Bible: Mpokolo wa dikankamija ne wa ditekemena mu bulongolodi busaluke
1 Bukua-bantu budi mu ntatu mivule lelu’eu; nunku budi bukengela dikankamija ne ditekemena. Amu Bible nkayende ke udi upetesha dikankamija dilelela. Udi utupesha ditekemena dia bulongolodi bupiabupia ne buakane. (Lomo 15:4; 2 Pet. 3:13) Mukanda wa Auxiliaire, mu dibeji dia 207, udi wamba nunku: “Bu kakuyi Bible, katuvua mua kumanya Yehowa, anyi masanka a dikema adi afumina ku mulambo wa bupikudi wa Kristo; bu yeye kayiku, katuvua mua kutamba kujingulula malu malomba bua kupeta muoyo wa kashidi mu Bukalenge buakane bua Nzambi anyi muinshi mua bulongolodi buende.”
2 Mu Lumungulu, netukoke ntema ya bantu nangananga pa mudimu wa Bible, Dîyi dia Nzambi, bua kubambuluisha mua kutantamena ntatu idi inundumuka mu bulongolodi bua malu ebu. Netubaleje Les Saintes Écritures — Traduction du monde nouveau pamue ne mukanda wa La Bible: Parole de Dieu ou des hommes? Tudi mua kuamba tshinyi bua kuambuluisha bantu badi badiakaje bua kuanyisha mushinga wa Bible?
3 Mumane kudimanyisha, udi mua kuamba nunku:
◼ “Kabiyi mpata, udi pebe mua kuikala witaba se: ntatu idi mitujingile idi anu yenda inyanga ditalala dia munda muetu. Nkuepi kutudi mua kupeta mibelu mikuatshishi idi ituleja mua kutantamena ntatu ya nunku? [Lekela andamune.] Ndi mumone se: Bible udi wandamuna ne dishindika ku dijinga edi bualu udi utulongesha mushindu wa kuikala ne disanka. [Bala Luka 11:28.] Tshipatshila tshia mudimu wetu ntshia kukankamija bantu bua kubala Bible ne kupetela masanka ku dilongesha diende. Mukanda eu udi bu tshiamu tshia dilonga dia Bible, La Bible: Parole de Dieu ou des hommes?, udi mua kukuambuluisha mu muanda eu. Tangila tshidiwu wamba pa bidi bitangila tshiledi tshia mivule ya ku ntatu ya bantu. [Bala tshiambilu tshibidi mu tshikoso tshia 9, mu dibeji dia 187.] Biwajinga kubala mukanda eu, nensanke bua kukushilawu.”
4 Udi mua kusungula bua kutumika ne dileja dipepele bu edi:
◼ “Tudi tudienzeja bua kukankamija bantu bua batambe kubala Bible, Dîyi dia Nzambi. Ndi musue kukushila trakte eu Bua tshinyi kueyemena Bible. Udi uleja bua tshinyi tudi mua kuangata Bible ne mushinga bua kupeta ditekemena dilelela dia bulongolodi butambe buimpe. [Tangila mu dibeji 6 ne bala Musambu wa 37:29 pamue ne tshikoso tshia ndekedi.] Ndi nkulomba bua kubala trakte eu ne mu dikumbula dianyi musangu ulualua neungambile mmuenenu webe pa ditekemena didi Bible ufila.”
5 Bamue bamanyishi nebasue pamu’apa kutumika ne dileja edi dia buludiludi bua kutuadija dilonga dia Bible:
◼ “Ndi nkukumbula bua kulonga nebe Bible ku mbelu kuebe kabiyi difuta mfranga. Bible mmufundisha ku spiritu wa Nzambi ne dilongesha diende didi mua kutuambuluisha bua kupingaja malu mu bulongame. Ngakuilu wa buena lelu wa Les Saintes Écritures — Traduction du monde nouveau mmukumbanyine bimpe bua dilonga dia muntu pa nkayende. Mbimueneke ne: nkudimuinu eu mmumanyike kudi miliyo ya babadi ba Bible pa buloba bujima. Suaku nkuleje mu mêyi makese mushindu uudi mua kutumika nende. [Bulula mu dibeji dia 1659 ne koka ntema pa mbuelelu 36A. Bilondeshile dijinga dia kumanya bivule didiye uleja, konkonona mvese umue anyi ibidi mifunkuna ne yukidilanganayi pa lungenyi ludimu. Umvuija mushindu wikala dikonkonona dia mvese mua kusokolola bidi Nzambi mulongolole bua kukumbaja ku butuangaji bua Bukalenge buende.] Nensanke bua kupingana kuyukila nebe tshiakabidi pa ditekemena dia Bukalenge.”
6 Bible udi mpokolo wa dikankamija ne wa ditekemena, ne udi ne bulelela budi mua kutufikisha ku muoyo wa kashidi. (Yone 17:3, 17) Pa kuabanyangana dimanya dia mu Bible ne muntu netu, tudi tusankisha Yehowa, “udi musue bua bantu ba mishindu yonso bapandishibue.”—1 Tim. 2:4.