Padi disama dikole ditutatshisha

“Pavuabu bangambile ne: ndi ne kansere ka mu bisulusulu ne ka mu mala, mvua mumvue anu bu mupete mukenji wa madilu. Kadi pangakapingana kumbelu panyima pa dimonangana ne munganga, ngakadiambila ne: ‘Bushuwa, ki ntshimvua mutekemene to, kadi mbimpe nkebe mushindu wa kupita bimpe ne lutatu elu.’”—Linda udi ne bidimu 71.

“Ndi nsama disama dibi ditu ditekesha luseke lua mutu lua dia bakaji. Musangu kampanda, diakanjuka bikole, kumfikishadi ku dibungama dikole. Misangu ya bungi mvua ndimona nkaya ne ngela too ne meji a kudishipa.”—Elise udi ne bidimu 49.

Mubedi udi wendela mu kakalu munyunguluka kudi bantu badi bamunange

BOBU bakukuate wewe anyi muntu uudi munange ne disama didi mua kufikisha ku lufu, bitu bienza bibi bitambe. Pa kumbusha disama adi, udi ne bua kutantamena kanyinganyinga kadidi dikebesha. Buôwa ne kanyinganyinga bidi mua kuvula bua disesa kua munganga didi ditatshisha mu lungenyi, bua lutatu lua kupeta luondapu anyi makuta a kudiondopesha nawu, peshi bua lutatu ludi manga akebesha. Kanyinganyinga ne disama dikole adi bidi mua kukunemena bujitu.

Nkuepi kutudi mua kupetela diambuluisha? Bantu ba bungi mbamone ne: mbatambe kupetela busambi ku dieyemena Nzambi mu disambila ne ku dibala mvese ya mu Bible. Diambuluisha dikuabu didi mua kufumina kudi bena mu dîku ne balunda badi batunange ne batukuatshisha.

TSHIVUA TSHIAMBULUISHE BAKUABU

Robert, udi ne bidimu 58 udi ufila mubelu eu: “Ikala ne ditabuja kudi Nzambi ne yeye neakuambuluishe bua kutantamena disama diebe. Sambila Yehowa. Umumvuije muudi udiumvua. Mulomba nyuma muimpe. Mulomba akupeshe bukole bua ukankamije bena mu dîku ne bua akuambuluishe bua utukije lungenyi luebe nansha mudi disama dikutonde.

“Bidi biambuluisha bikole padi bena mu dîku dienu pabuipi bua kukukuatshisha. Umue anyi babidi ba kudibu batu bambikila dituku dionso ku telefone bangebeja ne: ‘Udi bimpe anyi?’ Balunda banyi badi basombele miaba mishilashilangane batu bankankamija. Batu bushuwa bankolesha, ne bitu bingambuluisha bua kubenga kuteketa mu mikolo.”

Wewe muikale ne mulunda udi usama ne uya bua kumusamba, mona tshidi Linda uleja etshi: “Bushuwa, muntu udi usama utu musue pende kuikala bu bantu bonso, katu musue dîba dionso bua kuakula anu bua disama diende to. Nunku londayiku malu makuabu a pa tshibidilu.”

Bukole budi Nzambi utupesha, busambi butudi tupetela mu Bible, ne dikuatshisha dia bena mu dîku ne balunda badi batunange, bidi mua bituambuluisha bua kushala bashindike ne: muoyo udi ne mushinga, nansha padi disama dikole ditutatshisha.

Mvese ya mu Bible idi mua kukuambuluisha

Eyemena Nzambi.

“Ngakebeja Yehowa, yeye wakangandamuna. Wakansungila ku malu onso avua angenza buôwa. Mupuekele eu wakabikila, Yehowa wakamuteleja.”—Misambu 34:4, 6.

Linda utukadi batele udi wamba ne: “Tshitu nsambila ne: ‘Nzambi wanyi ngumvue koku bimpe to.’ Kadi ntu nsambila ne: ‘Ngambuluisha ngikale ne bukole, nkuatshisha bua kutantamena disama dianyi edi.’”

Bala Dîyi dia Nzambi bua dikukoleshe.

“Muntu nansha umue udi musombele mu ditunga kakuamba ne: ‘Ndi nsama.’”—Yeshaya 33:24.

Elangana meji bua milayi ya Nzambi idi itangila matuku atshilualua, kuenza nunku nekukupeteshe ditekemena didi mua kukupesha bukole bua kutantamana.

Lomba bena mu dîku ne balunda bua bakukuatshishe.

“Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.”—Nsumuinu 17:17.

Elise utukadi batele udi ufila mubelu eu: “Kuditodi pa nkayebe to. Itaba bua balunda bebe bakuambuluishe. Kudi mua kuikala misangu iudi udiumvua nkaya ne kuyi nansha mua kuela meji ne: Nzambi udi ukuteleja to, nansha nanku, kuditodi pa nkayebe to.”