Tubapeteshe mushindu wa kuteleja “musangu mukuabo”
1 “Netukuteleje pa bualu ebu musangu mukuabo.” (Bienz. 17:32) Ke muakamba bamue bantu kunyima kua muyuki muenda lumu wa Paulo pa kakunakuna ka Mars. Bia muomumue lelu, bamue badi bajinga kuteleja bia bungi pa bidi bitangila mukenji wa Bukalenge utuvua babamanyishe mu dipita dietu dia kumpala.
2 Tudi tuenza tshitupa tshinene tshia dilongesha dietu pa kupingana kukumbula bantu bua kuandamuna ku dijinga diabo dia kumanya bivule. Pa kudilongolola bimpe, netupete bipeta bimpe. Mukanda wa Manuel pour l’École udi ufila mibelu idi ilonda eyi mu dibeji dia 49: “Dianjila kumanya bimpe bijadikilu bifila ku diambuluisha dia diumvuija difila. Teta kujingulula bua tshinyi ne mushindu kayi udibi bitela. Dikolesha bua kumvuija ngenyi mu yebe miaku. Longa bua kumvua bimpe bijadiki bia mu Bible bia malu matela. Dilongolole bua kutumikila bimpe mvese mitela.”
3 Biwikala mushiya mukanda wa “La Bible: Parole de Dieu ou des hommes? ”, udi mua kuamba nunku:
◼ “Mu diyukidilangana dietu dishale, tuvua bakule pa tubingila tutudi natu bua kueyemena Bible. Mukanda umvua mukushile udi ujula lukonko elu: ‘Bua tshinyi kubala Bible? ’ [Bala mbangilu mu dibeji 5 ne lekela muntu andamune ku lukonko lua ndekelu.] Bible udi utuambila ne: Nzambi yeye nkayende ulualua mu katupa kîpi emu kujikija ntatu yonso idi izengeja bukua-bantu ne udi utuludika mu njila utudi ne bua kuendela bua kupeta masanka alua kututuadila tshikondo etshi tshia disanka. [Bala Musambu wa 119:105.] Mukanda eu udi muambuluishi mulongolola bua dilonga dia Bible dia muntu pa nkayende anyi mu dîku. Nensanke bua kukuleja mushindu wa kutumika nawu.”
4 Paudi upingana kukumbula bauvua mushile trakte wa “Bua tshinyi kueyemena Bible,” udi mua kuamba nunku:
◼ “Tudi tuditatshisha buonso pa bidi mua kutuluila matuku atshilualua. Kadi pa kumona nsombelu udiku pa buloba bujima mpindieu, buebe wewe, ntshinyi tshidi mua kuenzeka? [Lekela andamune.] Bantu badi amu mua kutshinka malu enzeka, pabi Nzambi mmumanye bu mudibi tshienzeka pashishe. [Bala Yeshaya 46:10.] Pamu’apa neukeme pa kumanya se: Bible mmudianjile kumanyisha ne: tukadi pa kupeta nsombelu wa disanka mu bulongolodi bupiabupia mu mparadizu. [Bala tshikoso tshia kumpala mu dibeji 5.] Ndi nkulomba dianyisha bua kukumanyisha bivule pa dilaya edi dilenga ditambe.”
5 Paudi ukumbula muntu uuvua mushile “Traduction du monde nouveau,” pamu’apa neubabidile ku lungenyi lufila elu:
◼ “Mvua mukushile Bible musangu mushale ne mukulaye bua kupingana bua kukuambuluisha mua kutumika nende bimpe. Bidi mua kufika bua tuetu kudiebeja mushindu utudi mua kulama malanda a bulunda ne muntu netu. Bible udi utupesha mibelu ya mushinga mukole, ne ku diambuluisha dia Traduction du monde nouveau mbitambe kupepela bua tuetu kupeta bitudi tukengela. [Bulula mu mabeji 1543-4 ne tangila mbuelelu “amour.” Koka ntema yende pa mvese bu mudi 1 Kolinto 13:4; Kolosai 3:14 ne 1 Petelo 4:8. Umvuija mu mêyi makese mushindu udi kutumikila mêyi-maludiki aa mua kupatula bipeta bitambe buimpe.] Mona tshimue tshilejilu tshia njikijilu mulenga wa ntatu udi Bible ufila bua kutantamena ntatu yetu. Musangu ulualua, nensanke bua kukuleja mushindu mukuabo udi Bible mua kutuambuluisha bua kupeta diakalenga ne ditalala dia mu lungenyi.”
6 Kakuena tshimue tshiuma tshia mushinga tshitudi mua kuabanyangana ne muntu netu tshipite dimanya dijalame dia Dîyi dia Nzambi. Dimanya edi didi mua kupetesha bantu ditshina dia Yehowa ne kubakankamija bua kuenda mu njila wende, ke bidi bipetesha masanka a kashidi.—Nsum. 2:20, 21.