Udi mua kuikala amu ne disanka nansha mudiku malu adi anyingalaja

NNGANYI utubu kabayi banji kunyingalaja? Nansha Yehowa Nzambi Tatu wetu wa mu diulu, bakatu bamunyingalaje pende. Tshilejilu, wakapatula bena Isalele ku bupika mu Ejipitu ne kubambuluisha bikole. Kadi Bible udi wamba ne: ‘Bakapingana kunyima, bakateta Nzambi, bakatatshisha wa Tshijila wa bena Isalele.’ (Musambu 78:41) Nansha nanku, Yehowa utuanu “Nzambi wa disanka.”​—1 Timote 1:11, NW.

Kadi kudi malu a bungi adi mua kutunyingalaja. Ntshinyi tshitudi mua kuenza bua malu aa kaatupangishi bua kuikala ne disanka? Ntshinyi tshitudi mua kulongela ku tshitu Yehowa wenza patu malu adi mua kumunyingalaja enzeka?

Malu adi mua kutunyingalaja

Dîyi dia Nzambi didi diamba ne: kudi bikondo ‘bidi malu atutulukila’ tuetu bonso. (Muambi 9:11) Badi mua kuenzela yonso wa kutudi bibi, njiwu anyi tshipupu tshidi mua kumukuata mu tshimpitshimpi ne kumukebela kanyinganyinga kakole. Bible udi wamba kabidi ne: ‘Ditekemena didibu balayidila didi disamisha mutshima.’ (Nsumuinu 13:12) Muntu udi ne disanka padiye mutekemene bualu buimpe ne muoyo mujima, kadi padibu kabuyi bulue lukasa, udi umvua bibi. Tuangate tshilejilu tshia Duncana uvua munange mudimu wa bumisionere bikole ne muwenze munkatshi mua bidimu bia bungi. Kadi dimue edi yeye ne mukajende bakamona ne: kabavua kabidi mua kutungunuka nawu to. Wakamba ne: “Katshia bandela, tshitu muanji kudiumvua muntu tshianana bu musangu au to. Ngakadimona muntu patupu. Malu onso akalua malu tshianana ku mêsu kuanyi.” Malu adi anyingalaja adi mua kushala atatshisha muntu munkatshi mua matuku a bungi anu bu muvuabi bienzekele Claire. Udi wamba ne: “Muananyi wakafuila munda pamvua ne difu ngondo 7. Kukadi bidimu bia bungi mpindieu, kadi misangu yonso intu mmona muana wenza mudimu mu bisangilu bia Bantemu, ntu diambila ne: ‘Ke muvua muananyi mua kuikala pende nunku.’”

Tudi kabidi mua kunyingalala padi muntu utuenzela bibi, padi dibangilangana anyi dibaka difua, padi muana utomboka anyi padi mulunda utuela mâyi ku makasa. Bu mutudi munkatshi mua bantu bapange bupuangane ne bikale mu matuku a malu makole, nekuikale anu malu adi mua kutunyingalaja.

Tudi mua kumvua kanyinganyinga patudi tupangila bua kuenza bualu kampanda. Tshilejilu, tudi mua kudiumvua katuyi ne mushinga patudi tubula diteta kampanda, tupangila mudimu anyi patudi banange muntu kadi yeye kayi utunanga. Tudi kabidi mua kumvua bibi padi muntu utudi banange kayi uya kumpala mu malu a Nzambi. Tshilejilu, Mary udi wamba ne: “Muananyi wa bakaji uvua umueneka bu uvua uya kumpala bimpe. Mvua ngela meji ne: mvua tshilejilu tshimpe kudiye. Kadi dituku diakelaye Yehowa nyima ne kututombokela, ngakadiumvua mupangile mu bionso. Kakuvua tshintu nansha tshimue ku bionso bimvua mukokeshe mua kuenza tshivua mua kunkolesha ku muoyo to. Ngakateketa mu mikolo bikole.”

Mmunyi mutudi mua kupita ntatu ya mushindu eu bukole? Bua kuandamuna lukonko elu, tukonkononayi tshitu Yehowa wenza patubu bamunyingalaja.

Imanyina pa tshiudi mua kuenza

Yehowa Nzambi uvua mupeshe Adama ne Eva bionso bivuabu nabi dijinga, kadi bobu bakamuela mâyi ku makasa ne kumutombokela. (Genese nshapita 2 ne 3) Pashishe muanabu Kayina wakapeta pende meji mabi. Yehowa wakamubela kadi kakumvua to, ndekelu wa bionso kushipaye muanabu. (Genese 4:1-8) Ela meji bungi bua kanyinganyinga kakumvua Yehowa.

Bua tshinyi bualu ebu kabuakapangisha Yehowa bua kuikala ne disanka? Bu muvuaye mulongolole bua kuuja buloba tente ne bantu bapuangane, wakatungunuka ne kuenza muende muonso bua kukumbaja tshipatshila etshi. (Yone 5:17) Bua kutshikumbaja, wakafila mulambu wa kupikula nawu bantu ne kulongolola Bukalenge. (Matayo 6:9, 10; Lomo 5:18, 19) Yehowa Nzambi kakimanyina pa bualu buvua buenzeke to, kadi wakatangila ku tshivuaye mua kuenza bua kubujikija.

Dîyi dia Nzambi didi ditulomba bua kuteka meji etu ku malu mimpe atudi mua kuenza pamutu wa kutangila anu atudi bapangile mua kuenza. Didi diamba ne: ‘Malu onso adi malelela, ne malu onso adi a buneme, ne malu onso adi makane, ne malu onso adi a butoke bua mutshima, ne malu onso adi malengele a dinanga, ne malu onso adi ne lumu luimpe; bikalaku buimpe ne bikalaku butumbi, nuelangane meji a malu aa.’​—Filipoi 4:8.

Mushindu muimpe wa kumona kanyinganyinga

Kudi malu adi mua kutukuata adi mua kushintulula nsombelu wetu bikole. Tshilejilu, badi mua kutuipata ku mudimu, kujimija muena dibaka netu anyi kujimija midimu ituvua nanyi mu tshisumbu. Tudi mua kusama, kujimija lupangu anyi nzubu wetu anyi bulunda budi mua kufua. Ntshinyi tshitudi mua kuenza mu ntatu ya mushindu eu?

Bamue mbafike ku dimona ne: kudifundila malu adi ne mushinga nkuimpe. Duncan utuvua batele kulu eku udi wamba ne: “Patuakamona meme ne mukajanyi ne: katuena kabidi mua kupingana ku mudimu wa bumisionere, biakatutonda bikole. Nanku, tuetu kudifundila bipatshila bibidi, tshia kumpala tshivua tshia kulama mamu ne tshibidi tshia kushala bampanda-njila ba pa tshibidilu padiku mushindu. Kumpala kua kuangata dipangadika dionso, tuvua tuanji kutangila ni divua mua kutupangisha bua kuenza malu abidi aa. Bualu ebu buakatupepejila malu etu onso.”

Ba bungi ba kutudi batu batamba kuakula bikole bua bualu bubi budi bubenzekele. Tshilejilu, tudi mua kudienzeja bua kukolesha muana bimpe, kumanya mudimu kampanda bimpe anyi kuyisha lumu luimpe ku ba bende, kadi katuyi anu tupeta bua nsongo to. Nunku tudi mua kufika ku diela meji ne: ‘Ndi mupangile bualu.’ Kadi tumanye ne: Nzambi kakapangila bua kukumbaja disua diende anu bualu Adama ne Eva bavua bamuele mâyi ku makasa to. Tuetu petu katuena mua kuikala bapangile anu bualu tudi bapete ntatu ku ntuadijilu to.​—Dutelonome 32:4, 5.

Bitu bitekete bua kumvua bibi menemene padi bantu bakuabu batuenzela bibi. Ki ntshitu Yehowa wenza to. Mukalenge Davidi wakamunyingalaja pakendaye ne mukaji wa bende ne kushipa bayende wa mukaji eu. Kadi Yehowa wakamona muvua Davidi munyingalale bua bubi buende ne kumuitabilaye bua ikale anu muena mudimu wende. Nansha mukalenge Yehoshafata pende wakenza tshilema pavuaye mudie tshipungidi ne baluishi ba Nzambi. Muprofete wa Yehowa wakamuambila ne: ‘Bua bualu ebu Yehowa wakakuleja tshiji tshiende. Kadi malu mimpe makuabu adi munda muebe.’ (2 Kulondolola 19:2, 3) Yehowa uvua mumanye ne: tshilema tshimue tshivua Yehoshafata muenze katshivua tshileja muvuaye mumuele nyima to. Tuetu petu tudi mua kulama bulunda buetu ne muntu patudi katuyi tutamba kuimanyina anu pa tshilema tshiende. Mulunda udi mutuenzele bibi udi mua kuikala anu ne imue ngikadilu mimpe.​—Kolosai 3:13.

Nanku, katuangatshi dipangila kuenza bualu kampanda bu tshintu tshibi to, kadi tudimone bu bualu budi mua kutufikisha ku malu mimpe. Tudi mua kudiumvua bibi patudi tuetu bine benze malu mabi. Kadi tudi mua kupeta disanka tuetu bangate dipangadika dia kuenza malu adi akengela ne bapingane kudi Nzambi. Tshilejilu, pavua mukalenge Davidi mumvue bibi bua bubi buvuaye muenze, wakamba ne: ‘Mifuba yanyi yakavingutuka bualu bua kutua kuanyi kua mikemu dinda too ne ku dilolo. Ngakatonda bubi buanyi kuudi [Yehowa], ne wewe wakandekelela dipila dia bubi buanyi.’ (Musambu 32:3-5) Tuetu bamone ne: tudi benze bualu budi kabuyi busankisha Nzambi, tudi ne bua kumulomba luse ne kushintulula nsombelu wetu ne kudisuika bua kutumikila mikenji yende matuku adi kumpala.​—1 Yone 2:1, 2.

Mutudi mua kudilongolola bua kupita ne malu adi atunyingalaja

Tuetu bonso netupetaku anu bualu buatunyingalaja kumpala eku. Ntshinyi tshitudi mua kuenza bua kudianjila kudilongolola? Tumonayi tshivua muena Kristo mukuabu mushindame diende Bruno muenze pavuaye mupete malu avua mamunyingalaje ne mashintulule nsombelu wende bikole. Wakamba ne: “Tshivua tshingambuluishe bua kupita bimpe ne bualu buvua buntonde nkutungunuka anu ne kuenza malu amvua ngenza kuonso eku bua kukolesha ditabuja dianyi. Ngakamanya bua tshinyi Nzambi mmulekele malu mabi atungunuka too ne lelu. Munkatshi mua bidimu bia bungi, mvua mudienzeje bua kuikala mu malanda mimpe ne Yehowa. Dikolesha dia ditabuja dianyi diakangambuluisha bikole. Dimanya dia ne: Nzambi uvua nanyi, diakangambuluisha bua kutantamena lutatu lumvua nalu.”

Patudi tutangila muikala matuku atshilualua, tuikale bashindike ne: Nansha tuetu bine benza bualu budi butunyingalaja anyi bakuabu bobu batunyingalaje, Yehowa yeye kakutunyingalaja musangu nansha umue to. Yeye muine wakamba mudi dîna diende diumvuija ne: “Ndi mundi” mbuena kuamba ne: Meme nengikale tshionso tshingasua bua kuikala. (Ekesode 3:14) Bualu ebu budi butujadikila ne: neadivuije tshionso tshidi tshikengela bua kukumbaja malu adiye mulaye. Ukavua mulaye ne: ku diambuluisha dia Bukalenge buende, nebenze disua diende ‘pa buloba bu mudidi dienzeka mu diulu.’ Ke bualu kayi mupostolo Paulo wakafunda ne: ‘Ndi ngitabuja ne: Kakuena lufu, kakuena muoyo, kakuena banjelu, kakuena bakokeshi, kakuena tshintu tshionso tshikuabu tshifukibua tshidi ne bukole bua kutupandulula ku dinanga dia Nzambi didi mu Kristo Yezu.’​—Matayo 6:10; Lomo 8:38, 39.

Tudi bindile ne dishindika dionso dikumbana dia mulayi uvua Yehowa mufidile mukana mua muprofete Yeshaya wa ne: ‘Ndi mfuka diulu dipiadipia ne buloba bupiabupia; malu a kumpala kaena avulukibua, ne malu aa kaena abuela mu mitshima kabidi.’ (Yeshaya 65:17) Edi ndilaya dimpe ditambe, bualu mu katupa kakese emu, malu adi anyingalaja onso kaakuikalaku kabidi to.

[Mêyi adi kuinshi]

[Lungenyi lunene lua mu dibeji 13]

Katuena bapangile anu bualu tudi bapete ntatu ku ntuadijilu to

[Lungenyi lunene lua mu dibeji 14]

Dîyi dia Nzambi didi ditukankamija bua kuteka meji etu ku malu mimpe pamutu wa kuimanyina anu pa atudi bapangile mua kuenza

[Bimfuanyi mu dibeji 15]

Nzambi udi anu ne disanka nansha mudi bantu bamuele mâyi ku makasa bualu tshipatshila tshiende netshikumbane anu kukumbana

[Tshimfuanyi mu dibeji 16]

Kudifundila bipatshila mu mudimu wa Nzambi kudi kutuambuluisha bua kupita bimpe ne malu adi atunyingalaja