TSHIENA-BUALU TSHINENE | PATUDI TUFUISHA MUNTU UTUDI BANANGE
Mbibi bua kuikala ne kanyinganyinga anyi?
Kutuku muanji kupeta disama dia matuku makese anyi? Imue misangu uvua mumvue bimpe lukasa kuyi nansha ne mushindu wa kuvuluka tshikondo atshi to. Kadi kanyinganyinga kakena nanku to. Alan Wolfelt wakafunda mu mukanda wende ne: “Kakutu tshintu tshidi tshikole bu kutantamena kanyinganyinga to, kadi kadi mua kuteketa mu bungi bua matuku ne ku diambuluisha dia bantu bakuabu.”—Healing a Spouse’s Grieving Heart.
Tuangate tshilejilu tshia muvua Abalahama mumvue pavua mukajende mufue. Bible udi wamba ne: “Abalahama kubuelaye mu tshinyongopelu tshia Sala, kumudilaye.” Tshiambilu tshia ne: “kubuelaye mu” tshidi tshiumvuija ne: uvua muenze tshikondo bule kampanda bua kutantamena kanyinganyinga ka lufu lua mukajende.a Tshilejilu tshikuabu ntshia Yakoba, uvuabu bashime ne: nyama wa luonji mmushipe muanende Jozefe. Wakabuela mu tshinyongopelu munda mua “matuku a bungi,” ne bena mu dîku diende kabakakumbana bua kumukankamija to. Bidimu bia bungi pashishe, lufu lua Jozefe lutshivua anu lumutonde bikole mu lungenyi.—Genese 23:2; 37:34, 35; 42:36; 45:28.
Abalahama wakanyingalala bua lufu lua Sala mukajende uvuaye munange bikole
Bidi kabidi nanku bua matuku etu adi bantu ba bungi babuela mu tshingongopelu tshia lufu lua muntu uvuabu banange bikole. Tukonkononayi bilejilu bibidi ebi.
Gail udi ne bidimu 60 udi wamba ne: “Bayanyi Robert wakafua mu 9/7/2008. Dituku dia njiwu ya lufu divua anu bu muvua matuku makuabu onso aa. Mu dinda tuetu bamane kudia, tuakatuangana mishiku, kuakidilangana, ne kuambilangana ne: ‘ndi mukunange’ anu bu mutuvua tuenza kumpala kua kuyaye ku mudimu. Panyima pa bidimu bisambombo ntshidi anu ne kanyinganyinga mu mutshima wanyi. Ndi ngela meji ne: kanyinganyinga ka lufu lua Robert kakakujika mu muoyo wanyi to.”
Etienne udi ne bidimu 84 udi wamba ne: “Nansha mumvua tshitshiyi kabidi ne mukajanyi uvua munnange bikole kukadi bidimu bipite pa 18, ntshidi anu mmuvuluka ne kanyinganyinga kanyi katshidi anuku. Pantu mmona tshintu kampanda tshimpe menemene, meji anyi atu aya anu kudiye, ne ntu ntungunuka anu ne kudiebeja muvuaye mua kudiumvua yeye umona bindi mmona ebi.”
Mu bulelela, bitu anu bifikila muntu yonso bua kuikala ne kanyinganyinga ne kudiumvua nunku matuku a bungi. Muntu yonso utu anu ne wende mushindu wa kunyingalala, nunku ki mbia meji bua kulumbuluisha muntu bua mushindu udiye uleja kanyinganyinga bua lutatu kampanda to. Nansha tuetu bine katuena ne bua kudipisha bua mutudi ne kanyinganyinga kakole menemene bua muntu utudi bafuishe to. Mmunyi mutudi mua kutantamena kanyinganyinga?
a Izaka muana wa Abalahama wakapeta pende kanyinganyinga ka matuku a bungi. Anu mudibi bileja mu tshiena-bualu tshia “Nuidikije ditabuja diabu” tshia mu tshibejibeji etshi, panyima pa bidimu bisatu bimane kupita, Izaka utshivua anu ne kanyinganyinga bua lufu lua mamuende Sala.—Genese 24:67.