Udi muvuluke anyi?

Uvuaku mubale ne ntema nimero ya Tshibumba tshia Nsentedi idi mishale eyi anyi? Biwikala uvua muyibale, nebikusankishe bua kuvuluka malu adi alonda aa:

◻ Ng’imue nkonko kayi idi bena Kristo babidi ne bua kudiela bangabanga ne kuela meji bua kubangilangana?

‘Ndi mujadike menemene bumuntu buende bua mu nyuma ne lulamatu luende kudi Nzambi anyi? Ndi mua kuela meji bua kusadila Nzambi matuku anyi onso a muoyo pamue ne muntu eu anyi? Tudiku bamanyangane ngikadilu anyi? Ndiku mujadike ne: netushale anu bakanyinangane anyi? Tudiku bamanyangane nsombelu wa kale ne wa mpindieu anyi?’​—15/8, dibeji 31.

◻ Ntshinyi tshivua Yezu usua kumvuija pakambilaye balongi bende ne: “Nuenu ke badi luepu lua ba pa buloba”? (Matayo 5:13, MML)

Yezu uvua usua kuamba ne: pavua bayidi bende bayisha bantu bakuabu Bukalenge bua Nzambi bivua ne bua kuikala ne bukole budi bulama ne bupandisha mioyo ya bantu aba. Bantu aba bavua batumikila miaku ya Yezu bavua mua kukubibua ku dinyanguka dia bikadilu ne dia mu nyuma mu miaba ivuabu basombele ne ivuabu basadila.​—15/8, dibeji 32.

◻ Mmunyi mudi babangilangana mua kuepuka buteyi bua tshiendenda tshia masandi?

Biwikala ne mubangila webe, epuka dikala nende nkayebe mu nsombelu idi kayiyi miakanyine. Nenku bidi mua kuikala bitambe buimpe bua kusombeshangana muaba udi bantu anyi kusombela miaba ya patoke. Nuele mikalu bua mushindu unudi ne bua kulejangana dinanga ne muntu yonso anemeke kuondo ka muoyo ka mukuabu ne bidiye umvua.​—1/9, mabeji 17, 18.

◻ Lungenyi ntshinyi?

Lungenyi mbukole budi buambuluisha bua kukonkonona bualu kampanda ne kusunguluja bitupa biabu pa kumvua diumvuangana didi pankatshi pabi ne bualu buonso bujima, ne pashishe kumvua bualu ebu. (Nsumuinu 4:1)​—15/9, dibeji 13.

◻ Ntshinyi tshidi Yehowa utulomba lelu?

Kuteleja Muanende ne kulonda tshilejilu ne malongesha ende ke tshidi Yehowa utulomba nangananga. (Matayo 16:24; 1 Petelo 2:21)​—15/9, dibeji 22.

◻ Mbanganyi badi mua kupeta ditalala?

Bu mudi Yehowa muikale “Nzambi wa ditalala,” anu bantu badi banange Nzambi ne badi banemeka bikole mêyi ende makane ke badi mua kupeta ditalala. (Lomo 15:33)​—1/10, dibeji 11.

◻ Mmunyi muvua Yosefe mupete bukole bua kubenga kuenza bualu buvua mukaji wa Potifâ umulomba ku dituku ku dituku?

Tshia kumpala, Yosefe uvua wangata malanda ende ne Yehowa ne mushinga wa bungi kupita masanka a tshitupa tshîpi. Tshibidi, nansha muvuaye kayi muinshi mua mikenji mifunda ya kudi Nzambi, Yosefe uvua kabidi ne ngumvuilu muimpe wa mêyi avua atangila bikadilu bilenga. (Genese 39:9)​—1/10, dibeji 29.

◻ Bua tshinyi kuitaba bua kubuikidila bana betu kudi ne mushinga?

Tudi mua kutekemena ne: Nzambi neatungunuke ne kutubuikidila anu bituikala basue kubuikidila bana betu. (Matayo 6:12, 14; Luka 11:4)​—15/10, dibeji 17.

◻ Mmpekatu ya mushindu kayi idibu bakuila mu Matayo 18:15-17, ne ntshinyi tshidi tshileja nanku?

Mpekatu ivua Yezu wamba ivua ne bua kuikala minene bualu ivua mua kufikisha muenji wa bibi ku diangatshibua “bu muntu wa bisamba bia bende ne bu mulambuishi wa bitadi.” Bena Yuda kabavua mua kusomba ne Bampangano to, ne bavua ne bua kuepuka balambuishi ba bitadi. Nenku Matayo 18:15-17 udi wakula bua mpekatu minene, ki mbua bilema anyi malu adi abungamija audi mua kubuikidilangana ne kupua muoyo nansha. (Matayo 18:21, 22)​—15/10, dibeji 19.

◻ Kunanga Dîyi dia Nzambi menemene kudi kumvuija tshinyi?

Kunanga Dîyi dia Nzambi kudi kufikisha muntu ku ditumikila malu adidi dilomba. (Musambu 119:97, 101, 105) Kudi kulomba muntu bua ikale misangu yonso mulongolole ngelelu wende wa meji ne nsombelu wende.​—1/11, dibeji 14.

◻ Bu mudi Yehowa mutupeshe bintu bivule, ntshinyi tshitudi mua kumupingajila (yeye Mukalenge ne Mufidi wa mapa mutambe bunene)?

Bible udi uleja ne: dipa ditambe bulenga ditudi mua kupesha Yehowa ‘mmulambu wa kumutumbisha nawu.’ (Ebelu 13:15) Bua tshinyi? Bualu mulambu eu udi utangila buludiludi dipandisha mioyo, tshipatshila tshinene tshidi natshi Yehowa mu tshikondo etshi tshia ku nshikidilu. (Yehezekele 18:23)​—1/11, dibeji 21.

◻ Ntshinyi tshivua Solomo usua kumvuija pakafundaye ne: ‘Mêyi a bena meji adi bu misongolo’? (Muambi 12:11)

Mêyi a bantu badi ne meji a kudi Nzambi adi asaka babadi anyi bateleji bua kuya kumpala biumvuangane ne mêyi a meji adibu babale anyi bumvue.​—15/11, dibeji 21.

◻ Dijingulula dia mianda dia kudi Nzambi ntshinyi?

Mbukole budi butuambuluisha bua kupatula tshidi tshimpe ne pashishe kusungula njila mulenga. Kulonga Dîyi dia Nzambi ne kuditumikila kutu kupesha muntu dijingulula dia mianda.​—15/11, dibeji 25.

◻ Ntshinyi tshitudi ne bua kupolesha natshi majitu adibu batupeshe? (1 Timote 3:1)

Tudi ne bua kuapolesha ne mmuenenu muimpe. Ki mbimpe bua muntu kuambulaye majitu mapite bungi amufikisha ne ku dijimija disanka diende mu mudimu wa Yehowa nansha. Lungenyi lua budisuile mbualu bua kuelela muntu kalumbandi, kadi udi nalu udi kabidi ne bua kuleja budipope ne ‘meji mapuekele.’ (Tito 2:12; Buakabuluibua 3:15, 16)​—1/12, dibeji 28.

◻ Mmunyi mutudi mua kukolesha bana bilenga?

Nzambi udi ubela baledi bua kuikalabu bilejilu, balunda, bantu badi bamanye mua kuyukidishangana ne kulongesha. (Dutelonome 6:6, 7)​—1/12, dibeji 32.