Tutungunukayi ne kumanyisha bakuabu malu a kukema a Yehowa

1. Mmalu a kukema kayi a Yehowa awutu musue bikole?

¹ Kakuena muntu utudi mua kufuanyikija ne Nzambi wetu munene Yehowa to! Davidi wakafunda ne: ‘Yehowa Nzambi wanyi, wakuvudija malu a kukema awakuenza ne malu awakupangadija bua kutuenzela; kakuena mukuabu utudi bamanye mua kuelekeja nebe.’ (Mus. 40:5) Mu malu manene a kukema a Yehowa aa tudi tusanganamu bifukibua biende bionso bia mu diulu ne pa buloba, Bukalenge bua Masiya, bienzedi bia bulenga kudi bantu bende, ne kabidi mudimu wa diyisha udi wenzeka pa buloba bujima. (Mus. 17:7, 8; 139:14; Dan. 2:44; Mat. 24:14) Dinanga bua Yehowa ne dianyisha bua bionso bidiye muenze bidi bitusaka bua kuambila bakuabu malu adi amutangila. (Mus. 145:5-7) Mu ngondo muisatu, muinayi ne muitanu, netupete mushindu wa kuenza nanku bikole menemene.

2. Mmasanka kayi atuapeta mu dikala bampanda-njila bambuluishi?

² Enza bumpanda-njila buambuluishi: Kudiku mushindu wa wewe kulongolola midimu yebe bua kuenza mêba 50 mu mudimu wa diyisha munkatshi mua ngondo umue anyi ya bungi ya mudimu wa pa buawu eyi anyi? Mushindu wonso uwalongolola malu neukuambuluishe bikole. (Ef. 5:16) Bantu ba bungi mbafike ku dimona se: bumpanda-njila buambuluishi mbubambuluishe bua kuakaja mushindu wabu wa kuyisha. Mbapete dikima dia bungi dia kuyukila ne bantu ku nzubu kuabu ne mbapete mushindu wa kuenza mudimu ne Bible bikole. Dipitshisha mêba a bungi mu buambi ndibambuluishe bua kutungunuka ne kuyukila ne bantu badi bateya ntema, ne bamue bavua kabayi ne dilonga dia Bible mbapete mushindu wa kulonga ne muntu mu tshikondo tshivuabu bampanda-njila bambuluishi. Bu mudi bumpanda-njila buambuluishi buikale bulomba diditatshisha bua bakuabu, bushuwa mudimu eu mmudimu wa disanka!​—Bien. 20:35.

3. Mmunyi muvua bamue bafike ku diangata bumpanda-njila buambuluishi nansha muvuabu mu ntatu?

³ Kuambi ne lukasa luonso ne: malu andi nawu kaena ampesha mushindu wa kuikala mpanda-njila muambuluishi to. Mukulu mukuabu uvua mpanda-njila muambuluishi tshidimu tshishale uvua ukolesha bana babidi ne wenza dituku dijima mudimu wa didikuatshisha nawu. Mmunyi muvua muanetu eu mufike ku dienza nunku? Bu muvuaye wenza mudimu mu lumingu lujima, uvua udilongolola bua kuenza dituku dijima mu buambi mu Disambombo ne mu Dia lumingu, uvua utuadija ne buambi bua mu njila pa dîba dia 7:00 wa dinda mu Disambombo. Bantu ba bungi mu tshisumbu bavua pabu ne midimu ya mushindu umue bakangata bumpanda-njila ne kueleshanganabu diboko ne bakuabu. Mu tshisumbu tshikuabu, muanetu mukuabu wa bakaji wa bidimu 99 wakalua mpanda-njila mu ngondo muitanu ku dilomba dia muanende wa bakaji uvua pende mpanda-njila. Bana betu bakuabu ba mu tshisumbu bakambuluisha muanetu wa bakaji mukulakaje eu bua kuyisha ku nzubu ne ku nzubu ne mu malonga a Bible benda bamupusa mu kakalu kende. Uvua kabidi mudifile mu diyisha dia ku telefone, dia mu njila ne mu difundilangana mikanda. Uvua mutuishibue ne: bionso ebi kabivua bienzeka ku bukole buende to, kadi bivua bienzeka nanku ku diambuluisha dia Yehowa.​—Yesh. 40:29-31.

4. Mmalu kayi atudi mua kutangila patudi tuenza programe wa bumpanda-njila buambuluishi?

⁴ Teta mua kuenza webe programe udi ukumbanangana ne nsombelu webe bimpe menemene. Programe mipepele idibu baleje mu numero eu idi mua kukuambuluisha. Utu wenza mudimu dituku dijima ne uya mu kalasa anyi? Programe udi muimanyine anu pa matuku a ndekelu wa lumingu udi mua kuambuluisha bikole. Wewe muikale ne masama ne kuyi mua kuenza mêba a bungi mu buambi, programe udi uleja bua kuenza mutantshi mukese dituku dionso udi mua kuikala muimpe be buebe wewe. Yukila ne bana betu bakuabu pa bidi bitangila dijinga diebe dia kuikala mpanda-njila muambuluishi. Pamu’apa badi mua kuikala pabu ne dijinga edi.

5. Mbimue bipatshila kayi bidi bana mua kudifundila mu ngondo muisatu, muinayi ne muitanu?

⁵ Mishindu idi bana mua kuenza pabu: Yehowa udi usanka padi bana bambila bakuabu malu ende a dikema. (Mus. 71:17; Mat. 21:16) Biwikale udi muana ne mumane kutambula, pamu’apa udi mua kuangata bumpanda-njila buambuluishi mu ngondo unuikala mu diikisha. Wewe kuyi ne mushindu wa kulua mpanda-njila muambuluishi, udiku mua kudifundila bipatshila bisunguluke bu mudi kuvudija mudimu webe ne kuulengeja mu ngondo eyi anyi? Biwikala utu upatuka mu buambi ne baledi bebe kadi kuyi muanji kuikala muambi wa lumu luimpe udi kayi mutambule, mpindieu ke tshikondo tshilenga tshia wewe kudiakaja bua kukumbaja ngikadilu milomba. Kabiena bikulomba bua wewe kuikala mupiluke mu diandamuna nkonko ya malu a mu Bible to, anyi kuikala mumanye malu a bungi bu mutu bantu bakole bakadi batambule bamanye nansha. Udiku mumanye malongesha a nshindamenu a mu Bible anyi? Udiku utumikila mikenji ya mu Bible ya malu a mu nsombelu anyi? Udi musue kulua Ntemu wa Yehowa anyi? Ambile baledi bebe dijinga edi. Buobu pabu nebambile bakulu bua kuyukila nebe bua kumanya ni udi ukumbaja ngikadilu milomba.​—Tangila mukanda wa Mudimu wetu, dib. 98-99.

6. Mmushindu kayi utudi mua kuambuluisha muntu utudi tulonga nende Bible bua kuluaye muambi wa lumu luimpe?

⁶ Tuambuluishayi bakuabu bua kuyishabu: Bantu batudi tulonga nabu Bible badi baya kumpala badi mua kukumbaja ngikadilu milomba bua kuluabu pabu bamanyishi ba lumu luimpe mu ngondo eyi ya mudimu wa pa buawu idi ilua kumpala eku. Wewe muikale ne muntu uudi ulonga nende Bible udi umueneka wenda uya kumpala, ambila mutangidi wa kasumbu kenu ka dilonga dia mukanda anyi mutangidi wa mudimu bua akuambuluishe. Umue wa kudibu udi mua kuya kakufila mu dilonga edi bua kuteta dimanya dia muntu eu. Bikala mulongi eu mukumbaje malu malomba, mutangidi-muludiki nealongolole bua bakulu babidi bayukile ne mulongi eu wewe muikalepu. (Tangila Tshibumba tshia Nsentedi tshia dia 15 Kasuabanga 1988, dibeji dia 17.) Diakamue padibu bamuanyishila, tuadija kumuibidija mu mudimu wa buambi.

7. Mmunyi mutudi mua kuambuluisha bantu batu bayisha batumpika ngondo anyi bakadi balekele mudimu wa buambi?

⁷ Batangidi ba tusumbu tua dilonga dia mukanda badi ne bua kuikala ne ntema ya pa buayi bua kuambuluisha muntu yonso wa mu kasumbu kabu udi uyisha utumpika ngondo anyi ukadi mulekele kuyisha. Nubalombe bua kunufilabu mu buambi. Bikalabu bakadi balekele kuyisha kukadi matuku mulongo, mbia meji bua bakulu babidi kuyukila nabu kumpala bua kumanya ni badi bakumbaja ngikadilu milomba. (Tangila Mudimu wetu wa Bukalenge wa Kasuabanga 2000 mu kazubu ka Mandamuna ku nkonko yenu.) Lukunukunu luikale nalu tshisumbu tshijima mu buambi mu ngondo eyi ya mudimu wa pa buawu ludi mua kubasaka bua kutuadijilulabu kabidi mudimu eu.

8, 9. Ntshinyi tshidi bakulu mua kuenza bua kusaka bakuabu ku mudimu mu tshikondo etshi tshia mudimu wa pa buawu?

⁸ Dilongolola mpindieu bua kuvudija mudimu webe: Bakulu, tuadijayi ku mpindieu bua kujula dijinga munda mua bena mu tshisumbu bua kuikala bampanda-njila bambuluishi. Nudi mua kuenza nunku ku mêyi malenga ne tshilejilu tshienu tshimpe. (1 Pet. 5:3) Mbungi kayi bubandile bua bampanda-njila bambuluishi bunuvua bapete mu tshisumbu tshidimu tshishale? Tshidimu etshi badiku mua kupita apu anyi? Batangidi ba dilonga dia mukanda ne babambuluishi babu badi ne bua kukeba mishindu ya kukankamija bamanyishi bonso ba mu kasumbu kabu bua kuvudija mudimu. Mutangidi wa mudimu udi mua kulongolola bisangilu bikuabu bua mudimu wa buambi. Numanyishe tshisumbu tshijima kumpala kua dîba malu anudi balongolole. Nulongolole bamanyishi bakumbane badi mua kulombola tshisangilu tshia mudimu wa buambi, kutshituadija pa dîba ne kutshijikija pa dîba kabidi. (Tangila Mudimu wetu wa bukalenge wa Kabitende 2001 mu kazubu ka Mandamuna ku nkonko yenu.) Mutangidi wa mudimu udi ne bua kulongolola bua teritware, bibejibeji ne mikanda bikaleku bungi bukumbane.

⁹ Tshidimu tshishale, bakulu ba mu tshimue tshisumbu bavua batuadije kudilongolola kumpala kua dîba ne kusengelela bana betu bua kuangata bumpanda-njila buambuluishi, ne ba bungi ba kudibu bavua buuje dilomba dia mudimu eu. Bavua balongolole bisangilu bia bungi bia mudimu wa buambi, tshimue pa dîba 5:30 wa dinda bua kuyisha mu njila, tshikuabu pa dîba 3:00 wa dilolo bua balongi badi bafuma mu kalasa ne tshisatu pa dîba 6:00 wa dilolo bua badi bafuma ku midimu. Kusakidila ku ebi, bisangilu bikuabu bisatu bivua bilongolola bua mu Disambombo. Ke bamanyishi 66 kufika ku diangata bumpanda-njila buambuluishi mu ngondo muinayi wa tshidimu atshi!

10.Mmunyi mudi bena mu mêku mua kudilongolola bua kuvudija mudimu wabu?

¹⁰ Kuenaku mua kuangata ndambu wa dîba mu dilonga dienu dia mu dîku dia musangu udi kumpala bua kuakula bua bipatshila bisunguluke bia kudifundila mu ngondo idi ulua eyi anyi? Buobu bumvuangane ne bafike ku dilongolola malu bimpe mu dîku, bamue anyi bena mu dîku bonso mene badi mua kulua bampanda-njila bambuluishi. Bikalabi kabiyi bikumbana, difundile nansha tshipatshila tshia kuenza mêba a bungi mu buambi mapite pa autu wenza pa tshibidilu anyi didifundile tshipatshila tshia kuyisha mu bikondo bikuabu kabidi. Sambilayi mu dîku dienu bua muanda eu. Nueyemene Yehowa batuishibue se: neabeneshe madikolela enu.​—1 Yone 3:22.

11. (a) Mmalu kayi a mushinga adi lufu lua Kristo lukumbaje? (b) Ndîba kayi ne muaba kayi wenzekela Tshivulukilu etshi mu tshisumbu tshienu?

¹¹ Bualu butambe bunene bua Nzambi: Bualu butambe bunene budi Yehowa muenze budi buleja dinanga diende kutudi ndifila dia Muanende bu mulambu bua kutupikula. (1 Yone 4:9, 10) Mulambu eu ke nshindamenu mukumbane bua kupikula bukua-bantu ku mpekatu ne lufu. (Lomo 3:23, 24) Mashi akapuekesha Yezu avua ajadika tshipungidi tshipiatshipia ne avuija bantu bapange bupuangane bu bana ba Nzambi ne tshipatshila tshia kuluabu bakalenge mu Bukalenge bua mu diulu. (Yel. 31:31-34; Mâko 14:24) Bualu bua mushinga mukole ngebu: nsombelu wa lulamatu lupuangane lua Yezu wakambuluisha bua kuvuija dîna dia Yehowa dinsantu. (Dut. 32:4; Nsu. 27:11) Mu Dia lumingu dia 4 ngondo muinayi, kunyima kua dîba dimane kubuela, Tshivulukilu tshia lufu lua Kristo netshienzeke pa buloba bujima.

12. Mmunyi mudi dibuela mu musekelelu wa Didia dia Mukalenge mua kuikala ne mushinga kudi bantu batu basankidila bulelela?

¹² Dienza musekelelu wa Didia dia Mukalenge didi ditumbisha malu a dikema a Yehowa. Muyuki wenzabu newimanyine pa mushindu utudi mua kuleja dianyisha bua mudi Yehowa mulongolole mulambu udi utupikula. Bantu batu basue bulelela nebamone kabidi mishindu mikuabu ya malu a kukema a Nzambi. Nebamone buobumue buetu ne dinanga dilelela didi Yehowa ulongesha bantu bende bua kuikala nabi. (Ef. 4:16, 22-24; Yak. 3:17, 18) Bu mudi dibuela mu tshibilu etshi dikale ne mushinga wa bungi mu meji a bantu, nunku tudi basue bua bantu ba bungi babuelemu.​—2 Kol. 5:14, 15.

13, 14. Nganyi utudi mua kubikila mu Tshivulukilu ne mmushindu kayi utuamubikila?

¹³ Bikila bakuabu bua babuelemu: Tuadija kufunda mpindieu mêna a bantu baudi musue kubikila pa dibeji. Mu dibeji edi muikale mêna a bena mu dîku diebe anyi dienu badi kabayi Bantemu, badi bena mutumba, bamanyangana nabu ba ku mudimu ne mu kalasa, bantu bauvua ulonga nabu Bible ku kale ne baudi ulonga nabu mpindieu, ne bantu bautu upinganyina bua kuyukila nabu malu a mu Bible. Batangidi ba dilonga dia mukanda badi ne bua kufunda mêna a bamanyishi bakadi balekele kuyisha.

¹⁴ Ukuate mudimu ne tubeji tua dibikila tuatumabu, ne ufundepu bimpe ku tshianza anyi ku mashinyi dîba ne muaba wenzekela Tshivulukilu. Anyi udi mua kuenza mudimu ne dibikila didimu dibeji dia ndekelu dia Tshibumba tshia Nsentedi tshia dia 15 Luabanya 2004 ne Réveillez-vous! wa dia 22 Luabanya 2004. Padi dia 4 a ngondo muinayi disemena pabuipi, vuluija bantu bena mêna auvua mufunde au pa kumonangana nabu mpala ne mpala anyi kubavuluijila ku telefone.

15. Mmunyi mutudi mua kudileja bakididianganyi ba dilambu mu dilolo dia Tshivulukilu?

¹⁵ Mu Tshivulukilu: Enza muebe muonso bua kufika kumpala kua dîba dilolo dia Tshivulukilu. Leja muudi muakididianganyi muimpe pa kuela bantu bapiabapia muoyo ne disanka. (Lomo 12:13) Udi ne bujitu bua pa buabu bua bantu bonso baudi mubikile. Ubakidile bimpe ne musangelu, ne udi mua kuenza bua bamanyangane ne bana betu bakuabu ba mu tshisumbu. Pamu’apa udi mua kubakebela muaba pabuipi ne muaba uudi musomba. Ne bikala bamue kabayi ne Bible anyi mukanda wa misambu, enza mushindu bua nuenza mudimu ne webe au anyi ne wa muntu mukuabu. Padi Tshivulukilu etshi tshijika, wikalaku ne ntema bua kuandamuna nkonko idibu mua kuela. Bikala bamue balue bua musangu wabu wa kumpala, udi mua kubakonka bikalabu basue bua kumanya bivule pa bidi bitangila Dîyi dia Nzambi ne malu adiye mulaye bantu. Balomba bua kulonga nabu Bible ku nzubu yabu.

16. Ntshinyi tshitudi mua kuenza bua kuambuluisha bantu badi babuela mu Tshivulukilu bua kudiunda mu nyuma?

¹⁶ Tungunuka ne kuambuluisha bantu bavua babuele mu Tshivulukilu: Mu mbingu idi ilonda kunyima kua Tshivulukilu, bantu bavua babuelemu badi mua kuikala dijinga ne diambuluisha. Mu bantu aba tudi mua kutela bavua babuele mu bisangilu tshikondo kampanda, kadi bua mpindieu, kabatshiyi babuelamu pa tshibidilu to. Bakulu badi ne bua kuikala ne ntema bua kutangila bikala bantu aba kabayi ne malu kampanda adi abapumbisha ne kukeba mua kumanya bua tshinyi kabena baya kumpala mu nyuma. Nubaleje mudi tshikondo katshiyi tshimpe bua kujingakana. (1 Pet. 4:7) Bambuluishayi bua bamone bulenga bua kutumikila mêyi a mu Bible adi atulomba bua kuikala tudisangisha pa tshibidilu ne basadidi ba Nzambi.​—Eb. 10:24, 25.

17. Bua tshinyi tudi ne bua kutungunuka ne kumanyisha bakuabu malu a kukema a Yehowa?

¹⁷ Malu a kukema a Yehowa nga bungi be bua tuetu kuumvua onso nansha tuetu mua kuikala ne muoyo wa kashidi. (Yobo 42:2, 3; Muam. 3:11) Nansha musangu umue, katuakufika ku dimanya malu onso a dikema a Nzambi atudi mua kumutumbishila to. Mu tshikondo tshia Tshivulukilu etshi ke mutudi mua kuleja dianyisha bua malu a dikema a Yehowa pa kuvudija mêba atudi tupitshisha mu mudimu wa buambi.

[Tablo mu dibeji 5]

Udiku mua kulua mpanda-njila muambuluishi pa kulonda umue wa ku programe eyi anyi?

Luabanya Dia lum Dim* Dib* Dis* Din Dit Dis Bungi mu ngondo

Dituku dionso 2 1 1 1 1 1 5 51

Matuku abidi 0 5 0 5 0 0 0 50

Anu ku ndekelu 5 0 0 0 0 0 8 52

kua mbingu

Tshisanga Dia lum Dim Dib Dis Din* Dit* Dis Bungi mu ngondo

Dituku dionso 2 1 1 1 1 1 5 50

Matuku abidi 0 0 0 0 5 5 0 50

Anu ku ndekelu 5 0 0 0 0 0 8 52

kua mbingu

Lumungulu Dia lum* Dim* Dib Dis Din Dit Dis* Bungi mu ngondo

Dituku dionso 2 1 1 1 1 1 4 51

Matuku abidi 0 5 0 0 0 0 5 50

Anu ku ndekelu 3 0 0 0 0 0 7 50

kua mbingu

* Atanu mu ngondo