Mmalu kayi atu Bantemu ba Yehowa bitabuja?

Bantemu ba Yehowa batu bitabuja ne: “Dîyi dionso didi mu Mifundu minsantu ndifundisha ku nyuma wa Nzambi, ne didi diambuluisha.” (2 Timote 3:16) Bible ke utu utuambuluisha bua kulonga malu a mufuki wetu ne kupeta nsombelu muimpe.

Bible udi wamba ne: ‘Mbua bamanye biabo ne wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ (Musambu 83:18) Ke bualu kayi tutu tutendelela anu Yehowa Nzambi nkayende ne bu mutudi Bantemu bende, tudi tudifila bua kumanyisha dîna diende.​—Yeshaya 43:10-12.

Bu mutudi bena Kristo, tudi tuitabuja ne: Yezu “Muana wa Nzambi,”a wakalua pa buloba kushalaye Masiya. (Yone 1:34, 41; 4:25, 26) Yezu wakafua ne bakamubisha bua kuya mu diulu. (1 Kolinto 15:3, 4) Panyima pa matuku wakalua Mukalenge wa Bukalenge bua Nzambi. (Buakabuluibua 11:15) Bukalenge abu mmbulamatadi mulelela wenza bua buloba bulue kabidi mparadizu. (Danyele 2:44) Bible udi wamba ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’​—Musambu 37:11, 29.

Bantemu ba Yehowa badi bitabuja ne: mêyi manene a mu Bible adi mua kuambuluisha bantu nansha lelu eu. (Yeshaya 48:17, 18) Ke bualu kayi, tudi tudifila bikole bua kutumikila mêyi aa. Tshilejilu, katutu tunua makanya anyi diamba to, bualu Bible udi utudimuija bua kuepuka bintu bidi binyanga mubidi ne lungenyi luetu. (2 Kolinto 7:1) Tudi tuepuka kabidi bilele bidi Bible ukandika bu mudi: dikuatshika dia maluvu, malu a masandi ne buivi.​—1 Kolinto 6:9-11.