Udi mua kudisangisha mu milongo ya bampanda-njila anyi?
1 Mu bidimu bitanu biashadi ebi, binunu bivule bia bampanda-njila ba pa tshibidilu bakangata dipangadika dia kuimanyika mudimu wabu. Udi pebe umue wa kudibo anyi? Pikalabi nanku, uvua bushuwa ne kabingila kajalame kawuvua mulekeele mudimu eu wa disanka. Imue misangu uvua muakame nsombelu kampanda mukole kayi muindila, uuvua kuyi mua kutshimuna. Kabingila aku katshidi anu kakupumbisha anyi? Biwikala muimanyike mudimu webe bua kusama, dipangila mfranga peshi majitu a mu dîku, nsombelu webe ki mmuanji kushintuluka anyi? Kuenaku ne mushindu wa kulongolola midimu yebe mushindu mushilangane bua kulabula tshiakabidi masanka adi afuma ku mudimu wa bumpanda-njila bua pa tshibidilu anyi? Ukadiku muele meji a kuenzulula dilomba anyi?
2 Anu muudi mubimanye, bua kupatula bipeta bilenga mu mudimu wa bumpanda-njila, bidi bia mushinga bua kudilongolola bimpe ne kuikala ne programe mujalame. Pa tshibidilu bu mudi anu dîba dikese dipeteka bua kujikija lutetuku, bimue bikondo bia didiolola bidi bitamba kupetesha masanka. (Nsum. 19:17; Bienz. 20:35) Pa kutungunuka ne kuenza bivule mu buambi, tudi tukubibua ku buenzeji bua bulongolodi ebu budi buzangika nsombelu wa budinangi ne mupepele. Yehowa udi ulaya se: neapuije mabenesha a mu nyuma pa aba badi ne nsombelu wa didipangisha amue masanka ne badi bateka Bukalenge pa muaba wa kumpala. Pa kusadila Yehowa ne mutshima mujima, tudi tudipetesha disanka dia bushuwa ne disankishibua.—Nsum. 10:22; Kolos. 3:23, 24.
3 Mudimu wa ku dîba ne ku dîba udi ne bua kuangatshibua bu disanka didibo mua kulabula anu kudi bungi bukese anyi? Tòo. Bu mutuvua balambule bumuntu buetu kudi Yehowa, buonso buetu tudi ne bua kudiebeja ne muoyo umue né kudi mushindu wa kudifila mu mudimu wa ku dîba ne ku dîba, kulekela anu bikala nsombelu wetu utupumbisha.—Mako 12:30.
4 Bikalabi bia bushuwa bua se: makanda ebe a mubidi ne majitu adi mu diumvuangana ne Mifundu kabiena bikumbana bua wewe kuikala mpanda-njila mu matuku aa, umanye ne: Yehowa mmumanye ne mmujingule dikenga diebe. Neakufute bua biwudi wenza ne lulamatu bilondeshile mushindu ne makanda biudi nabi. (1 Kol. 4:2; 2 Kol. 8:12). Mpindieu, biwikala ne mushindu wa kuikala tshiakabidi mpanda-njila, bua tshinyi kuena mua kuya kutangila mutangidi-muludiki bua wewe kuwuja dilomba?
5 Dîku dienu didiku mua kukuambuluisha anyi? Imue misangu uvua muimanyike mudimu wa bumpanda-njila bua kukumbaja majitu ebe a mu dîku. Bakuabu bena mu dîku dienu kabenaku mpindieu mua kukutuadila diambuluisha diabu, nunku wewe kumona mua kulua tshiakabidi mpanda-njila anyi? Bamue nebakengele anu kutuibua tshianza mu nyima bua kubambuluisha mua kukumbaja majitu a pa mutu bua kumonabo mua kuikala tshiakabidi bampanda-njila.
6 Dieleshangana dimpe dia diboko ne madikolela a pa mutu menza kudi bakuabu bena mu dîku bidi mua kufikisha ku muanda bu nunku. Badi mua kukuambuluisha ne mfranga peshi kukuelesha diboko bua mfranga ya difuta njila, peshi kudilongolola ku musangu ne ku musangu bua kukufila mu buambi. Kudi mishindu mikuabu ya kutuala diambuluisha. Biwikala kuyi mua kulabula tshiakabidi disanka edi dia mudimu bua nsombelu webe, imue misangu udiku mua kutuadila muena dîku dienu diambuluisha edi bu mudiye ne mushindu.
7 Bua tshinyi kanuena mua kubuyukila mu dîku? Muanda mupangadija wa mushindu’eu udi mua kukumbajibua binuasuika dîyi bua tshipatshila etshi. Biabuela mumanyishi mukuabu mu milongo ya bampanda-njila, dîku dijima nedikale mua kusanka bu muvuadi dienze tshiadi tshitupa. Kuambuluishangana ne kalolo mushindu’eu kakuakuvudija anu mfidilu wa bumanyishi mu teritware pa bidi bitangila Bukalenge, apo nekufikishe kabidi dîku ku ditamba kuikala mu buobumue mu nyuma.—Luka 6:38; Fil. 2:2-4.