Buobumue pa buloba: Nebienzekeku anyi?

BULOBA buetu ebu mbutangile ku ditalala anyi ku kabutu? Bidi bimueneka ne: kudi mmuenenu ya bungi bua bualu ebu.

Ku lumue luseke, bamue bamfumu ba pa buloba badi bakula ne dishindika dionso bua ditalala pa buloba bujima bu tshipatshila tshidi bantu ne bua kukumbaja, pamuapa bualu bobu kabayi batshikumbaje nsombelu neanyanguke bikole. Ku lukuabu luseke, ba bungi badi ne buôwa bua nkonko bu eyi: Mmatunga kayi adi ne bingoma bidi bibutula bantu ba bungi musangu umue? Adiku mua kuteta bua kubikuma anyi? Tshienzeka ntshinyi wowu matete bua kubikuma?

Miyuki ya malu a kale idi idi ileja ne: katshia ku kale dikokangana ne kansungasunga ke bidi bienze bua kakuikadi buobumue nansha bukese, ne misangu mivule bitendelelu ke bitu bikoleshe dikokangana edi ne kansungasunga. Kamona-kamba mukuabu diende James Haught udi wamba ne: “Tshintu tshionso tshidi tshitapulula bantu tshidi mua kukebesha ndululu, pabi bitendelelu ke bitu bitamba kutapulula bantu bikole. Nansha mudi bantu ba bungi bitaba ne: tshitendelelu tshidi tshivuija bantu ‘bantu bimpe,’ bidi bimueneka patoke ne: tshidi tshisaka bamue bantu ku dikina bakuabu ne ku dibenzela bibi.” Mufundi mukuabu Steven Weinberg udi wamba pende bualu bua muomumue ne: “Anu tshitendelelu ke tshidi tshifikisha bantu bimpe ku dienza malu mabi.”

Kudiku ditekemena bua ne: bantu nebikale mu buobumue pa buloba kashidi anyi? Eyowa! Kadi anu mutuabimona, ki mmuntu anyi bitendelelu bienza kudi bantu bikala mua kufila buobumue pa buloba to.

[Lungenyi lunene lua mu dibeji 3]

Buloba budi bu bombe udi usua kutayika anyi?