Dilama mêsu ne muoyo bitangija ku difutu

ANU BU MUDIBI BILONDA KUDI EDITH MICHAEL

Ku ntuadijilu wa bidimu bia 1930, tuvua basombele pabuipi ne tshimenga tshia St. Louis, mu Missouri, mu États-Unis, pakatukumbula umue wa ku Bantemu ba Yehowa. Anu pamu’apu nshinga wa bilamba e kutukaye, bilamba bitoke biengelela bia mamu kukuluka mu bitotshi. [Mamu] wakitaba mikanda yakamulejabu, amu bua mukaji’au kuyaye, wakayiteka mu kabadi, e kuyipuaye muoyo.

BIVUA bidimu bia nsombelu wa mpetu mukole, ne tatu kavua ku mudimu to. Dimue dituku wakebeja né kuvua tshintu tshia kubala mu nzubu. Mamu wakamuambila bua mikanda ayi. Wakatuadija diyibala, ne kunyima kua mutantshi kampanda wakatua tshikemu ne: “Mua bana, ke bulelela ebu!”

“O, ntshitendelelu patshi tshidi tshikeba mfranga amu bu bikuabu bionso bia kudibi,” ke muakandamuna mamu. Nansha nanku, tatu wakamukankamija bua kusomba ne kubala nende mvese pamue. Pakayibalaye, yeye pende wakatuishibua. Pashishe bakatuadija kukeba Bantemu ne bakajingulula se: bavua badisangishila mu nzubu kampanda wa difutshila pabuipi ne mu St. Louis, nzubu uvua mutumika nende kabidi bua maja ne makuabu malu.

Tatu ne mamu bakaya nanyi​—mvua ne bidimu bu bisatu—​ne bakamona nzubu, kadi maja atshivua atungunuka. Tatu wakamanya dîba divua bisangilu bienzeka, ne tuakakupingana pashishe. Tuakabanga kabidi kubuela mu dilonga dia Bible dia ku lumingu pabuipi ne muaba utuvua basombele. Divua dienzekela kua mukaji uvua mulue kutukumbula musangu wa kumpala. “Bua tshinyi kanuena nulua ne bana benu ba balume pabu?” ke muakebeja mukaji’au. Mamu uvua ne bundu bua kuamba ne: kabavua ne bisabata. Kadi pakaluaye kumuambila ndekelu wa bionso, bakatupesha bisabata, ne bana betu ba balume bakabanga kulua mu bisangilu pamue netu.

Bakapesha mamu teritware wa kuyisha pabuipi ne kumbelu, ne wakabanga mudimu wa ku nzubu ne ku nzubu. Mvua nya nende, nsokoma panyima pende. Kumpala kua yeye kulonga mua kuendesha mashinyi, tuvua tuenda ku makasa mutantshi mupite wa kilometre umue bua kupeta bise uvua uya netu mu bisangilu mu St. Louis. Nansha pavuaku mabue a mashika ne neje, katuvua tupangila bisangilu nansha.

Mu 1934, mamu ne tatu bakabatijibua. Meme panyi mvua musue kubatijibua, ne ngakatungunuka ne kulomba too ne pakebeja mamu Ntemu mukulumpe kampanda bua kuyukila nanyi pa muanda eu. Wakela nkonko mivule mu mushindu umvua mua kuyumvua bimpe. Pashishe wakambila baledi banyi ne: kabavua mua kumpumbisha bua kubatijibua; bivua mua kunyanga dikola dianyi dia mu nyuma. Nenku ngakabatijibua tshidimu tshiakalonda, pantshivua ne bidimu bisambombo.

Mvua munange kakanda ka Home and Happiness, kamvua naku dîba dionso, mvua mene nkateka muinshi mua musamu wanyi pamvua ndala. Misangu ne misangu, mvua ndomba mamu bua kukambadila, too ne pangakakamanya ku muoyo. Panyima paku pavua tshimfuanyi tshia muana wa bakaji mukese mu Mparadizu ne ntambue. Mvua ngamba ne: mvua muana wa bakaji mukese au. Tshimfuanyi atshi ntshingambuluishe bua kulama mêsu anyi matangija ku difutu dia muoyo mu bulongolodi bupiabupia bua Nzambi.

Mvua muena lumamamama lukole, kadi nansha mumvua ne bua kuzakala, mvua amu ngandamuna ku nkonko miela mu Dilonga dia Tshibumba tshia Nsentedi mu tshisumbu.

Bia dibungama, tatu uvua utshina bua kujimija mudimu wende, nunku wakalekela kudisanga ne Bantemu. Ke muakenza kabidi bana betu ba balume.

Mudimu wa ku dîba ne ku dîba

Mamu uvua ulomba bampanda-njila, anyi ba-ministre ba ku dîba ne ku dîba, bua kushiya mashinyi abu kumfundu kua nzubu, ne kunyima kua kalasa mvua ndisanga nabu mu mudimu. Katupa kîpi kunyima ngakasua bua kupanda njila, kadi tatu wakabenga bualu ebu, wela meji ne: mvua ne bua kutungunuka ne kulonga malonga a ku mubidi. Ndekelu wa malu, mamu wakamutuisha bua kunganyishila bua kupanda njila. Nenku mu Kabalashipu 1943, pamvua ne bidimu 14, ngakabanga mudimu wa ku dîba ne ku dîba. Bua kuambuluisha ku ditula makuta dia dîku, mvua ngenza mudimu wa ku mubidi wa tshitupa tshia dituku, ne imue misangu mvua ngenza mudimu wa mêba mavule. Nansha nanku mvua nkumbaja tshipatshila tshia ku ngondo tshia mêba 150 mu mudimu wa buambi.

Kunyima ngakapeta nyânà mpanda-njila, Dorothy Craden, uvua mubange mudimu wa bumpanda-njila mu Tshiongo 1943, pavuaye ne bidimu 17. Kumpala uvua muena Katolike mudifile, kadi kunyima kua ngondo isambombo ya dilonga Bible, wakabatijibua. Munkatshi mua bidimu bivule tuvua mpokolo wa dikankamijangana ne dikoleshangana mu mikolo kudi umue ne mukuabu. Tuakalua kulamatangana bikole kupita too ne bana ba muntu.

Kutuadija mu 1945, tuakapanda njila pamue mu bimenga bikese bia mu Missouri muvua kamuyi bisumbu. Tuakakaja nzubu wa bisangilu mu Bowling Green; mamu wakalua kutuambuluisha. Pashishe tuakakumbula nzubu yonso mu tshimenga ne tuvua tulomba bantu bua kulua mu muyuki wa patoke utuvua tulongolola bua bana betu ba balume ba ku St. Louis balua kuenza. Babuedi ba mu bisangilu ku lumingu bavua pankatshi pa 40 ne 50. Kunyima tuakenza bia mumue mu Louisiana, mutuakafutshila nzubu wa nsangilu wa bibaki ba nzubu badikadile. Bua kukumbaja makuta a difutshila nzubu eyi, tuvua tuteka tushete tua mapa, ne lumingu luonso tuvua tufuta mfranga yonso milomba.

Pashishe tuakaya ku Mexico, Missouri, kutuakafutshila nzubu muikale ne magazen. Tuakamuakaja bua tshisumbu tshikese tshivuamu kutumikatshi nende. Nzubu eu uvua ne bibambalu bikuabu, mutuakasombela. Tuakenza kabidi bua miyuki ya patoke kuenzekayi ku Mexico. Kunyima tuakaya ku tshimenga tshinene, Tshimenga tshia Jefferson, kutuvua dituku dionso dia mudimu tupetangana ne banene ba mbulamatadi mu biro biabu. Tuvua basombele mu tshibambalu tshia kulu kua Nzubu wa Bukalenge ne Stella Willie, uvua bu mamuetu.

Tumbukaku busatu buetu bonso tuakaya ku bimenga bia Festus ne Crystal City, bivua pamue. Tuvua basombele mu tshivua kumpala tshilaminu tshia nzolo kumfundu kua nzubu wa dîku kampanda dia basankididi kansanga. Bu muvuaku kakuyi muntu mulume, tuvua tulombola bisangilu bionso. Bu mudimu wa tshitupa tshia dituku, tuvua tupanyisha bilabu. Tuvua ne bikese bia ku mubidi. Bushuwa, katuvua tukumbana bua kutelesha bisabata bietu bivua bitubukangane, nunku dinda dionso tuvua tuelamu tutupa tua turton, ne butuku tuvua muntu ne muntu tusukula nkanzu wende umuepele [uvuaye nende].

Ku ntuadijilu wa 1948, pamvua ne bidimu 19, Dorothy ne meme tuakapeta dibikila mu kalasa ka 12 ka ba-misionere ka Tshilongelu tshia Bible tshia Watchtower tshia Gilada. Kunyima kua dilonga dia ngondo itanu, balongi lukama bonso bakapeta mapolome mu dia 6 Luishi 1949. Tshivua tshikondo tshia musangelu muvulavulayi. Baledi banyi bakavua basombele ku Californie, ne mamu wakalua bua kuikalaku pende.

Batangile ku mudimu wetu

Bena mapolome 28 bakatumibua ku Italie​—basambombo, kusangisha ne Dorothy ne meme, ku tshimenga tshia Milan. Mu dia 4 Luabanya 1949, tuakumbuka ku New York kubuela ku buatu bua bena Italie bua Vulcania. Luendu luakangata matuku 11, ne mbuu mitomboke yakasamisha ba bungi ba ku tuetu. Muanetu Benanti wakalua ku dibungu dia mazuwa dia Gênes bua kutuakidila ne kuya netu ku Milan ku kawulu.

Patuakafika ku nzubu wa ba-misionere ku Milan, tuakasangana bilongo bivua nsonga mukaji kampanda muena Italie muteke mu tshionso tshia ku bibambalu bietu. Bidimu kunyima, muana wa bakaji eu, Maria Merafina, wakaya ku Gilada, kupingana ku Italie, ne yeye ne meme tuakasadila pamue mu nzubu wa ba-misionere!

Dinda diakalonda difika dietu ku Milan, tuakatangidila pa dididishi dia tshiowedi. Kuvua nzubu munene wa bisasa bivule muela bombe mu balabala uvua kumfundu. Ku mpukapuka ndeke muedi wa bombe wa bena Amerike wakamatshisha bombe buakashipa mêku onso 80 avua masombelamu. Dîba dikuabu, bombe mielela ditanda kampanda yakadipangila e kuya pa tshilongelu kansanga ne kushipa bana 500. Nanku bantu kabavua basue bena Amerike to.

Mvita ivua mitondeshe bantu. Bavule bavua bamba ne: bu mvita mikuabu mua kutuadija, kabavua mua kuya mu nzubu ya dikubibua ku bombe kadi bavua ne bua kushala ku mabu ne kutemesha gaze ne kufua. Tuakabashindikila ne: tuvua balue bu baleji-mpala, ki mba États-Unis anyi ba mbulamatadi mukuabu kayi yonso wa bantu, kadi ba Bukalenge bua Nzambi, bualua kujikija mvita yonso ne makenga adiyi ituala.

Mu tshimenga tshinene tshia Milan etshi, amu tshisumbu tshimue tshia bantu bu 20 tshivua tshidisangisha mu nzubu wa ba-misionere. Kakuvua kuanji kuikala teritware ya kuyisha milongolola, nenku tuakatuadija kumanyisha mu nzubu munene wa bisasa bivule. Ku tshiibi tshia kumpala, tuakapeta Mukalenge Giandinotti, uvua musue bua mukajende umbuke mu ekleziya, nenku wakitaba umue wa ku mikanda yetu. Inabanza Giandinotti uvua mukaji muena bululame, muule ne nkonko. “Nensanke panualonga tshiena-Italie,” ke muakambaye, “apu nudi mua kundongesha Bible.”

Tshisasa tshivua mu nzubu wabu tshivua mulu mule ne bukenke buvua bukese, nenku butuku uvua uteka nkuasa pa mesa bua kuikala pabuipi ne bukenke bua kubala Bible. “Bingalonga nenu Bible,” ke muakebejaye, “ndi mua kutungunuka ne kuya mu ekleziya anyi?” Tuakamuambila ne: bivua bimutangila nkayende. Uvua uya mu ekleziya Dia lumingu dionso mu dinda ne mu mapingaja ulua mu bisangilu bietu. Kadi dimue dituku wakamba ne: “Tshiena nya kabidi mu ekleziya.”

“Bua tshinyi?” ke mutuakebeja.

“Bualu kabena balongesha Bible to, ne ndi mupete bulelela mu dilonga nenu Bible.” Wakabatijibua ne wakalonga ne bakaji bavule bavua baya mu ekleziya dituku dionso. Kunyima wakatuambila ne: bu tuetu bamuambile bua kayi mu ekleziya, uvua ne bua kuikala muimanyike dilonga ne bumue kavua mua kulonga bulelela musangu nansha umue.

Midimu mipiamipia

Pashishe Dorothy ne meme, pamue ne bakuabu ba-misionere banayi, tuakatumibua ku tshimenga tshia Italie tshia Trieste, tshivua tshikondo atshi tshilama kudi basalayi ba Angleterre ne ba Amerike. Kuvua amu Bantemu batue ku dikumi, kadi bungi ebu buakavula. Tuakayisha mu Trieste bidimu bisatu, ne patuakumbuka, muvua bamanyishi ba Bukalenge 40, ba kudibu 10 bavua bampanda-njila.

Mudimu wetu wakalonda uvua mu tshimenga tshia Vérone, muvua kamuyi tshisumbu. Kadi pakasuyibua bamfumu ba mbulamatadi kudi ekleziya, bakatuenzeja bua kumbuka. Dorothy ne meme tuakatumibua ku Rome. Tuakafutshilaku tshibambalu tshivua ne bintu bivule munda, ne tuakatumika mu teritware uvua pamue ne Vatican. Patutshivuaku ke pakaya Dorothy ku Liban bua kusedibua kudi John Chimiklis. Tuvua pamue munkatshi mua bidimu bitue ku 12, ne ngakamudila bikole.

Mu 1955 kuakapeteka nzubu mupiamupia wa ba-misionere mu tshikuabu tshitupa tshia Rome mu balabala muinyika ne: Tshibeba Tshipiatshipia tshia Appius. Umue wa ku banayi bàvuà mu nzubu eu uvua Maria Merafina, muana wa bakaji wakateka bilongo mu bibambalu bietu butuku patuakafika ku Milan. Tshisumbu tshipiatshipia tshiakenjibua mu tshitupa tshia tshimenga etshi. Kunyima kua mpuilu wa bukua-matunga wa ku Rome tshidimu atshi, mvua ne muabi wa kubuela mu mpuilu ku Nuremberg, mu Allemagne. Ndivuayilapu kayi pa kupetangana ne aba bavua bananukile bikole mu bukokeshi bua Hitler!

Dialukila ku États-Unis

Mu 1956, bua ntatu ya makanda a mubidi, ngakapeta dianyisha bua kupingana ku États-Unis. Kadi tshiakumbusha mêsu anyi pa difutu dia kusadila Yehowa mpindieu ne bua kashidi mu bulongolodi bupiabupia. Mvua ndilongolola bua kualukila ku Italie. Kadi, ngakapetangana ne Orville Michael, uvua usadila ku bilombuelu bia buloba bujima bia Bantemu ba Yehowa ku Brooklyn, mu New York. Tuakaselangana mu 1958 kunyima kua mpuilu wa bukua-matunga mu New York City.

Katupa kîpi kunyima tuakaya ku Front Royal, mu Virginie, kutuakenzela mudimu ne tshisumbu tshikese kampanda. Tuvua basombele mu nzubu mukese kumfundu kua Nzubu wa Bukalenge. Ku ndekelu kua bionso, mu Luabanya 1960 dikengedibua diakamueneka bua kupingana ku Brooklyn bua kupeta mudimu wa ku mubidi bua kufuta mabanza etu. Tuvua tuenza mudimu butuku mu ma-banke bua ne tushala mu mudimu wa ku dîba ne ku dîba.

Patutshivua ku Brooklyn, tatuanyi wakafua, ne mamuende wa bayanyi wakapeta ndambu wa mpalù. Nunku tuakapangadika bua kuya ku Oregon pabuipi ne bamamuetu. Bubidi buetu tuakapeta mudimu wa ku mubidi wa tshitupa tshia dituku ne tuetu kutungunukilaku ne mudimu wa ku dîba ne ku dîba. Mu muvu wa automne mu 1964, tuetu ne bamamuetu tuakapatuka mu ditunga bua kuya kubuela mu tshisangilu tshia ku tshidimu tshia Watch Tower Bible and Tract Society ku Pittsburgh, mu Pennsylvanie.

Patuvua tukumbula Tshidiila tshia Rhode, tuakakankamijibua kudi mutangidi wa tshijengu kampanda, Arlen Meier, ne mukajende bua kuya ku tshimenga tshia mpuila-mambu, Providence, kuvua dijinga dinene dia bamanyishi ba Bukalenge. Bamamuetu bakatubela bua kuitabija mudimu mupiamupia eu, nunku diakamue mu dipingana ku Oregon, tuakapanyisha bintu bivule bia mu nzubu ne tuakumbuka.

Tshiakabidi ku Tshilongelu tshia Gilada

Mu muvu wa été mu 1965, tuakabuela mu mpuilu mu Yankee Stadium. Tuakalomba bua kuya ku Tshilongelu tshia Gilada bu bena dibaka. Ngondo bu umue kunyima, tuakakema pa kupeta formilere, ìvuà ne tshia kupingajibua mu matuku 30. Mvua ngelangana meji bua kuya ku ditunga dia kule bu muvua mamu kayi ne mubidi muimpe. Kadi wakankankamija ne: “Uuja formilere ayi. Umanye se: udi ne bua kuitaba disanka dia mudimu dionso didi Yehowa ukupesha!”

Bualu buakakoseka. Tuakuuja formilere ne tuakayituma. Ndikemeshibuapu kayi pakatubikilabu mu kalasa ka 42, kakabanga mu dia 25 Tshisanga 1966! Tshilongelu tshia Gilada tshivua mpindieu ku Brooklyn, mu New York. Kunyima kua ngondo mishadile ku itanu pashishe, 106 ba ku tuetu bakapeta mapolome mu dia 11 Kabitende 1966.

Mudimu ku Argentine

Matuku abidi kunyima kua ditela, tuvua mu njila batangile ku Argentine ku ndeke wa bena Pérou. Patuakafika ku Buenos Aires, mutangidi wa filiale, Charles Eisenhower, wakatuakidila ku tshipalu. Wakatuambuluisha bua kupita bimpe bena midimu ya mbulamatadi ne pashishe kuya netu ku filiale. Tuvua ne dituku dimue bua kusulula mabuki etu ne kulongolola bintu; pashishe ke tuetu kutuadija kalasa ka tshiena-Espagne. Bua ngondo wa kumpala, tuakalonga tshiena-Espagne mêba 11 ku dituku. Ngondo muibidi, tuakalonga muakulu’eu mêba anayi ku dituku ne kutuadija kuya mu mudimu wa budimi.

Tuakenza ku Buenos Aires ngondo itanu ne pashishe buobu kututuma ku Rosario, tshimenga tshinene ku nord [ne udi wenza] mêba bu anayi ku kawulu [bua kukufika]. Kunyima kua tuetu bamane kusadilaku ngondo 15, bakatutuma kule menemene ku nord ku Santiago del Estero, tshimenga tshidi mu provense wa luya lua tshipela. Patutshivuaku, mu Tshiongo 1973, mamuanyi wakafua. Tshivua mumumone munkatshi mua bidimu binayi. Tshiakankuatshisha mu kanyinganyinga kanyi nditekemena dilelela dia dibiishibua kabidi ne dimanya dia se: mvua nsadila muaba uvua mamu musue ne ngikale.​—Yone 5:28, 29; Bienzedi 24:15.

Ku Santiago del Estero bantu bavua bena ngikadilu wa bulunda, ne kubanga malonga a Bible kuvua kupepele. Patuakakufika mu 1968, kuvua babuedi ba mu bisangilu batue ku 20 anyi 30, kadi bidimu muanda-mukulu pashishe bavua bapita pa lukama mu tshisumbu tshietu. Kusangisha apu, kuvua bisumbu bibidi bipiabipia ne bamanyishi pankatshi pa 25 ne 50 mu bimenga bia pabuipi.

Dipingana tshiakabidi ku États-Unis

Bua ntatu ya makanda a mubidi, mu 1976 bakatutuma ku États-Unis bu bampanda-njila ba pa buabu​—ku Fayetteville, mu Caroline wa ku Nord. Kuvua bakudi ba tshiena-Espagne bavule ba ku Amerike wa Pankatshi ne wa ku Sud, République Dominicaine, Porto Rico, ne Espagne muine. Tuakapeta malonga a Bible mavule, ne kunyima tshisumbu tshia tshiena-Espagne tshiakatuadija. Tuakapitshisha bidimu bitue ku muanda-mukulu mu mudimu’eu.

Kadi, tuvua dijinga ne kuikala pabuipi ne mamuenanyi, ukavua mukulakaje bikole ne mupange bukole. Uvua musombele ku Portland, mu Oregon, nunku tuakatumibua mu tshisumbu tshia tshiena-Espagne ku Vancouver, mu Washington, kuvua kakuyi mutantshi mule ne Portland. Tshisumbu tshivua tshikese patuakafikaku mu Tshisua-munene 1983, kadi mpindieu tudi tumona bapiabapia bavule.

Mu Kabalashipu 1996, ngakakumbaja bidimu 53 mu mudimu wa ku dîba ne ku dîba, ne bayanyi wakakumbaja bidimu 55 mu dia 1 Tshiongo 1996. Munkatshi mua bidimu bivule ebi, mvua ne muabi wa kuambuluisha nkama ya bantu bua kufika ku dimanya dia bulelela bua Dîyi dia Nzambi ne kulambula Yehowa mioyo yabu. Bavule ba kudibu mpindieu badi basadila bu bakulu ne ba-ministre ba ku dîba ne ku dîba.

Imue misangu batu bangebeja né tshitu ngumvua bibi bua dipanga kuikala ne bana. Bulelela budi se: Yehowa mmumbeneshe ne bana ne bikulu ba bungi ba mu nyuma. Eyowa, nsombelu wanyi udi wa bubanji ne mmuule ne mudimu wa Yehowa. Ndi mua kuakula bua muana wa bakaji wa Yafete, wakapitshisha muoyo wende mu mudimu wa mu ntempelo ne kayi mupete bana bua disanka diende dia mudimu dinene.​—Balumbuluishi 11:38-40.

Ntshidi mvuluka pamvua nditshipilaku kudi Yehowa pantshivua anu muana mukese wa bakaji. Tshimfuanyi tshia Mparadizu tshitshidi’amu tshimpe mu lungenyi luanyi mpindieu amu bu mu tshikondo atshi. Mêsu anyi ne muoyo wanyi bitshidi’amu bitangija ku difutu dia muoyo ukêna ndekelu mu bulongolodi bupiabupia bua Nzambi. Eyowa, dijinga dianyi didi dia kusadila Yehowa, ki mbua bidimu bitue ku 50, kadi bua kashidi​—muinshi mua bukokeshi bua Bukalenge buende.

[Tshimfuanyi mu dibeji 23]

Dorothy Craden, ne bianza pa makaya anyi, ne binetu bampanda-njila mu 1943

[Tshimfuanyi mu dibeji 23]

Ku Rome, mu Italie, ne binanyi ba-misionere mu 1953

[Tshimfuanyi mu dibeji 25]

Ne bayanyi