Bible udiku mua kutuambuluisha lelu anyi?

“PATUDI tuangata Bible mu kabujima kende, tshitupa tshimue pa lukama tshia malu adimu ke atudi mua kubala, kadi makuabu ashadi aa kaena ne mushinga ne nga kale ne kale.” Mêyi aa ngakamba nsongalume kampanda. Bavule badi mua kukuata ku tshiende. Nansha mudi Bible utungunuka ne kuikala mukanda utubu basumba bikole pa buloba bujima, bantu miliyo mivule kabena batamba kutumaku ntema ne ki mbamanye malongesha adimu nansha.

Tshikandakanda kampanda tshia mu Allemagne tshiakaleja mu nimero watshi wa mu Nowele 1996 ne: “[bungi bua] babadi ba [Bible] budi buenda bukepa bikole menemene. Mu tshikondo etshi tshidi dimanya dia bintu bifuka dienda divula ne tshidi bantu ba bungi benda balekela malu a Nzambi, bantu bavule ki mbamanye malu a mu Bible to, ne badi baamona makole bua kuumvua.” (SüddeutscheZeitung) Nkonko ivuabu bele bantu idi ijadika muanda eu. Amue makebulula mmaleje ne: bana ba bungi kabena nansha bajadike tshidi Yezu menemene to. Pavuabu bele bamue bantu nkonko, anu bungi bushadile ku tshia bibidi tshimue tshia bantu aba ke bavua mua kulonda muyuki wa mu Bible wa muana muena bitulatula ne wa muena Samalea wa muoyo muimpe.

Mukanda kampanda (Reformierte Presse) wa bena Mishonyi mu ditunga dia Suisse udi wamba ne: mu ditunga edi, bantu kabatshiena kabidi bakeba Bible bu muvuabi kumpala to. Nansha bamue batu ne Bible, batu bamulekele ukuata lupuishi mu tshitekelu tshiabu tshia mikanda. Ke mudibi mu Angleterre. Bilondeshile mandamuna a bantu bakuabu bavuabu bele nkonko, nansha mudi bavule bikale ne Bible, ba bungi menemene kabatu bamubala to.

Ku lukuabu luseke, bantu miliyo mivule pa buloba bujima badi bamona Bible wabu mushindu. Badi bamumona bu Dîyi dia Nzambi, bamuangata ne mushinga wa bungi ne bamumona muikale ubakuatshisha. Ke bua tshinyi batu bamubala pa tshibidilu. Nsongakaji kampanda wakafunda ne: “Ntu mbala nshapita umue anyi ibidi mu Bible dituku dionso. Utu unsankisha bikole be!” Bantu ba mushindu’eu batu bateya ntema mikole ku malu adi Bible ulongesha ne batumikila mibelu yende mu nsombelu wabu. Badi bitaba ne: Bible udi mua kubambuluisha mu bukua-panu ebu busaluke.

Udi wela meji kayi? Bible udiku ne mushinga mu matuku etu aa anyi? Udiku ne dikuatshisha anyi? Bible udiku mua kutuambuluisha lelu anyi?