Tushalayi ne mmuenenu muimpe
1 Ndisanka kayipu ditudi nadi pa kumona didiunda dia dikema mu matunga mavule! Pabi, tudi bamone ne: mu rejon mikuabo, bamanyishi ba Bukalenge badi bapetangana misangu mivule ne bipukapuka anyi mene buluishi bulelela ku mudimu wetu wa buambi. Mmunyi mutudi mua kushala ne mmuenenu muimpe pikalabi nanku mu teritware wetu? Mmushindu kayi utudi mua kuepuka diteketa, mmuenenu udi mua kutupangisha disanka anyi kubuitshidija mitalu yetu bua mudimu wa kuenza balongi?
2 Kuikala ne mmuenenu muimpe nekutuambuluishe bua kulama butshintshikidi. Nansha mu mateta, katuena ne bua kulekela ngenyi idi itekesha bua itukokeshe. Yezu mmutushile tshilejilu tshipuangane. Mbimueneke ne: amu bantu bakese tshianana ke bakitaba bivuaye ulongesha. Bavule bakalenduka ku dilongesha diende. Wakapetangana ne nsombelu ivua mibueje didikankamika diende mu diteta dikole. Bamfumu ba bitendelelu bakadiula mudimu wende ne kuela tshitungu bua kumushipa. Bakamutuila mata, bakamuseka, bakamukuma ne ndekelu wa bionso, e kumushipabo. Kadi, uvua upeta disanka mu mudimu uvuaye ukumbaja. Bua tshinyi? Uvua mumanye mushinga wa kuenza disua dia Nzambi ne kakalekela to.—Yone 4:34; 13:17; Eb. 12:2.
3 Tulamayi mmuenenu muimpe mu mudimu wetu: Bua kuwakaja, nebitukengela kuvuluka malu a bungi. Tuvuluke ne: tudi tumanyisha mukenji udi bantu ba bungi balengulula anyi bautuila nkanana. (Mat. 13:14, 15) Nansha pakabelelabo dîyi bua kulekela dilongesha pa kutumika ne dîna dia Yezu, bapostolo bakashala balamate ku bukenji buabo ne biakunowa biakatungunuka ne kuedibua mu diyeba. (Bienz. 5:28, 29; 6:7) Tudi badianjila kumanya ne: mu imue teritware, amu bantu bakese tshianana ke bumvua. (Mat. 7:14) Kadi tudi ne tubingila tua kusankidila pikala muntu nansha umuepele muteleje ne ntema. Tuvuluke kabidi ne: nansha baluishi badi ne bua kupeta mushindu wa kumvua mukenji eu. (Yehez. 33:8) Munkatshi muabo, bakuabo badi bashintuluka ne balua batendeledi ba Yehowa. Patudi ne mmuenenu muimpe mu mudimu wetu, udi utuala disankishibua nansha padi amu bantu bakese bateleja. Dimueneka dietu nkayadi mu mbanza ya bantu bua kubamanyisha mukenji wa Bukalenge bua Nzambi didi bumanyishi.—Yehez. 2:4, 5.
4 Tudi bushuwa ne tubingila tulenga tua kuikala ne mmuenenu muimpe. Dilubuluka dia mudimu pa buloba bujima ne disemena dia dikenga dinene bidi ne bua kusaka yonso wa kutudi bua kuenza muende muonso ne bua kusadila ne ditshina dia Nzambi. (2 Pet. 3:11, 14) Mudimu muenza ne mitalu munkatshi mua ngondo wa Luîshi newikale mushindu mulenga wa kuleja dianyisha dietu dia bitudi balonge. Tudi tujinga kabidi ne: bena mudimu netu bapiabapia batumikile mu mushindu udi ukolesha bidibo balonga. Pikala bamue ba ku batudi tulonga nabu Bible baye kumpala bua kukumbanabo mua kuikala bamanyishi badi kabayi banji kuangata batismo, ngondo wa Luîshi neikale kabiyi mpata tshikondo tshimpe tshitambe bua kubasaka ku dibanga dimanyisha Dîyi dia Nzambi.
5 Nansha bituikala bamanyishi anyi bampanda-njila, netupete buonso diambuluisha bitualama mu lungenyi se: Yehowa kêna utulomba bualu nansha bumue butunemene bujitu. (1 Yone 5:3) Mmutulaye bua kutukuatshisha. (Eb. 13:5b, 6) Tudi ne bua kuikala ne mmuenenu muimpe ne kutungunuka ne kumanyisha nansha mudiku bipukapuka ne buluishi bua bantu, bualu bidi disua dia Nzambi.—1 Tim. 2:3, 4.