Tuambuluishe bakuabo bua bamanye bulelela
1 Yezu wakalua pa buloba bua kufila bumanyishi budi butangila bulelela. Wakibidija balongi bende bua kuikalabo balongeshi bua bamone mua kumanyisha bulelela kudi bakuabu. Bu muvuaye mutuishibue menemene ne: nebakumbaje bimpe mudimu wabu, wakababikila ne: ‘balongeshi ba patoke.’ (Mat. 13:52, NW) Wakafuanyikija yonso wa kudibo ne muntu mulongeshibue udi ne tshiuma tshia bushuwa tshivuaye mua kusunyinamu. Lelu’eu, balongi ba Yezu badi batumika ne dibeji dituta ku biamu bua kuendesha ne lukasa luonso bumanyishi bua Bukalenge. Tshilejilu, bisumbu bivule bidi ne broshire mishilangane bua kuambuluisha bantu nabu bua kulondabo Yezu. Mmunyi mua kutumika ne biamu ebi bia mushinga mukole?
2 Bua kutuadija diyukidilangana diafikisha ku dishila muntu broshire wa “Ditekemena dishindika — Nudi mua kudipeta,” newikale mua kuela lukonko elu:
◼ “Ukadiku mudiebeje bua tshinyi matekemena a kuikala ne nsombelu mulenga mu matuku atshilualua adi amueneka a patupu, nansha mudi bantu benza madikolela mavule anyi? [Lekela muntu andamune.] Bible udi umvuija bua tshinyi madikolela aa kaena afikisha ku tshipeta tshia nsongo.” Kubala Musambu wa 146:3, 4. Wewe mumane kuelangana meji ne muntu pa tshikoso 6, newikale mua kumuebeja ne: “Nnganyi udi bushuwa mukumbane bua kutupetesha dikubibua dia kashidi?” Bilondeshile diandamuna dia mukuyukidishi webe, udi mua kukonkonona imue ngenyi mikumbanyine ya mu tshikoso tshia 7, peshi kupeshangana tshipungidi bua kuvua kuakulapu mu dikumbula didi dilonda.
3 Mona umue mushindu wa kutumika ne broshire wa “Y a-t-il un Dieu qui se soucie de nous?”:
◼ “Bantu bavule bakadi badiebeje lukonko ludi kuinshi kua bimfuanyi ebi bibidi. [Bala lukonko ludi kuinshi kua dibeji 6 ne dia 7, ne lekela muntu andamune.] Bu mudi Nzambi wa dinanga kayi mua kuikala mfuki wa malu mempe ne mfuki wa malu mabi popamue, udi wela meji kayi bua dilaya diende didi mu Yeshaya 65:21-24?” Pikala mumvuija a muntu asokolola dijinga kampanda dia kumanya bia bungi, nenupite ku tshikoso tshia 37 bua kumvuija malu akumbajibua kudi Bukalenge bua Nzambi.
4 Biwikala ufila broshire wa “Tudi mua kutekemena masanka mapite adiku mpindieu!,” newikale mua kuamba ne:
◼ “Bavule badi bela meji ne: nsombelu wa bantu mmuenza anu ne midimu imue imue mitondeshi. Buebe wewe, bidi bikengela kuenza tshinyi bua kutambaye kulengelela? [Lekela muntu afile mmuenenu wende.] Bible udi uleja ne: Nzambi mmutulamine bintu bilenga bitambe. Mona tshidiye wamba mu Buakabuluibua 21:4, 5.” Pikalaku mushindu mukumbanyine, umvuije pashishe imue ngenyi ya mu tshikoso tshia 42 tshia broshire.
5 Pa kuleja broshire wa “Ikalayi ne muoyo wa kashidi ne disanka pa buloba!, ” mumanyishi nsonga mutekete neikale mua kuebeja ne:
◼ Udiku musue kuikala ne muoyo pa buloba bukudimuna mparadizu bu ebu anyi? [Leja tshizubu ne dibeji dia 32, ne lekela muntu andamune.] Dîku dietu ne meme muine tudi tutekemena nsombelu eyi, bilondeshile tshidi Bible wamba mu Yone 17:3.” Kunyima kua dibala mvese, bikala muntu umueneka uleja dijinga dia kumanya bia bungi, neumulombe dianyisha dia kumushila broshire bua amubale.
6 Biwikala utumika ne broshire mikuabu mu buambi mu ngondo eu, udi mua kuakaja mbuelelu yebe ne maleja ebe pa kushindamena pa ngenyi miambuluishi itudi tufuma ku dikonkonona eyi. Kupu muoyo bua kuakula mu mêyi makese ne kufila mumvuija malenga adi akankamija, bua kusonsola dijinga dia kumanya bia bungi dia mukuyukidishi webe.
7 Yehowa mmutusokoluele bulelela. Tudi ne bua kubabidila mpukapuka yonso idi imueneka bua kubumuangalaja, ku diambuluisha dia broshire ne mikanda ne pa kuyukila ne bantu batudi tupetangana nabu. Nunku, netuleje mutudi balongeshi ba patoke bua diakalenga dia kashidi dia bantu netu.—Mat. 28:19, 20.