Dilonga dia mukanda wa Buakabuluibua​—Nkomenu nedikuambuluishe

¹ Mu dibeji mudi tshiena-bualu tshia mukanda wa Buakabuluibua​—Nkomenu mudi miaku ya mu Buakabuluibua 1:3 ya ne: “Wa diakalenga ng’eu udi ubala ne dîyi dikole ne aba badi bateleja mêyi a mu mulayi eu.” (NW) Disanka dia Bantemu ba Yehowa lelu didi dienda divula bua dikumbana mu tshitupa tshinene dia milayi idi munda mua mukanda wa mu Bible wa Buakabuluibua. Lumvu luetu lutudi nalu lelu lua tshidi tshienzeka mu “dituku dia mukelenge” nduleja bimpe mu mukanda wa Buakabuluibua​—Nkomenu wabu munene ukadi pabuipi! (Buak. 1:10) Ku diambuluisha dia dilonga dia mukanda eu, tuvua bapete diumvuija ditokesha bimpe didi ditangila mianda idi yenzeka lelu, nangananga eyi idi itangila nsangilu wa pa buloba bujima wa bitendelelu bia dishima ne luendu lua bukua-bisamba bitangile ku Armagedone kabidi ne malu adi Yehowa wenzela bantu bende.

² Bua ba bungi ba kutudi, dilonga dia mukanda eu kadiakuila anu bua kutuvuluija malu atuvua balonge matuku mashale to, kadi nedikale kabidi mua kutokesha ngumvuilu wetu wa malu adi afikisha too ne ku dituku dikale Yehowa mua kutshimuna baluishi bende bonso nkong. Bantu binunu ne binunu badi balue Bantemu mu bidimu bibidi anyi bisatu bidi bishale ebi nebanyishe kakuyi mpata dilonga dia mukanda wa Buakabuluibua​—Nkomenu mu Dilonga dia Mukanda dia Tshisumbu.

³ Ikala udilongolola ne ubuela mu dilonga dia mukanda bua kufila mandamuna lumingu luonso, kutuadija mu dia 15 Luabanya 2004. Neulonge malu a bungi ne kabidi neupete mabenesha mavule paudi wenda upeta ngumvuilu mutoke wa malu adi mamueneke bimpe pa buloba bujima lelu ku diambuluisha dia butoke budi milayi idi mu mukanda wa Buakabuluibua ifila. Bushuwa tudi basue kukonkonona malu a mushindu eu, bualu etshi ke tshikondo menemene tshia kuakonkonona. Tuikalayi ne disanka bua mutudi tubala, tumvua ne tuelela meji pa mulayi eu udi utangila tshikondo tshietu etshi ne udi ulenga ku muoyo!