Udiku mua kuya kuambuluisha mu ditunga dia ku ba bende anyi?

“MISANGU YONSO mvua anu njinga kuenza mudimu wa bu-misionere. Bu muntshivua mujike, ngakambuluisha mu provense wa Texas, ku États-Unis, muvua dijinga dinene dia bayishi. Mukajanyi wakalua nanyi kunyima kua dibaka dietu. Patuakalela muanetu wa bakaji, ngakela meji ne: ‘Eu ki ndekelu wa mudimu wanyi wa bu-misionere.’ Kadi Yehowa utu ukumbajila bantu bipatshila biabu, nangananga biobi bitangila disua diende.”​—Jesse, udi mpindieu wenzela mudimu mu ditunga dia Équateur ne mukajende ne bana babu basatu.

“Tshivuaku ngela meji ne: dimue dituku mvua mua kuenza bualu bua mushindu’au tshiyi mubuele mu Gilada, kalasa kadibu balongeshila bantu mudimu wa bu-misionere. Bivua binkemesha bikole pamvua mmona umue wa ku balongi banyi ba Bible wenza muyuki anyi uyisha, ne ndi ngela Yehowa tuasakidila bua mudiye mumpeshe mpunga wa kuambuluisha bantu mushindu’eu.”​—Karen, muntu mukaji mujike udi muenze bumpanda-njila ku Sud kua Amerike munkatshi mua bidimu muanda-mukulu.

“Kunyima kua tuetu bamane kuenza mudimu wa ku dîba ne ku dîba munkatshi mua bidimu 13 mu États-Unis, meme ne mukajanyi tuakamona se: tuvua dijinga ne mudimu mukuabu. Tudi ne disanka dituvua katuyi banji kupeta to; eu ki nsombelu mulenga.”​—Tom, udi wenza bumpanda-njila ne Linda mukajende mu rejon wa Amazone.

Mêyi aa adi aleja dianyisha ng’a bantu bavua kabayi bapete mushindu wa kubuela mu Gilada, Tshilongelu tshia Bible tshia Watchtower bua kulonga mudimu wa bu-misionere. Nansha nanku, bakapeta masanka ne ntatu mu mudimu wa ku ba bende. Kadi ntshinyi tshiakabambuluisha? Udiku pebe mua kuenza mudimu eu anyi?

Bidi bikengela kuikala basaka kudi tubingila tuakane

Bua kukumbaja bimpe mudimu eu kabiena bikengela anu kuikala ne lungenyi lua kuya mu ditunga dia ku ba bende to. Bantu badi bananukilemu mbenze nanku bualu badi ne bipatshila biakane. Anu bu mupostolo Paulo, badi badimona bena dibanza kudi Nzambi ne kudi bantu kabidi. (Lomo 1:14) Bavua mua kuikala bakadi batumikile mukenji wa Nzambi udi ulomba bua kuyisha pa kuenzela buambi mu ditunga diabu. (Matayo 24:14) Kadi bakadimona bena dibanza ne bavua basakibue bua kuipatshila mudimu eu ne kuambuluisha bantu batu kabayi batamba kupeta mushindu wa kumvua lumu luimpe.

Misangu mivule dijinga dia kuenzela mudimu muaba udi bantu banyisha bikole lumu luimpe ditu bualu bukuabu bukumbanyine budi busaka bantu. Nnganyi wa munkatshi muetu, padiye umona mulobi mukuabu ukuata mishipa ya bungi, ubenga kusemena pabuipi ne muaba au? Bia muomumue, luapolo idi isankisha ya didiunda dia pa buadi mu makuabu matunga mmikankamije bantu ba bungi bua kuya muaba udi “mishipa mipite bungi.”​—Luka 5:4-10, MMM.

Bala mushinga

Mu matunga a bungi kabatu bitabila bena budisuile badi bafume ku ba bende bua malu a Nzambi bua kuenzabu mudimu wa ku mubidi to. Nanku, muntu yonso udi musue kuya kuambuluisha mu ditunga dia ku ba bende udi ne bua kudikebela makuta nkayende. Mmunyi mutubu bajikija lutatu elu lua makuta? Ba bungi mbasumbishe nzubu yabu anyi mbatekemu bafutshidi bua kupeta makuta adibu bakengela. Bakuabu mbasumbishe bintu biabu bia mudimu. Banga bavua balame makuta bua kukumbaja tshipatshila tshiabu. Kudi bakuabu badi bambuluisha mu ditunga dia ku ba bende bua tshidimu tshimue anyi bibidi, kunyima bapingana mu ditunga diabu bua kuenza mudimu ne kupeta ndambu wa makuta, pashishe kupingana bua kuambuluisha tshiakabidi.

Buimpe bua kuikala mu ditunga didi kadiyi ne bubanji mbua se: pa tshibidilu bintu bitu mushinga mupuekele kupita mu ditunga dia bubanji bua bungi. Muanda eu mmupeshe bamue mushindu wa kudiambuluisha bimpe ne makuta makese adibu bapeta. Bushuwa, muntu utu utula makuta bilondeshile nsombelu udiye musue kuikala nende. Nansha mu matunga malanda, tudi mua kusanganamu bintu bimpe bitambe kadi bikale mushinga mukole.

Nanku kumpala kua kuasa luendu, muntu udi ne bua kubala muende mudiye namu. Kadi kudi malu a bungi adi akengedibua kupita kubala patupu kua mushinga. Pamu’apa mumvuija a bantu bavua benze mudimu ku Amerike wa ku Sud adi mua kutuambuluisha.

Lutatu lutambe bunene

Markku, mufumine mu ditunga dia Finlande, udi uvuluka wamba ne: “Kulonga muakulu wa bena Espagne kuvua mvita ya bushuwa buanyi meme. Ngakela meji ne: bu mumvua tshiyi mumanye muakulu eu, bivua mua kundomba matuku a bungi bua meme kulua musadidi wa mudimu. Ngakabazuka pakangambilabu bua meme kuikala ndombola dilonga dia mukanda kunyima kua ngondo ibidi patupu! Nansha nanku kuvua bikondo bia bungi bimvua ngumvua bundu. Mêna a bantu ke avua nangananga antatshisha. Dimue edi ngakabikila Muanetu Sancho ne: ‘Muanetu Chancho (mmumue ne: ngulube),’ ne tshiena mua kupua muoyo mumvua mbikila Muanetu wa bakaji Salamea ne: ‘Malasea (mbuena kuamba ne: muenji wa malu mabi).’ Diakalenga, bana betu bavua ne lutulu lua bungi.” Ndekelu wa bionso Markku wakambuluisha munkatshi mua bidimu 8 mu ditunga adi bu mutangidi wa tshijengu pamue ne mukajende Celine.

Chris, mukaji wa Jesse utudi batele ku mbangilu, udi ulonda ne: “Ndi mvuluka dikumbula dia kumpala dia mutangidi wetu wa tshijengu, kunyima kua ngondo isatu ya difika dietu muaba eu. Ndi mua kuamba ne: mutangidi wa tshijengu uvua ufila mifuanu ne wamba malu malenga bua kulenga mitshima yetu, kadi tshivua ngumvua bivuaye wamba to. Anu mu Nzubu wa Bukalenge amu ngakapuekesha binsonji. Kabivua binsonji bia disanka to; mvua nshikunkila. Kunyima kua tshisangilu atshi, ngakateta bua kumvuija mutangidi wa tshijengu nsombelu umvua nende. Uvua muntu muimpe wa dikema ne wakangambila tshivua bantu bakuabu bonso bangambila ne: ‘Ten paciencia, hermana’ (‘Ikala ne lutulu muanetu wa bakaji’). Kunyima kua bidimu bibidi anyi bisatu, tuakapetangana nende kabidi ne tuakayukila munkatshi mua minite 45, mvua ne disanka bua mutuvua mpindieu mua kuyukidila bimpe.”

Muanetu mukuabu udi wamba ne: “Kulonga kudi ne mushinga wa bungi. Patudi tuenza madikolela a bungi bua kulonga muakulu, tudi tupeta mushindu wa kuyukila bimpe ne bakuabu.”

Bantu bonso badi bitaba ne: madikolela aa atu afikisha ku masanka a bungi. Padi muntu uluangana bua kulonga muakulu mupiamupia, udi ne bua kudipuekesha, kuikala ne lutulu ne kunanukila. Mbunzulule tshiibi tshinene bua kumanyisha bakuabu lumu luimpe. Tshilejilu, kulonga muakulu wa bena Espagne kudi kuambuluisha bua kuyukila ne bantu bapite pa miliyo 400 badi bakula muakulu eu pa buloba bujima. Bantu ba bungi bakapingana kuabu batshidi bamanye muakulu eu ne badi bambuluisha bantu badi tshiena-Espagne tshikale muakulu wabu wa ku tshilelelu.

Newenze tshinyi paudi umvua muoyo wa kuenu?

Deborah ne bayende Gary bakenzela mudimu wa buambi mu rejon wa Amazone. Deborah udi wamba ne: “Patuakafika bua musangu wa kumpala mu ditunga dia Équateur mu 1989, kuetu kuvua kunsamina muoyo bikole. Ngakalonga mua kueyemena bana betu badi mu tshisumbu. Mbalue anu bu bena mu dîku dianyi.”

Karen, utudi batele ku mbangilu, udi wamba ne: “Mvua nduisha muoyo wa kuetu pa kuya mu buambi dituku dionso. Mushindu’eu tshivua ntuma meji kudi ba kuetu nansha. Ngakashala kabidi muvuluke ne: mudimu wanyi mu ditunga edi dia ku ba bende uvua usankisha baledi banyi. Mamu wanyi uvua anu unkankamija ne mêyi aa: ‘Yehowa udi mua kukulama kupita mundi meme mua kuenza.’”

Makiko, mufumine mu ditunga dia Japon, udi wamba bua kusekeshangana ne: “Kunyima kua dituku dijima mu mudimu wa budimi, ntu mupungile be. Nenku pandi mpingana ku nzubu ne ngumvua muoyo wa kuetu, pa tshibidilu ntu ndala tulu. Nenku meji au kaena anenga mutantshi mule to.”

Netuambe tshinyi bua bana?

Padiku bana, bidi bikengela kuikala ne ntema ku bidibu bakengela, bu mudi dilonga tulasa. Mu muanda eu bamue mbangate dipangadika dia kulongeshila bana ku nzubu, bakuabu mbabueje bana mu bilongelu bia muaba udibu basombele.

Al ne mukajende bakaya ku Amerike wa ku Sud ne bana babu babidi ne mamuende. Udi wamba ne: “Tuakamona ne: kubueja bana mu tulasa kuakabambuluisha bua kulonga muakulu pa lukasa. Kunyima kua ngondo isatu bakavua bawakula kakuyi lutatu.” Ku lukuabu luseke, bana ba balume babidi ba Mike ne Carrie badi balongela kumbelu ne mikanda mibatumina kudi tshilongelu kampanda tshia kule tshidi mbulamatadi muanyishe. Baledi babu badi bamba ne: “Tuakamona se: katuvua mua kulekela bana nkayabu ne malongesha aa to. Tuvua ne bua kuikala nabu pabuipi bua kushindika ne: bana ki mbashale panyima pa malongesha avuabu babatumine.”

David ne Janita, bafumine mu ditunga dia Australie, badi baleja dijinga didibu nadi bua bana babu ba balume babidi. “Tuvua basue bua bana badimuenene nsombelu udi nende bantu bakuabu. Mbitekete bua kuamba ne: tuetu tuvua bakole mu nsombelu muimpe, kadi mpindieu nsombelu muimpe au udi anu kudi bantu bakese lelu. Mbamone kabidi mudi mêyi-maludiki a Nzambi enza mudimu pa buloba bujima, kakuyi dishilangana bua ditunga anyi bibidilu kampanda.”

Ken udi uvuluka, wamba ne: “Ntshivua ne bidimu binayi pakumbuka dîku dietu mu Angleterre mu 1969. Nansha mungakamona se: katuvua basombele mu nzubu wa madioto a buloba mufinga ne nsona bu mumvua ngela meji, ngakumvua ne: mvua mupete nkoleshilu uvua utamba kusankisha ku bunsonga buanyi. Misangu yonso mvua ngumvua luse bua bana bakuabu bavua kabayi bapete nkoleshilu wa muomumue! Bua ditamba kusomba ne ba-misionere ne bampanda-njila ba pa buabu, ngakatuadija bumpanda-njila buambuluishi ne bidimu tshitema.” Patudi tuamba apa Ken udi mutangidi muena-ngendu.

Gabriella, muana wa bakaji wa Jesse, udi wamba ne: “Équateur mmulue menemene mpindieu ditunga dietu. Ndi ne disanka dia bungi muvua baledi banyi bapangadije bua kulua kuneku.”

Ku lukuabu luseke, kuvua bana bavua kabayi bafike ku dibidilangana ne nsombelu eyi bua malu kabukabu, ne bakapingana ne mêku abu mu matunga avuabu bafume. Ke bua tshinyi mbia meji bua kuanji kuya kumona mudi malu mu ditunga dia ku ba bende bangabanga ne kuya kusombelamu. Nanku kudi mushindu wa kuangata mapangadika bilondeshile malu malelela adi muntu mudimuene.

Mabenesha bua dikenzela mudimu ku ba bende

Bushuwa, kuya mu ditunga dia ku ba bende kudi ne ntatu ne kulomba madikolela a bungi. Bantu badi baye ku ba bende aba mbayeku ne kayidila anyi? Tubalekelayi buobu nkayabu batuambile.

Jesse: “Mu bidimu dikumi bitudi bashale mu tshimenga tshia Ambato, tudi bamone mudi bungi bua bisumbu buvule ku bisumbu 2 too ne ku 11. Tuvua ne diakalenga dia kutuadija bitanu bia ku bisumbu ebi, ne tuvua bambuluishe bua kuibaka Nzubu ya Bukalenge ibidi. Tuvua kabidi ne disanka dia kuambuluisha balongi ba Bible babidi ku tshidimu tshionso bua kukumbaja malu malomba bua kutambula. Ndi nyingalala anu bua bualu bumue: mvua mua kuikala mulue muaba eu bidimu dikumi kumpala.”

Linda: “Mushindu udi bantu banyisha lumu luimpe ne madikolela atudi tuenza udi utukankamija be. Tshilejilu, mu ka-musoko kampanda kashila mu tshisuku, mulongi wa Bible dîna diende Alfonso wakamona se: bivua ne mushinga bua kuikala kuenza miyuki ya patoke mu musoko wabu. Utshivua ubuelelaku mu nzubu wende mupiamupia muenza ne mabaya, umue wa ku nzubu mikese ya mushindu’au mu musoko eu. Pakamonaye ne: nzubu wende ke uvua mukumbane bua kumufila kudi Yehowa mu tshimenga atshi, wakapingana mu mutanda wende ne kupeshaye bana betu nzubu mupiamupia eu bua ikale Nzubu wa Bukalenge.”

Jim: “Mêba atudi tuenza mu buambi bua kuyukila ne bantu mmapite kule ne kule atuvua tuenza mu États-Unis. Kabidi, nsombelu udi kuneku ki mmutambe kuikala wa diyumbakana to. Kakuyi mpata, tudi ne dîba dia bungi dia kulonga ne kupatuka mu buambi.”

Sandra: “Kumona mudi bulelela bua mu Bible bulengeja bantu kudi kutusankisha bikole. Umue musangu ngakalonga Bible ne Amada, muntu mukaji wa bidimu 69, uvua ne ka-magazen ka bintu bia dilamba nabi. Pa tshibidilu uvua usakidila bipiminu bibidi bia mâyi mu bipiminu bionso dikumi bia mabele. Nenku uvua ushima bantu bavua balua kumusumba pa kubasumbisha mabele aa a luayiyi pamutu pa tshipiminu tshijima. Kadi kunyima kua yeye mumane kulonga malu adi maleja mu mutu wa bualu wa se: ‘Bululame budi bupetesha diakalenga’ mu nshapita wa 13 wa mukanda wa Dimanya didi difikisha ku muoyo wa kashidi, Amada wakalekela bilele ebi bibi. Ngakasanka bikole pangakamumona utambula matuku makese kunyima!”

Karen: “Tshivuaku muanji kueyemena Yehowa bikole nenku peshi mumulekele wenza nanyi mudimu bu mudibi mpindieu to. Bulunda buanyi ne Yehowa budi buenda bulengela ne bukola.”

Bidi munyi buebe wewe?

Munkatshi mua bidimu bia bungi, Bantemu ba Yehowa binunu bivule mbaye kuambuluisha ku ba bende. Bamue badi benza tshidimu tshimue anyi bibidi, bakuabu badi bashalaku kashidi. Batu bayaku ne mamanya abu, bumuntu bukole bua mu nyuma ne mpetu yabu, bikale ne tshipatshila tshia kutungunuja midimu ya Bukalenge mu ditunga dia ku ba bende. Mbambuluishe mu matunga muvua bamanyishi ba Bukalenge kabayi mua kuenza bia muomumue bua dikepela dia midimu ya ku mubidi. Ba bungi mbasumbe mashinyi bua kumona mua kuyisha miaba ivua kayiyi kufika kumpala. Bakuabu, bu muvuabu basue kusombela mu bimenga, mbalue bipanda mu bisumbu mudi bakulu bakese. Kadi buobu bonso badi bajadika ne: mbapete mabenesha a mu nyuma a bungi kupita adibu bapeshe bakuabu.

Udiku mua kuya kuambuluisha pebe mu ditunga dia ku ba bende anyi? Bikala nsombelu webe mukumbane bua kuya, bua tshinyi kubenga kukonkonona bua kumona né kudi mushindu wa kuyaku? Tshidia tshia kumpala tshidi ne mushinga nkufundila filiale wa Société udi mu ditunga diudi ukeba kuya kuambuluisha. Malu masunguluke awapeta neakuambuluishe bua kujadika biudi mua kushintulula bua kukumbaja muanda eu. Udi kabidi mua kupeta ngenyi mimpe mu tshiena-bualu tshia: “Shiya ditunga dienu ne dîku dienu,” mu Tshibumba tshia Nsentedi tshia dia 15 Tshimungu 1988 (Mfual.). Bua didilongolola dimpe ne dikuatshisha dia kudi Yehowa, pamu’apa wewe pebe neupete disanka bua diya kuambuluisha mu ditunga dia ku ba bende.

[Tshimfuanyi mu dibeji 24]

TOM NE LINDA MU NJILA MUTANTSHI MULE, BATANGILE MUABA UVUA BA-SHUAR BENA INDE BASOMBELE

[Tshimfuanyi mu dibeji 25]

BANTU BA BUNGI BADI BAMBULUISHA MU QUITO, TSHIMENGA TSHIKULU TSHIA DITUNGA DIA ÉQUATEUR

[Tshimfuanyi mu dibeji 25]

MAKIKO UYISHA MU MIKUNA YA ANDES

[Tshimfuanyi mu dibeji 26]

BENA DÎKU DIA HILBIG MBENZE MUDIMU MU ÉQUATEUR BIDIMU BITANU BISHALA EBI