibalongesha.’ (Mat. 28:19, 20) Muyishi udi umanyisha, kadi mulongeshi udi wenza bia bungi. Udi ulongesha, umvuija ne ufila bijadiki. Mushindu umue utudi tulongesha bakuabu ngua kupinganyina badi banyisha bulelela bua kutuadija kulonga nabu Bible.
2. Mbanganyi batudi ne bua kupinganyina?
2 Mbanganyi baudi mua kupinganyina bua kubakumbula? Upinganyine bantu bonso badi bitaba bua kuangata mikanda anyi baleja nansha katoba kakese ka mudibu banyisha lumu luimpe. Wewe mupete muntu udi wanyisha bulelela paudi uyisha miaba itu bantu ba bungi, keba bua kupeta adrese wende anyi nimero yende ya telefone bua kumona mua kukolesha dijinga diende dia kumanya bulelela. Wikale anu ne meji a se: malu neakumbane bua kutuadija kulonga Bible. Tungunuka ne kukeba bantu bikala mua kuitaba bua kulonga Bible, pamuapa neubapete.—Mat. 10:11.
3, 4. Ntshinyi tshidi tshikengela kuenza bua kupatula bipeta bimpe patudi tupinganyina bantu?
3 Leja disankidila bantu: Dîba dia kudilongolola bua kukumbula muntu bimpe menemene patudi tumupinganyina mmusangu wa kumpala utudi tumonangana nende. Bamanyishi bapiluke batu bafunda malu adi asankisha udibu bayikila nende bua kumonabu mua kushindamijilapu mayuki abu a musangu walonda. Bakuabu batu bamona bimpe bua kujula lukonko pakadibu bajikija diyuki bua kushiya muntu ne dijinga dia kumanya malu makuabu mu dikumbula dialonda. Patudi tusankidila bantu ne muoyo umue tudi amu tuela meji kudibu nansha bamane kubashiya ku mabu, bidi bitusaka bua kubapinganyina kabidi katuyi tupitshisha matuku a bungi. Pikalaku mushindu, utete kupingana patshidi muntu ne dijinga dikole; pamuapa anu dituku dimue dimue adi peshi kunyima kua matuku abidi.
4 Paudi upinganyina bantu, ukebe bua kuashila miyiki pa binuvua bayikile musangu mushale. Ikala ne tshipatshila tshia kubalaku misangu yonso nansha mvese umue udi ukolesha muntu, ne wikale umuteleja. Ukebe bua kumanya muntu unudi nuyikila nende bimpe. Nunku misangu mikuabu inudi nupetangana, nuyikile malu a mu Dîyi dia Nzambi adi atamba kuakula bua malu adiye nau mu lungenyi.
5. Mmushindu kayi mupepele utudi mua kutuadija kulonga Bible ne bantu?
5 Ikala uditatshisha bua kulonga Bible ne bantu: Pinganyina bantu ne tshipatshila tshia kulonga nabu Bible. Mmunyi mudibi mua kuenzeka? Leja ne: udi musue kuyikila nabu pa bualu budi busankisha, bulula mukanda wa Dimanya ta broshire wa Utulomba mu tshikoso kampanda tshiudi mumone ne: netshisankishe muntu. Bala tshikoso atshi, ela lukonko pashishe nubale mvese umue anyi ibidi mitela mu tshikoso atshi. Nudi mua kuenza bionso panutshidi bimanyine anu ku tshiibi mu minite itanu anyi dikumi. Ujikije pa kuela lukonko ludi lulonda ne numvuangane bua kutungunuka ne muyiki wenu musangu mukuabu.
6. Mmushindu kayi utudi mua kuleja ne: tudi bamanye mushinga wa dipinganyina bantu?
6 Kukolesha dijinga dionso ditudi tusangana muntu nadi kudi ne mushinga mu mudimu wetu. Bua nanku, ulongolole dîba mu programe webe wa ku lumingu bua kupinganyina bantu. Kuenza nanku nekukupeteshe bipeta bimpe mu mudimu webe ne disanka dilelela.