Ikala umona malu mushindu udi Nzambi uamona

MU NEW YORK (États-Unis), dia matuku 14 a ngondo wa tshitema, tshidimu tshia 2002 divua dituku dia luya ne munya mukole. Dituku adi, musumba wa bantu 6 521 ba matunga mashilashilangane bakatuilangana ku Muaba wa Tulasa tua ku Patterson ne ku bibambalu bikuabu bibidi bia Bantemu ba Yehowa bia mu tshitupa atshi. Bantu aba bakasangila bua kudimuena muvua balongi ba kalasa ka 113 ka Gilada (Tshilongelu tshia Bible tshia Watchtower) bangata mapoloma abu. Balongi bavua bafumine mu matunga 14 aba bavua bapitshishe ngondo itanu bulubulu mishale badilongolola bua mudimu wa bu-misionere mu matunga 19 avuabu ne bua kubatuma.

Muanetu Carey Barber (umue wa mu Kasumbu Kaludiki ka Bantemu ba Yehowa ukadi ne bidimu bitue ku 98) ke uvua mulombodi wa programe wa tshibilu etshi. Wakaleja bumpianyi bua bidimu bitue ku 60 bua mu Kalasa ka Gilada kadi kambuluishe binunu bia bantu bua kutuadijabu mudimu wa bu-misionere. Muanetu Barber wakamba ne: “Katuena tunekesha patudi tuamba ne: bipeta bitambe buimpe mbifumine ku malu makuabu adibu balonge mu kalasa aka to. Bua kulonda bualu pa bualu, bena bupuekele binunu nkama ne nkama mu buloba bujima mbafike ku didilambula kudi Yehowa ne ku dibuela mu ntendelelu wende mulelela e kubanga ne mudimu wa tshijila bua pavuabu babakuatshishe ne dilongesha kudi bana betu bavua balonge bu-misionere.”

Kumpala kua kubuela mu Gilada, balongi bavule bakavua baleje dijinga diabu dia kualabaja mudimu wabu wa diyisha. Bana betu kampanda (mulume ne mukajende) bakenza tshidimu ne matuku pa mutu balonga anu muakulu wa Mandarin (wa mu Chine) bua kumonabu mua kuambuluisha bantu ba bungi menemene ba tshimue tshisa tshia mu ditunga dia Chine bavua mu musoko wabu mu ditunga dia Canada. Bena dibaka bakuabu kabidi bakabanga kudilongela nkayabu tshiena-Albanie, pashishe kuyabu kasombela ne mu ditunga mene dia Albanie bua kukumbajila benamu dijinga divuabu benda bapeta dia kumanya Bible. Bakuabu bavua mu kalasa ka Gilada aka bavua bafumine mu ditunga dia Hongrie, dia Guatemala, ne mu République Dominicaine: matunga avuabu baye kusombela bua kusadila miaba ivua bantu dijinga dikole ne balongeshi ba Dîyi dia Nzambi.

Pashishe kumpala kua balongi aba bonso kuyabu mu midimu miaba ivuabu babatume mu Afrike, ku Mputu wa ku Est, mu Amerike wa Munkatshi ne wa ku Sud, ne mu matunga a mu Asia wa ku Est, bakabakankamija bua kuteka Nzambi kumpala mu malu onso ikalabu benza.

Ikala ne mmuenenu wa malu wa buena wa Nzambi

Panyima pa mêyi a ntuadijilu a muanetu Barber, wakabikila muanetu Maxwell Lloyd wa mu Komite wa Filiale wa ditunga dia États-Unis. Muanetu eu wakakuila pa tshiena-bualu tshia se: “Nuikale numona malu onso mushindu udi Nzambi uamona.” Muanetu Lloyd wakatuma meji a bateleji ku tshilejilu tshia Davidi ne tshia Yezu Muana wa Nzambi. (1 Samuele 24:6; 26:11; Luka 22:42) Kunyima kua ngamba-malu eu mumane kuvuluija balongi ne: kulonga kuabu kua Bible mu ngondo itanu mijima kuvua kubalongeshe bua kuikalabu bamona malu bu mudi Nzambi uamona, wakela lukonko ne: “Panuikala nulonga Bible ne bantu ba miaba yanutumabu, nenubambuluishe bua kuikalabu bela lungenyi mu malu onso biumvuangane ne meji a Nzambi anyi?” Bua pa bidi bitangila dibela dia bakuabu, wakabadimuija ne: “Kuambi ne: ‘Buanyi meme ndi mmona ne: . . .’ Kadi, ubambuluishe bua kuikalabu bamona tshidi meji a Nzambi. Nuenu batumikile mubelu eu, nenumone munualua dibenesha dia bushuwa kudi bonso banuapetangana nabu miaba yanutumabu.”

Ngamba-malu muibidi uvua muanetu Gerrit Lösch wa mu Kasumbu Kaludiki ka Bantemu ba Yehowa. Bu muvuaye wenza muyuki uvua ne tshiena-bualu ne: “Meme ndi nebe,” wakatuma meji a bateleji ku misangu mishilashilangane ivua Yehowa muambile basadidi bende ba lulamatu ne: ‘Meme ndi nebe.’ (Genese 26:23, 24; 28:15; Yoshua 1:5; Yelemiya 1:7, 8) Matuku etu aa, tudi mua kufika petu ku dieyemena Yehowa muomumue bituashala ne lulamatu. Muanetu Lösch wakamba ne: “Udi udiebeja bua kumanya ni wikala mua kupeta bantu ba kulonga nabu Bible anyi? Vuluka muakamba Yehowa ne: ‘Meme ndi nebe.’ Udi udiebeja muwakokesha bua kupeta bintu bikumbane bia kudikuatshisha nabi ku mubidi anyi? Yehowa wakamba ne: ‘Tshiena nkulekela nansha kakese, tshiena nkushiya tshianana.’” (Ebelu 13:5) Bua kujikija, muanetu Lösch wakavuluija balongi aba muvua Yezu mulaye ne: neikale ne balongi bende ba lulamatu mu mudimu wa divuija bantu bayidi.​—Matayo 28:20.

Muyuki wakenza Lawrence Bowen, mulongeshi wa mu Gilada, uvua wamba ne: “Neupete bukubi tshikondo tshia mudilu anyi?” Wakaleja ne: bua bilumbu biakajuka mu Edene, bantu bonso badi basue kulamata anu Yehowa nkayende mbapetangane ne ntatu, kabidi misangu mikuabu ne matetshibua a kapia. Wakakankamija balongi bakavua pa kuangata mapoloma aba bua kulonda tshilejilu tshia Yezu uvua mupete bukubi bulelela bua pavuaye weyemena Yehowa ne muoyo mujima kayi mua kunyema mateta avua Yehowa mulekele bua kufikisha butumike bua Muanende eu ku bupuangane. (Ebelu 5:8, 9) Tudi mua kufuanyikija Yehowa ne mulengeji wa tshiamu tshia or udi utshibueja mu ndambu wa mudilu mukumbane patupu bua kutshitata kumbusha butshiafu. Bushuwa, ditabuja didibu batete ne kapia didi dipeteshangana nsombelu wa nsongo mulenga mupite ne mushinga wa tshiamu tshia or tshilengeja kule ne kule. Bua tshinyi? Muanetu Bowen wakamba ne: “Bualu ditabuja didibu batate didi mua kutantamena matetshibua a mishindu yonso ne didi ditupaya bua kunanukila too ne ku ‘nshikidilu.’”​—Matayo 24:13.

Mulongeshi mukuabu wa mu Gilada, diende Mark Noumair, wakebeja ne: “Newikale muena diakalengele anyi?” Tshiena-bualu tshia muyiki wende etshi tshivua tshimanyine pa mêyi a mu 1 Samuele 2:26 adi umvuija muvua Samuele ne “diakalengele kudi Yehowa ne kudi bantu kabidi.” Panyima pa dikonkonona dia tshilejilu tshia Samuele, Muanetu Noumair (ukavua muenze bidimu bipite pa 10 mu mudimu wa bu-misionere mu Afrike) wakamba ne: “Nuenu penu nudi mua kulua bena diakalengele kumpala kua Nzambi pa kukuata ne lulamatu luonso ku mudimu udiye munupeshe. Mmunupeshe mudimu wa mushinga mukole wa bu-misionere.” Pashishe muanetu Noumair wakakankamija balongi aba bua kuangatabu midimu yabu bu mudimu wa tshijila mubapesha kudi Nzambi ne kuikala ne meji a Nzambi padibu bayikumbaja.

Dîba ditshivua balongi aba mu kalasa bavua misangu mivule ku ndekelu kua lumingu baya kumanyisha bantu ba muaba udi kalasa aka “mianda minene ya Nzambi” idi mu Bible. (Bienzedi 2:11) Bulelela, bakambila bantu malu aa mu miakulu dikumi dijima. Mu muyuki uvua ne tshiena-bualu ne: “‘Mianda minene ya Nzambi’ idi isaka bantu ku mudimu,” Wallace Liverance (mulongeshi mukuabu wa mu Gilada) wakela bamue balongi nkonko e kulondabu malu avuabu bamone. Wakamba ne: “Nyuma wakasaka bavua mu nzubu wa kulu tshikondo tshia Pentekoste bua kuakulabu bua ‘mianda minene ya Nzambi.’ Nyuma umue umue au utshidi ukuata mudimu lelu’eu mu basadidi ba Nzambi bonso ba lulamatu.” Mbisake mene bakuabu ne ku dilonga minga miakulu bua kumona mua kuyisha bantu ba bungi menemene.

Mibelu ya bushuwa ya mua kumona malu mushindu udi Nzambi uamona

Kunyima kua miyuki ya mbangilu eyi, Gary Breaux ne William Young ba mu dîku dia Betele wa mu États-Unis bakela nkonko kudi bana betu bena mu komite ya filiale mishilashilangane ya mu matunga adi ba-misionere basadila matuku aa pamue ne bana betu babidi (mulume ne mukajende) bavua benze bidimu 41 mu mudimu wa bu-misionere. Dimue dîyi diakambabu ndia se: “Badi kabayi batamba kujinga bua kupeta bintu bivule ke batu banenga mu mudimu eu. Abu meji mmatuma anu ku kendela kabu. Mbajadike ne: kendela kabu nka kuyisha lumu luimpe ne kuambuluisha bantu bua bafike ku dimanya Yehowa.”

Muanetu David Splane, muikale pende wa mu Kasumbu Kaludiki, wakajikija programe eu ne muyuki uvua wamba ne: “Kanuena nuya kule to!” Kadi bu muvuabu batuma balongi 46 aba mu matunga mashilangane a buloba bujima, ngamba-malu eu uvua usua kuamba tshinyi? Wakumvuija ne: “Nansha nuenu bikale penyi pa buloba apa, nuenu bashale ne lulamatu nenuikale anu mu nzubu wa Nzambi.” Bushuwa, bena Kristo bonso ba lulamatu nansha bikale muaba kayi, badi basadila mu tshimue tshitupa tshia ntempelo munene wa mu nyuma wa Nzambi, peshi nzubu wende, wakibakibua pakatambula Yezu batismo mu bidimu lukama bia kumpala. (Ebelu 9:9) Dimanya dia se: Yehowa udi pabuipi ne basadidi bende bonso ba lulamatu badi pa buloba diakakankamija bateleji bonso bikole menemene! Anu muvua Yehowa uditatshisha bua Yezu pavuaye pa buloba ke mudiye uditatshisha kabidi bua bualu buetu tuetu buonso ne bua mudimu utudi tumuenzela muaba wonso utudi tusanganyibua. Nunku, mu malu etu a ntendelelu katuena kule kudi umue ne mukuabu anyi kule ne Yehowa ne Yezu to.

Panyima pa dimanyisha dia mioyo ivuabu batume kudi bana betu ba buloba bujima ne dia miaba ivuabu batuma balongi aba, ne kunyima kua dibala dia mukanda mufunda kudi balongi aba bua kuleja dianyisha bua dilongesha divuabu bapete ku Gilada, mulombodi wa programe eu wakamutuisha ku tshibungubungu bimpe bitambe. Wakakankamija ba-misionere bapiabapia aba bua kutungunuka mu mudimu wabu ne kuikala ne disanka mu mudimu wa Yehowa.​—Filipoi 3:1.

[Kazubu mu dibeji 23]

MALU ADI ATANGILA BALONGI

Bungi bua matunga adibu bafumine: 14

Bungi bua matunga adibu babatume: 19

Bungi bua balongi: 46

Muayene wa bidimu: 35

Muayene wa bidimu bienza mu bulelela: 17,2

Muayene wa bidimu mu mudimu wa ku dîba ne ku dîba: 13,7

[Tshimfuanyi mu dibeji 24]

Kalasa ka 113 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo batuadijile kumpala baya batangile panyima; mbafunde mêna babangile ku dia bakaji batangile ku dia balume mu mulongo wonso.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.