Mmunyi mumvuabo bituikala katuyi tualukila bua kubatangila?
1 “Mmunyi mumvuabo kakuyi muntu udi ulongesha?” (Lomo 10:14, NW) Eyowa, mmunyi muajingululabo bulelela bituikala katuyi tuenza makumbula malenga? Muntu yonso utukadi bayukidile bua Bukalenge mmukumbanyine bua tuetu kumutangila pa kualukila. Mu ngondo eu, pamu’apa netuikale ne mushindu wa kuakula tshiakabidi pa tshiena-bualu tshia musangu mushale, pa kusakidila ngenyi ya mu Bible miangata mu broshire utuvua bamushile; ebi nebituambuluishe imue misangu bua kutuadija dilonga dia Bible.
2 Biwikala mushiye broshire wa “Ditekemena dishindika — Nudi mua kudipeta,” imue misangu nekuikale mushindu wa kutuadija diyukidilangana dikala mua kunufikisha ku dilonga dia Bible. Pa kuleja tshizubu, newikale mua kuebeja ne:
◼ “Udiku musue kuikala ne muoyo mu bulongolodi munudi, dîku diebe ne wewe muine, mua kuikala bapeshibue dishindika dia nsombelu wa ditalala mu matuku atshivuavua anyi? [Lekela muntu andamune, pashishe upite ku tshikoso 2.] Buonso buetu tudi tumvua dijinga edi, nansha mudi bavule bela mpata mudibi kabiyi mua kuenzeka dituku kampanda. Bua Nzambi, udi mulaye bua kuandamuna tshilota etshi ne kutshivuija bulelela, ebi ki mbualu bukole to.” Nubale Yeshaya 32:17, 18 mu tshikoso 2, peshi mu Bible webe. Pashishe, umvuije ne: pa buloba bujima, bantu bavule bakadi bumvua disanka ne ditalala dia mu tshieledi tshia lungenyi didi dipetesha ditekemena dia nsombelu mulenga mu matuku atshilualua. Nuyukile pa ngenyi ya mu Bible mimanyisha mu tshikoso 3, pashishe umvuije mukuyukidishi webe ne: dilonga dia broshire didi mua kumuambuluisha bua kumanya bivule. Bialejaye dijinga dia kumanya bia bungi, nupeshangane tshipungidi bua wewe kualukila lukasa bua nuenu kutungunuka ne diyukidilangana dienu.
3 Paudi uvua kutangila muntu tshiakabidi kunyima kua dimushila broshire wa “Y a-t-il un Dieu qui se soucie de nous?,” nebikale pamu’apa bilenga bua kuamba ne:
◼ “Mu dikumbula dianyi dia musangu mushale, tuvua bajuule lukonko elu: Kudiku Nzambi kampanda udi uditatshisha bua bualu buetu anyi? Udiku wela meji ne: Nzambi udi ututabalela bikumbane mushindu wa kutuisha ntatu ne tshikisu ku tshibungubungu anyi? [Lekela muntu andamune, pashishe ufile diumvuija pa tshikoso tshia 32.] Nzambi mmulaye bua kupingaja pa muaba wa bulongolodi ebu bubi bukuabu bupiabupia buenza ne bantu bimpe basomba mu ditalala. [Kubala Musambu wa 37:11.] Tuetu petu netuikale mua kusanganyibua mu bena bulongolodi ebu bupiabupia bituikala tuitaba tshidi Bible wamba ne tutumikila mibelu idimu.” Umvuija ndongoluelu mienza kudi Bantemu bua kuambuluisha bantu bua kulongabo Bible.
4 Patudi tuenza dikumbula dipiadipia kudi muntu uvua muanyishe broshire wa “Monayi, Ndi mvuija bintu bionso bipiabipia,” netuikale mua kuleja diambedi tshimfuanyi tshidi pa tshizubu, pashishe kuela lukonko elu:
◼ “Mmushindu kayi uudi ufuanyikija nsombelu mu bulongolodi buenza ne bantu bapuangane? [Lekela muntu umvuije.] Biwudi umona mu tshimfuanyi etshi ki ntshipeta patupu tshia difuanyikija mu lungenyi to; muanda eu mmushindamene pa malaya malelela mafunda mu Bible. [Bala Buakabuluibua 21:4 ne Musambu wa 37:11, 29.] Ndi musue kukumvuija mushindu uudi, pamue ne dîku diebe, mua kulabula masanka aa.” Pikala mukuyukidishi webe uleja dijinga dia kumanya bivule, utungunuke ne diyukidilangana ne umulombe bua anyisha dilonga dia Bible.
5 Patudi tupetangana ne bantu ba mmuenenu mujalame badi bakebakeba bulelela, tudi tuleja dinanga dietu dia bushuwa pa kualukila bua kubambuluisha mua kutumikila bidibo bumvue. Netutumike ne malelela mansantu adibo batupeshe bua diakalenga dietu dia kashidi ne dia aba badi batuteleja.—1 Tim. 4:16.