Malu a mu nsombelu

Kuya batangile kumpala mu njila wa Yehowa kudi kutupesha bukole ne disanka

MALONDA KUDI LUIGGI D. VALENTINO

Yehowa udi utuambila ne: “Njila wa nuenu kuyila nyeye ewu.” (Yeshaya 30:21, MMM) Katshia ngatambula kukadi mpindieu bidimu 60, ntu anu muditekele tshipatshila tshia kulonda mubelu eu. Ngakaditekela tshipatshila etshi kale bua kulonda tshilejilu tshia baledi banyi, bavua bumbuke mu ditunga dia Italie, balue kusombela mu Cleveland mu Ohio, (mu États-Unis), mu 1921. Muomu emu ke muakatukoleshilabu tuetu bana babu basatu: tutu Mike, muakunyanyi wa bakaji Lydia, ne meme.

BALEDI banyi bakabuela mu bitendelelu bia bungi, kadi bakabilekela bua malu avuabu bamonamu. Dimue dituku mu 1932, Tatu wakateleja mayisha kampanda a mu tshiena-Italie ku tshisanji. Avua mprograme wa Bantemu ba Yehowa, ne malu akumvua Tatu akamusankisha bikole. Wakabafundila mukanda, buobu kumutumina Ntemu wa Yehowa umue muena mu ditunga dia Italie uvua musombele ku Biro bidi bilombola mudimu wa Bantemu ba Yehowa pa buloba bujima, ku Brooklyn (mu New York). Pakamanaye kuyikila bikole ne baledi banyi too ne pa dindadinda, baledi banyi bakatuishibua ne: bavua bapete tshitendelelu tshilelela.

Tatu ne Mamu bakabanga kubuela mu bisangilu bia Bantemu, kutuadijabu kuakidila ne batangidi bena ngendu ku nzubu kuetu. Nansha muntshivua muana mukese, batangidi bena ngendu aba bavua bangangata nya kubafila mu mudimu wa kuyisha, ne bakampesha lungenyi lua kuenzela Yehowa mudimu wa ku dîba ne ku dîba. Umue wa kudibu uvua Carey Barber, udi mpindieu muena mu Kasumbu Kaludiki ka Bantemu ba Yehowa. Kunyima kua bidimu bikese (mu Luishi 1941), ngakatambula ne bidimu 14, ne mu 1944, ngakabanga kuenza bumpanda-njila mu tshimenga tshia Cleveland. Tutuanyi Mike ne Lydia bakabuela pabu mu njila wa bulelela bua mu Bible. Tutu Mike wakasadila Yehowa too ne ku lufu luende, ne Lydia wakaya ne bayende Harold Weidner mu mudimu wa butangidi buena-ngendu munkatshi mua bidimu 28. Lelu wa ndaya, badi basadidi ba pa buabu ba ku dîba ne ku dîba.

Buloko budi bunkolesha mu dipangadika dianyi dia kuya kumpala

Ku ntuadijilu kua 1945, bakangela mu buloko bua mu Chillicothe (Ohio) bua pakansaka kuondo kanyi ka muoyo kalongesha kudi Bible bua kulonda mêyi adi mu Yeshaya 2:4, adi akula bua kufudisha nkasu ya kudima nayi ku miele ya mvita. Kumpala, bamfumu ba buloko bavua banyishila Bantemu bua kuikala ne mikanda (yabu ya kulonga nayi Bible) mikese tshianana. Kadi, Bantemu ba mu tshisumbu tshia pabuipi apu bavua batuambuluisha bua kuyipeta. Amue matuku, bavua balua kumatshisha ndambu wa mikanda mu madimi avua pabuipi ne buloko abu. Mpindieu mu dinda pavuabu baya ne bena buloko miaba ya kuenzela mudimu, bavua bakeba mikanda ayi ne bakeba mushindu wa kubuela nayi mu buloko. Kadi tshikondo tshingakafika mu buloko, bavua bitaba bua Bantemu kuikala ne mikanda mivule. Nansha nanku, ngakamanya mua kuangata biakudia bia mu nyuma bidi Yehowa utupesha ne mushinga wa bungi, ne adi divua dilongesha dintu mvuluka musangu onso untu mpeta nimero mupiamupia wa Tshibumba tshia Nsentedi anyi Réveillez-vous!

Nansha muvuabu batuanyishile bua kuenza bisangilu bia tshisumbu mu buloko, bavua bakandike bantu bavua kabayi Bantemu bua kubuelamu. Nansha nanku, bamue banene ba buloko ne bena buloko netu bavua babuelamu mu musokoko, nunku bantu ndambu bakitaba bulelela. (Bienzedi 16:30-34) Pavua Muanetu Alexander Macmillan ulua kututangila, uvua utukankamija bikole be! Uvua anu utujadikila ne: matuku atuvua tuenza mu buloko amu kaavua a tshianana to, avua dilongesha dijima dituvua tuenda tupeta bua kulua kuenza midimu mu matuku atshivua alua kumpala. Muanetu wa balume ukavua mukulakaje eu wakalenga mutshima wanyi ne kukolesha dipangadika dianyi dia kuenda mu njila wa Yehowa.

Ndi mpeta mulunda

Pakajika Mvita Mibidi ya Buloba bujima, tuakapatuka mu buloko, meme kubangulula mudimu wa bumpanda-njila (mudimu wa ku dîba ne ku dîba). Kadi mu 1947, Tatu wakafua. Ngakabanga kuenza mudimu wa bianza ne kabidi meme kumanya mua kuenza mudimu wa kukamata babedi (anyi masaje) bua kuambuluisha dîku dietu. Mudimu eu ke wakalua kungambuluisha mu tshikondo tshikole tshiakatukuata meme ne mukajanyi kunyima kua bidimu bitue ku 30. Eyi, nkadi mutumpike muye kule ne bualu mushiye malu makuabu! Lekelayi nganji kunulondela bua mukajanyi.

Dimue dituku mu mêba a musendamu mu 1949, telefone wakadila pamvua mu Nzubu wa Bukalenge. Pangakamuteka ku ditshi, meme kumvua dîyi dilenga diamba ne: “Dîna dianyi n’Christine Genchur. Ndi Ntemu wa Yehowa. Ndi mulue munemu mu Cleveland bua kukeba mudimu, ne ndi nkeba tshisumbu tshindi mua kuikala mbuela.” Kadi nansha muvua Nzubu wetu wa Bukalenge kule ne muaba uvuaye usombela, bua muvua dîyi diende dinsankishe, ngakamuludika muaba uvua Nzubu wetu wa Bukalenge, meme kumulomba bua kulua mu Dia lumingu, dimvua mene ne bua kuenza muyuki wa patoke. Patuakafika mu Dia lumingu adi, ngakafika wa kumpala ku Nzubu wa Bukalenge, kadi tshiakamona muntu mukaji muenyi to. Pamvua ngenda ngenza muyuki, mvua ngela dîsu ku tshiibi, kadi tshiyi mmumona. Mpindieu meme e kumuela nshinga mu Dimue, yeye kungambila ne: kavua mumanye bise wa kubuela to. Ke meme kudiyila bua kumumona bua kuyikila nende bimpe.

Wakangambila ne: baledi bende bavua bumbukile mu ditunga dia Tchécoslovaquie, bavua babange kubuela mu bisangilu bia Balongi ba Bible pakabalabu mukanda wa Bafue batu penyi? (Angl.) Bakatambula mu 1935. Mu 1938, tatuende wa Christine wakalua musadidi (utudi tubikila mpindieu ne: mutangidi muludiki) wa tshisumbu tshia Bantemu ba Yehowa mu tshimenga tshia Clymer (Pennsylvanie), mu États-Unis, ne mu 1947, Christine wakatambula ne bidimu 16. Kunyima kua matuku makese, tuakanangangana ne nsongakaji eu muimpe kumona ne uvua munange malu a mu nyuma. Tuakaselangana mu dia 24 Kabalashipu 1950, ne kubangila tshikondo atshi Christine wakalua muena kuanyi wa lulamatu udi anu musue kutuma malu a Bukalenge bua Nzambi kumpala. Ndi ne dianyisha kudi Yehowa bua muvua mulunda wanyi wa tshikadilu tshimpe eu muanyishe bua kusomba nanyi.​—Nsumuinu 31:10.

Bualu bua dikema butuvua katuyi belele meji

Mu 1 Kasuabanga 1951, tuakatuadija kuenza bumpanda-njila pamue. Kunyima kua bidimu bibidi, mu mpungilu wakenzeka mu tshimenga tshia Toledo (Ohio), Muanetu Hugo Riemer ne Muanetu Albert Schroeder bakayikila ne bampanda-njila bavua ne dijinga dia kuenza mudimu wa bu-misionere. Tuvua petu munkatshi muabu. Bakatulomba bua kutungunuka ne kuenza mudimu wa bumpanda-njila mu Cleveland, kadi ngondo wakalonda, kuakenzeka bualu bua dikema butuvua katuyi belele meji to. Bavua batubikile bua kuya kubuela mu kalasa ka 23 ka Gilada (Tshilongelu tshia Bible tshia Bantemu ba Yehowa) kavua ne bua kutuadija mu Luishi 1954!

Tuvua mu mashinyi batangile ku Tshilongelu tshia Gilada tshivua musangu au mu South Lansing (mu New York), Christine kumvuaye buôwa kutuadijaye kungambila katupa ne katupa ne: “Endesha bitekete!” Ngakamba ne: “Christine wetu, tuetu batekeshe kabidi lubilu, mashinyi adi imana.” Kadi patuakafika ku Gilada, mioyo yetu ya munda yakapueka. Muanetu Nathan Knorr wakakidila tshisumbu tshietu tshia balongi ne kunyungulukaye netu bua kutuleja miaba ne miaba ya mu Gilada amu. Wakatuleja kabidi mushindu utuvua mua kulama mâyi ne nzembu, kutambaye kuleja ne: kuepuka dinyangakaja dia bintu, ntshikadilu tshia mushinga tshidi tshiambuluisha bua kutuma malu a Bukalenge kumpala. Mubelu wende eu wakashala mu mitu yetu. Tutu anu tuutumikila.

Tudi tuangata ndeke batangile mu Rio

Abidi male asatu mmîpi, tuetu kujikija kalasa ka Gilada; mu dia 10 Tshisua-munene 1954 tuetu kuangata ndeke mu muvu wa mashika (hiver) mu New York, bikale ne mioyo kulukulu bua kufika muaba mupiamupia uvuabu batutume bua kuenzela mudimu, mu tshimenga tshidi ne munya mukole tshia Rio de Janeiro (mu ditunga dia Brésil). Ba-misionere netu Peter ne mukajende Billie Carrbello bavua pabu mu luendu alu. Ndeke uvua ne bua kuenza mêba 24 mu njila, bualu uvua ne bua kuikila mu Porto Rico, mu Venezuela, ne mu Belém (ku mutu kua Brésil). Kadi, bua lutatu luvua nalu ndeke au, tuakenza mêba 36 bua tuetu kushisha kumona Rio de Janeiro. Tshimenga etshi tshiakamueneka ku mêsu tshilenga be! Miendu ya nzembu ya mu tshimenga etshi ivua ikenka anu bu mabue a mbongo avua engelela mateka pa tapi mufike, ne ngondo pende uvua ukenkesha pa mâyi a baie de Guanabara.

Bena dîku dia Betele ba bungi bavua batuindile ku tshipalu. Kunyima kua buobu bamane kutuakidila ne musangelu, bakatuambula mu mashinyi too ne ku Betele, tuakalala bu mu dîba isatu wa butuku abu. Kunyima kua mêba makese tshianana, ngonga wakatujula ku tulu, tuetu kuvuluka ne: dituku dietu dia kumpala mu bumisionere dikavua dituadije!

Dilongesha dia nzanzanza

Patutshivua tufikilaku, tuakapeta dimue dilongesha dinene. Dimue dituku dilolo tuakaya kumona dîku dikuabu dia Bantemu ba Yehowa. Patukavua tujinga kupingana ku Betele, tatu wa dîku adi wakatuambila ne: “Kanuyi to; mvula udi uloka.” Kutulombaye ne muoyo mujima bua tulale. Ngakamba ngenda nseka ne: “Mvula se utu uloka kabidi kutudi bafumine.” Tuetu kuya anu puopu apu.

Bua mikuna itu mu Rio, mâyi a mvula atu enza nkoka apueka ne lubilu matangile munda mua tshimenga, akunguilamu tente. Apa ne apa, mâyi kutukuatshilawu mu binu. Njila ya pabuipi ne Betele ivua miandamuke misulu ya muenji mukole ivua itukuatshila mu tshiadi. Tuvua babole bolabala patuakafika ku Betele. Pakatshiabu, Christine wakabanga kumvua bibi e kusamaye tifoyide (wakamutekesha munkatshi mua matuku a bungi). Tuakamona ne: bu mutuvua ba-misionere bapiabapia, tuvua mua kuikala bateleje mibelu ya Bantemu ba mu tshimenga atshi bavua batshimanye bimpe.

Malu etu a kumpala atuakenza mu mudimu wa bu-misionere ne wa buena-ngendu

Kunyima kua ntuadijilu eu uvua umueneka muikale mukole, tuakabanga kuya mu mudimu wa budimi. Tuvua tubadila muntu yonso utuvua tupeta mêyi mafunda mu tshi-Mputulukeshi, nanku tuenda tutshimanyinamu. Uvua umona muntu wambila Christine ne: “Ndi ngumvua biudi wewe wamba, kadi tshiena ngumvua bidiye wamba yeye to,” umfukuna munu. Mukuabu pende ungambila ne: “Wewe ndi ngumvua biudi wamba, kadi ki nyeye to.” Nansha nanku, tuvua ne disanka bua kumona bantu 100 benzeja abonema ya Tshibumba tshia Nsentedi mu mbingu mikese ya ntuadijilu ayi. Balongi betu ba Bible ba bungi bakabatijibua mu tshidimu tshietu tshia kumpala mu Brésil, tuetu kudianjila kumona ne: mudimu wetu wa bu-misionere uvua ne bua kupatula bipeta bilenga.

Mu bidimu bia 1950, kakuvua mutangidi wa tshijengu uvua ulua kutangila bisumbu bia bungi bia mu Brésil to. Nunku, nansha muntshivua ndonga tshi-Mputulukeshi ne tshiyi muanji kuenzaku muyuki wa patoke mu muakulu eu, bakantuma mu mudimu wa tshijengu mu São Paulo mu 1956.

Bu muvua tshisumbu tshia kumpala tshituakakumbula katshiyi tshipete dikumbula dia mutangidi wa tshijengu munkatshi mua bidimu bibidi bijima, bantu bonso bavua bashale bindile ne mioyo kulukulu bua kumvua muyuki wa patoke. Ngakalongolola muyuki au nunku: ngakakosa bikoso bia mu biena-bualu bia Tshibumba tshia Nsentedi tshia mu tshi-Mputulukeshi, meme kubilamika pa mabeji. Dia lumingu adi, bantu bavua bûle tente mu Nzubu wa Bukalenge. Bantu bavua basombe too ne kumpala, bindile bua kumona bualu bunene buvua ne bua kuenzeka. Muyuki au, tuambe mene ne: dibala adi, e kutuadija. Diakamue mu minite mikese, ngakakema bualu muntu nansha umue kavua unyunga, too ne bana. Buonso buabu bavua batonone mêsu bantangile. Meme kudiambila mundamunda ne: ‘Valentino wa mamu, wamanyi kuakula tshi-Mputulukeshi, kujike! Tangila mudi bantu bashale bakuteleje.’ Kadi pangakakumbula kabidi tshisumbu atshi bidimu biakalonda, muanetu wa balume mukuabu uvuaku mu dikumbula dia kumpala wakamba ne: “Udi muvuluke muyuki uwakenza au anyi? Katuvua bumvue tshintu nansha tshimue to.” Ngakamujadikila ne: nansha meme panyi tshivua mumvue tshia nsongo mu muyuki au to.

Mu tshidimu tshia kumpala mu mudimu wa tshijengu au, mvua ntamba kubala Zekâya 4:6. Miaku eyi: ‘Kabiena bua bukole, kadi mbua nyuma wanyi,’ avua amvuluija ne: nyuma wa Yehowa ke tshintu tshimu’epele tshivua tshitumisha mudimu wa Bukalenge kumpala. Ne mudimu eu wakaya kumpala bulelela nansha mutuvua ne amue malu avua matukolele bua kukumbaja.

Ntatu ne masanka bia mu njila

Mudimu wa tshijengu uvua utulomba kuenza ngendu mu ditunga adi katuyi tushiya ni mmashinyi a mikanda, ni nturton tua mikanda, nansha bibuta bia bilamba ne bia ku bianza. Christine uvua ubala bungi bua bintu bituvua nabi bua katuyi kupua tshintu nansha tshimue muoyo patuvua tupatuka mu bise tubuela mu mukuabu. Tuvua bibidile bua kuenza luendu ne bise mêba 15 mu njila ya lupuishi bua kufika kutuvua tuya. Mikuabu misangu, bivua bienza buôwa, nangananga pavua bise ibidi isangila mu ka-tshilamba, ivua ipitangana kakuyi nansha kaba ka kankenene kupitshila to. Tuvua kabidi tuenza ngendu ne kawulu ne mazuwa a mâyi ne pa kabalu.

Mu 1961 tuakabanga kuenza mudimu wa distrike, tumbuka mu etshi tshijengu tuya mu tshikuabu pa mutu pa kumbuka mu tshisumbu kuya mu tshikuabu. Matuku a bungi ku dilolo mu lumingu luonso, tuvua tuleja filme mipatula kudi Bantemu ba Yehowa, lelu tulejila mu eu nzubu, didi dilua tulejila mu mukuabu. Pa tshibidilu, tuvua tudianjila kukeba bua kumanya tshituvua ne bua kuenza ne lukasa bualu balombodi ba bitendelelu bavua bakeba kutunyangila malu. Mene mu tshimenga tshikuabu, mudiambike kampanda wakenzeja muntu ukavua mutuitabile nzubu wende bua kutubengelaye. Kunyima kua matuku, tuakakeba nzubu mukuabu, tuetu kumupeta; kadi katuakambila muntu nansha umue to, tuakatungunuka anu ne kubikidila bantu ku nzubu uvuabu batubengele au. Kumpala kua kutuadija, Christine wakaya ku nzubu au, kuangataye bavua balue bua kumona filme lukasa, kuluaye nabu ku nzubu mukuabu utuvua bapete au. Dilolo adi, bantu 150 bakamona filme uvua ne tshiena-bualu tshivua tshikumbanyine bualu butuvua benze abu menemene: La Société du Monde Nouveau en action.

Nansha muvua mudimu wa ngendu mu miaba ya kulekule muikale mukole minga misangu, bana betu bena budipuekeshi bavua basombele miaba ayi bavua ne dianyisha dia bungi bua mutuvua tuya kubatangila, ne bavua batuakidila bimpe ku nzubu yabu. Tuvua anu tuela Yehowa tuasakidila bua mutuvua tusomba nabu. Kusomba ne balunda betu aba kuakatupesha masanka a bungi. (Nsumuinu 19:17; Hagai 2:7) Kadi ndibungama bungipu kayi dituvua nadi pakajika mudimu wetu wa bu-misionere kunyima kua tuetu bamane kuenza bidimu 21!

Yehowa udi utuleja njila mu dikenga

Bakapanda Christine mu 1975. Tuakabangulula mudimu wa ngendu, kadi kusama kua Christine kuakakola. Bivua bikengela bua yeye kupingana mu États-Unis bua kumuondapabu. Mu Tshisanga 1976, tuakafika mu tshimenga tshia Long Beach (Californie) mutuakashala basombe ne Mamu. Bu mutuvua benze bidimu bitue ku 20 mu ditunga dia kuabende, tuakimana mukolo mule ne muîpi bapange tshia kuenza patuakapingana. Ngakabanga kukamata babedi, nunku makuta amvua mpeta ku mudimu eu akatuambuluisha. Mbulamatadi wa ditunga dia Californie wakapesha Christine muaba mu lupitadi, kadi uvua wenda uteketa bikole ku dituku dionso mu lupitadi alu bualu ba-doktere bavua babenga bua kumuondapa tshianana kakuyi dimuela mashi. Biakatukolela, kadi tuakalomba Yehowa diambuluisha.

Dimue dituku mu mêba a mapingaja pamvua muye kuyisha, ngakamona biro bia doktere mukuabu nunku, muoyo kungambilawu diakamue bua kubuelamu. Nansha mukavua doktere au usua kupingana ku nzubu, wakanyisha bua meme kubuela mu biro biende, tuetu kuyikila munkatshi mua mêba abidi majima. Pashishe e kuambaye ne: “Ndi nganyisha mudimu wenu wa bu-misionere, ndi nguondapa mukajebe kuyi umfuta ne tshiyi mmuela nansha mashi to.” Tshivua mua kuitaba to!

Doktere wa muoyo muimpe uvua mumanyi mupiluke eu, wakatuma Christine mu lupitadi muvuaye wondapa, kuenzaye muende muonso, Christine kumvuaye bimpe. Ndianyisha bungipu kayi dituvua nadi kudi Yehowa bua muvuaye mutuleje njila mu tshikondo tshikole atshi!

Tudi tupeta midimu mikuabu

Pakumvua Christine bimpe, tuakenza bumpanda-njila ne tuvua ne disanka dia kuambuluisha bantu ba bungi mu Long Beach bua kuluabu batendeledi ba Yehowa. Mu 1982, bakatulomba bua kuenza mudimu wa butangidi bua tshijengu mu États-Unis. Tuvua tuela Yehowa tuasakidila dituku dionso bua muvuaye mututume kabidi mu mudimu wa bena ngendu, mudimu umvua munange bikole. Tuakaya mu Californie ne pashishe mu Nouvelle-Angleterre, muvua bimue bisumbu bia tshi-Mputulukeshi mu tshijengu tshituvua. Kunyima kua matuku, tshijengu etshi tshiakafika too ne mu bidiila bia Bermudes.

Panyima pa bidimu binayi bia mudimu mulenga abi, bakatupa mudimu mukuabu. Bakatulomba bua kuenza mudimu wa bumpanda-njila bua pa buabu muaba wonso utuvua basue. Nansha muvuabi bitutonde bua kulekela mudimu wa bena ngendu au, tuvua bapangadike bua kuya kumpala ne mudimu mupiamupia uvuabu batupeshe. Kadi mpenyi? Patuvua mu mudimu wa bena ngendu, ngakamona ne: tshimue Tshisumbu tshia tshi-Mputulukeshi tshivua mu tshimenga tshia New Bedford (Massachussetts) tshivua dijinga ne diambuluisha, nunku tuetu kuya mu New Bedford amu.

Patuakafika, tshisumbu tshiakenza fete munene wa kutuakidila nende. Tuakamona bulelela ne: bavua batunange bikole! Tuakapuekesha ne binsonji. Muanetu mukuabu wa balume ne mukajende (batshivua bansonga ne bana babu babidi) bakatuteka ku nzubu kuabu too ne patuakapeta wetu nzubu wa kusombela. Yehowa wakabenesha mudimu wa bumpanda-njila bua pa buabu eu kupita mutuvua tuela meji. Katshia mu 1986 tudi bambuluishe bantu batue ku 40 bua kuluabu Bantemu ba Yehowa mu tshimenga etshi. Buobu aba ke dîku dietu dia mu nyuma. Mvua kabidi ne disanka dia kuambuluisha bana betu ba balume batanu bua kukolabu kulua balami balenga ba mikoko. Mbilue anu bu se: tudi tuenza mudimu wa bu-misionere udi upatula bipeta bia bungi.

Patudi tuela dîsu kunyima, tudi ne disanka bua mutudi basadile Yehowa katshia ku buana buetu ne bavuije bulelela njila wetu wa muoyo. Nansha mudi bukulakaje ne tusamasama bitutatshisha mpindieu, kuya kumpala mu njila wa Yehowa kutshidi anu kuenda kutupesha disanka ne bukole.

[Tshimfuanyi mu dibeji 26]

Patutshivua tufikilaku mu Rio de Janeiro

[Tshimfuanyi mu dibeji 28]

Dîku dietu dia mu nyuma dia mu New Bedford (Massachusetts)