“Yehowa munufuile luse ne muoyo mujima”

Edward Herbert mumanyi wa malu a kale wa mu ditunga dia Angleterre wakafunda mu bidimu bia 1600 (siekele wa 17) wamba ne: “Muntu udi kayi ufuila bakuabu luse udi ukosa tshilamba tshikalaye ne bua kuendela pende.” Mêyi aa adi aleja mudibi ne mushinga bua kufuila bakuabu luse bualu mpindieu anyi matuku kumpala, tudi mua kujinga bua bakuabu batufuile petu luse. (Matayi 7:12) Nansha nanku, kudi kabingila kanene kadi katusaka bua kufuilangana luse. Umvua mêyi a mupostolo Paulo adi mu Kolosayi 3:13.​—Bala.

Bu mutudi tuetu bonso bantu bapange bupuangane, tudi mua kufikisha bakuabu munda anyi kubenzela bibi, ne bobu pabu badi mua kutuenzela bia muomumue. (Lomo 3:23) Mmunyi mutudi mua kulama ditalala ne bantu netu badi bapange bupuangane? Paulo uvua muenzeja ku nyuma wa Nzambi, udi utubela bua kulekelela bakuabu malu ne kubafuila luse. Mubelu eu udi ne mushinga lelu anu bu muvuawu ne mushinga tshikondo tshivuabu bafunde mêyi aa kukadi kupite bidimu bitue ku binunu bibidi. Tukonkononayi mêyi a Paulo aa bimpe.

“Nutungunuke ne kulejangana lutulu.” Mêyi a ne: “nutungunuke ne kulejangana lutulu” mmakudimuna ku muaku wa mu tshiena Greke udi uleja kulekelela bakuabu malu anyi kubafuila luse. Mukanda kampanda udi wamba ne: bena Kristo badi baleja ngikadilu eu pa “kuikala bimpe ne bantu badi ne bikadilu bibi bidi bibabungamija.” Muaku eu: “kulejangana” udi uleja ne: kulekelela bakuabu malu kudi ne bua kuikala kudi umue ne mukuabu. Ke bua tshinyi patudi tuvuluka ne: tudi ne ngikadilu idi mua kufikisha bakuabu munda, katuena mua kuanyisha bua malu adi atondesha bakuabu nsombelu anyange ditalala didi pankatshi petu nabu. Kadi ntshinyi tshitudi mua kuenza bakuabu bobu batuenzele bibi?

‘Nutungunuke nekufuilangana luse ne muoyo mujima.’ Bilondeshile mumanyi kampanda, muaku wa mu tshiena Greke adibu bakudimune ne: ‘kufuilangana luse ne muoyo mujima’ “ki ngudibu bakudimuna kufuila muntu luse to, kadi mmuaku udi uleja mushindu udi muntu udi ufuilangana luse, wenza bualu ebu ne muoyo mulenga.” Mukanda mukuabu udi wamba ne: muaku eu udi mua kumvuija “kupesha muntu tshintu ne disanka, bu mudi kumuanyisha ne kumuambuluisha.” Tudi tuleja muoyo mulenga patudi tuanyisha ne muoyo umue bua kufuilangana luse nansha patudi ne “tshilumbu ne mukuabu.” Bua tshinyi tudi ne bua kuanyisha bua kupesha bakuabu diakalenga edi? Mbualu mu matuku makese, tudi mua kujinga bua muntu utudi benzele bibi atuleje pende dianyisha padiye utufuila luse.

“Anu bu mudi Yehowa munufuile luse ne muoyo mujima, nudi ne bua kuenza penu nanku.” Tshidi tshitusaka menemene bua kufuila bakuabu luse ne muoyo mujima mbualu Yehowa Nzambi udi utufuila luse ne muoyo mujima. (Mika 7:18) Anji teta kuela meji bua diakalenga dinene didi Yehowa uleja bantu badi banyingalala bua mibi yabu. Yehowa katu wenza mpekatu bu tuetu to. Kadi mmusue kufuila bantu badi banyingalala bua mibi yabu luse ne muoyo mujima nansha mudiye mumanye ne: kakujinga bua benji ba mpekatu abu bamuleje dianyisha pa kumufuila pende luse to. Bulelela, Yehowa mmuntu udi ufuila bantu badi banyingalala bua mibi yabu luse ne muoyo mujima kupita bantu bonso!

Luse lua Yehowa ludi lutusemeja pabuipi nende ne lutusaka bua kumuidikija. (Efeso 4:32–5:1) Mbimpe tudiebeje ne: ‘Bu mudi Yehowa wanyisha bua kumfuila luse ne muoyo umue, mmunyi mundi mua kubenga kufuila muntu nanyi muena mapanga luse udi unyingalala ne muoyo mujima bua bubi budiye mungenzele?’​—Luka 17:3, 4.