Udiku ukeba Yehowa ne muoyo mujima anyi?

MUANETU wa balume mukuabu muena Kristo uvua ujinga bikole bua kumanyisha lumu luimpe lua mu Bible kudi bantu bakuabu bavuaye wenza nabu luendu mu kawulu. (Mâko 13:10) Kadi buôwa buvua bumupumbisha. Wakalekela anyi? Too, wakasambila bikole ne kukebaye mushindu wa kutuadija diyuki. Yehowa Nzambi wakandamuna disambila dia muanetu eu ne wakamupesha bukole bua kuamba lumu luimpe.

Kuenza malu ne muoyo mujima nunku kudi ne mushinga patudi tukeba Yehowa ne dianyisha diende. Mupostolo Paulo wakamba ne: ‘Bualu bua muntu udi ulua kudi Nzambi budiye nabu mbua kuitabuja ne: yeye udiku, ne udi mufutshi wa badi bamukeba.’ (Ebelu 11:6) Kukeba patupu Yehowa ki nkukumbane to. Muaku wa pa muanda udibu bakudimune ne: ‘kukeba [ne muoyo mujima]’ udi mu mushindu udi uleja bukole ne didienzeja dia bungi. Ebi bidi bilomba mutshima mujima, lungenyi, anyima ne bukole bua muntu. Bituikala tukeba Yehowa ne muoyo mujima, katuena mua kuenza malu ne kalengu, katuyi tudifila bikole anyi tuenza ne lujoko. Pamutu pa nanku, netuleje tshisumi tshilelela mu dimukeba.​—Bienzedi 15:17.

Bantu bavua bakeba Yehowa ne muoyo mujima

Mu Bible mudi bilejilu bia bungi bia bantu bavua baditatshisha bikole bua kukeba Yehowa. Umue wa ku bantu aba uvua Yakoba, uvua muluangane ne bukole buende buonso ne muanjelu wa Nzambi uvua muvuale mubidi wa buntu too ne patshiatshia. Ke bualu kayi bakapesha Yakoba dîna dia Isalele (Udi uluangana ne Nzambi) bualu ‘wakaluangana’ anyi wakasuminyina, wakadienzeja ne kunanukilaye ne Nzambi. Muanjelu wakamubenesha bua dinanukila diende dikole.​—Genese 32:24-30.

Pashishe kuvua mukaji muena Galela udibu kabayi batela dîna uvua mukenge bidimu 12 ne disama dia mashi apatuka, disama edi ‘diakatamba kumukengesha.’ Mu nsombelu wa mushindu eu, kavua ne bua kulenga bantu bakuabu to. Kadi wakasangisha dikima diende bua kuya kupetangana ne Yezu. Uvua udiambila munda munda ne: ‘Bingalenga anu ku tshivualu tshiende, nenkoleshibue.’ Anji elabi meji bua muvuaye muluangane bua kufika kudi Yezu munkatshi mua ‘bantu ba bungi bavua bamukunguila.’ Diakamue pakalengaye tshilamba tshia pa mutu tshia Yezu, kumvuaye ne: ‘mashi akakama;’ disama diende dia munanunanu diakajika! Pakebeja Yezu ne: ‘Wakundenga ku tshivualu tshianyi nganyi?’ wakumvua buôwa. Kadi Yezu wakamuambila ne musangelu ne: ‘Muananyi, ditabuja diebe diakukusungila; uye biebe talala, wikale musangale ku disama diebe.’ Wakapeta difutu bua mushindu uvuaye mudienzeje ne bukole.​—Mâko 5:24-34; Lewitiki 15:25-27.

Musangu mukuabu, mukaji muena Foinike wakasengelela Yezu ne muoyo mujima bua ondope muanende wa bakaji. Yezu wakandamuna ne: kabivua bimpe bua kupesha tuana tua mbua biakudia bia bana to. Uvua musue kuamba ne: kavua mua kuambuluisha bantu bavua kabayi bena Isalele pamutu pa bena Yuda to. Mukaji wakumvua tshivuaye usua kuamba mu mufuanu wende, kadi wakamulomba ne: ‘Bulelela, Mukalenge, kadi mbua itu yadia nkototo idi imata muinshi mua mesa a bamfumu bayi.’ Ditabuja diende dikole ne mêyi ende malulame akasaka Yezu bua kuamba ne: ‘Wewe mukaji, ditabuja diebe didi dinene; nebakuenzele bualu buudi musue.’​—Matayo 15:22-28.

Ntshinyi tshivua mua kuikala tshifikile bantu aba bu buobu kabayi bananukile? Bavuaku mua kupeta mabenesha bu buobu bashikile pavuabu bapete tshipumbishi tshia kumpala peshi dibabengela anyi? Too! Bilejilu ebi bidi bileja bimpe bualu buvua Yezu mulongeshe bua ne: “dinanukila” ndimpe, didi ne mushinga nansha mu dikeba Yehowa.​—Luka 11:5-13.

Mu diumvuangana ne disua diende

Mu miyuki idi kulu eku ya bantu bavuabu buondope mu tshishima, kuenza malu ne muoyo umue ke tshintu tshimue tshivuabu babalombe anyi? Too, milombu yabu ivua ne bua kuikala mu diumvuangana ne disua dia Nzambi. Bakapesha Yezu bukokeshi bua kuenza bishima bua kujadika mu mushindu wa pa buawu ne: uvua Muana wa Nzambi, Masiya mulaya. (Yone 6:14; 9:33; Bienzedi 2:22) Pashishe, bishima bivua Yezu muenze bivua bifila ka-diosha ka mabenesha manene a pa buloba ikala Yehowa ne bua kupesha bantu mu bukokeshi bua bidimu tshinunu bua Kristo.​—Buakabuluibua 21:4; 22:2.

Kabitshiena kabidi disua dia Nzambi bua ne: aba badi mu ntendelelu mulelela bikale benze bishima, bu mudi bukokeshi bua kuondopa ne kuakula mu miakulu to. (1 Kolinto 13:8, 13) Disua diende lelu ndia kuamba lumu luimpe lua Bukalenge buende pa buloba bujima bua “bantu bonso basungidibue, bafike ku dimanya dia malu malelela.” (1 Timote 2:4; Matayo 24:14; 28:19, 20) Basadidi ba Nzambi badi mua kutekemena bua Yehowa umvue ne anyishe masambila abu menza ne muoyo mujima mu diumvuangana ne disua diende.

Bamue badi mua kudiebeja ne: ‘Bua tshinyi kuditatshisha nunku pabi ndekelu wa bionso dilongolola dia Nzambi nedikumbane nansha bia munyi?’ Nansha mudibi bilelela bua ne: Yehowa neakumbaje dilongolola diende nansha bantu kabayi benze tshintu, udi usanka padiye umona bantu benza disua diende. Tudi mua kufuanyikija Yehowa ne muntu udi wibaka nzubu. Muibaki mmumanye mushindu wikala nzubu yonso, kadi udi usungula bia dibaka nabi nzubu bidi bimueneka muaba udiye. Bia muomumue, Yehowa udi ne dilongolola dia kukumbaja lelu’eu ne bidi bimusankisha bua kuangata basadidi bende badi badifila ku budisuile bua kudikumbaja.​—Musambu 110:3; 1 Kolinto 9:16, 17.

Tangila tshilejilu tshia nsonga eu Toshio. Pakabuelaye mu tulasa tubandile, wakajinga bua kuyisha bikole mu teritware au uvuaye wangata bu wende nkayende. Uvua anu wenda ne Bible wende ne uvua udienzeja bua kuikala muena Kristo wa tshitembu. Pabuipi ne ku ndekelu kua tshidimu tshiende tshia kumpala, kuakamueneka mushindu wa kuenza muyuki mu kalasa. Toshio wakasambila Yehowa bua amuambuluishe ne wakasanka pakamonaye kalasa kajima kalonda ne ntema muyuki wende uvua ne tshiena-bualu ne: “Tshipatshila tshianyi tshia kuenza mudimu wa bumpanda-njila.” Wakumvuija ne: uvua musue kuikala muena mudimu wa ku dîba ne ku dîba wa Bantemu ba Yehowa. Mulongi umue wakitaba bua kulonga nende Bible ne wakaya kumpala, kufikaye too ne ku ditambula. Toshio wakapeta difutu bualu wakadienzeja ne muoyo mujima mu diumvuangana ne masambila ende.

Mmushindu kayi uudi wenza malu ne muoyo mujima?

Udi mua kuleja mu mishindu mishilangane ne: udi ukeba ne muoyo mujima Yehowa ne mabenesha ende. Tshia kumpala, kudi malu a nshindamenu audi mua kuenza, bu mudi kulongolola bimpe bisangilu bia tshisumbu. Udi uleja ne: udi ukeba Yehowa umukebelamu ne muoyo mujima paudi ufila mandamuna malongolola bimpe, wenza miyuki idi ikankamija ne manaya a tshilejilu adi apatula bipeta bilenga. Udi kabidi mua kuleja dienza malu diebe ne muoyo mujima paudi ulengeja mushindu uudi wenza mudimu wa buambi. Udi umona munyi bu wewe mua kuikala ne mpala wa bulunda paudi uyukila ne bantu ku tshibi ne wenza mudimu ne mbuelelu ya miyuki idi miakanyine mu teritware webe? (Kolosai 3:23) Muanetu wa balume muena Kristo udi udienzeja ne muoyo mujima udi mua kuitaba midimu mu tshisumbu, bu mudi kuenza mudimu bu musadidi wa mudimu anyi mukulu. (1 Timote 3:1, 2, 12, 13) Wewe mudilongolole bua kuitaba mudimu wonso udibu bakupesha, udi mua kupeta disanka dia kupeshangana. Udi mua kulomba bua kuenza mudimu ku biro bia luibaku anyi ku betele wa Bantemu ba Yehowa. Wewe muikale muanetu wa balume mujike mukumbane, udi mua kujinga bua kubuela mu Kalasa ka Dilongesha Mudimu, kadi kambuluisha bana betu ba balume badi bapie mu nyuma bua kuikalabu balami bimpe. Wewe muikale musele, mudimu wa bu-misionere udi mua kuikala mushindu muimpe wa wewe kuleja dijinga diebe dikole dia kuenzela Yehowa mudimu ne muoyo mujima. Kuya muaba udibu dijinga dikole ne bamanyishi ba Bukalenge kudi mua kuikala mushindu mukuabu buebe wewe.​—1 Kolinto 16:9.

Tshidi ne mushinga menemene ndungenyi luudi wenza nalu mudimu. Nansha bakupesha mudimu kayi wonso, uwenze ne muoyo mujima, ne bukole buonso ne “muoyo muimpe.” (Bienzedi 2:46, MMM; Lomo 12:8) Udi ne bua kumona mudimu wonso udibu bakupesha bu mushindu wa wewe kuleja muudi musue kutumbisha Yehowa ne muoyo mujima. Sambila misangu yonso bua Yehowa akuambuluishe, ne enza muebe muonso. Nanku neupete mabenesha a bungi.

Masanka adi afumina ku didienzeja ne muoyo mujima.

Vuluka muena Kristo uvua musambile bua kutshimuna buôwa bua kuyishaye bantu bavuaye wenza nabu luendu mu kawulu misangu yonso. Yehowa wakabenesha dijinga diende dilelela. Muanetu au wakenza muende muonso bua kuleja mpala wa bulunda ne wakasungula biena-bualu bia bungi bia kutuadija nabi miyuki. Wakenza mudimu ne Bible mu mushindu muimpe bua kuyisha muntu uvuabu batondeshe nsombelu kudi bantu. Diyisha muntu au misangu ne misangu mu kawulu diakabafikisha ku dilonga dia Bible dia ku nzubu. Bulelela, Yehowa wakamubenesha bua mushindu uvuaye mudifile ne muoyo mujima!

Udi mua kupeta bipeta bia muomumue wewe mutungunuke ne kukeba Yehowa ne muoyo mujima. Wewe munanukile ne budipuekeshi buonso ne wenza ne muoyo webe mujima mudimu kayi wonso wa malu a Nzambi udibu bakupeshe, Yehowa neakuate nebe mudimu mu diumvuangana ne dilongolola diende ne neakulokeshile mabenesha mavule.

[Tshimfuanyi mu dibeji 26]

Ntshinyi tshivua mua kufikila mukaji eu bu yeye kayi munanukila?

[Tshimfuanyi mu dibeji 27]

Udiku unanukila mu dilomba Yehowa mabenesha ende anyi?

[Bimfuanyi mu dibeji 28]

Mmunyi muudi mua kuleja ne: udi ukeba Yehowa ne muoyo mujima?