Didilongela: Bualu budi buakanyine ntema yetu
1 Buetu tuetu, ntshinyi tshidi bualu bua mushinga budi buakanyine ntema yetu? Eyowa, tudi ne bua kuditatshisha nangananga bua kusuika ne kulama malanda makole ne Yehowa. Didilongela didi tshishimikidi tshia kumpala bua kuibaka malanda a nunku. Lelu’eu, bakese ba kutudi ke badi ne mushindu wa kupitshisha mêba a bungi ku dieleela meji ne ku didilongela. Nansha bia munyi, bituapanga kubala pa tshibidilu Dîyi dia Nzambi, tudi mua kuteketa mu mushindu wa kupanga bukole bua kutantamena mmuenenu wa bulongolodi ebu ne majinga a ku mubidi adibu buzangika.
2 Tujingayi bikole Dîyi: Patuakajingulula malongolola a Nzambi bua musangu wa kumpala, tuvua bushuwa ne muoyo kulukulu bua kupeta dimanya dipitshidile. Pabi, kunyima kua katupa kîpi dijinga dietu dia kudia mu nyuma didi mua kuikala dimane kukepela. Pamu’apa tudi tukengela “kujinga bikole” biakudia bia mu nyuma. (1 Pet. 2:2) Mmushindu kayi utudi mua kukolesha dijinga edi?
3 Dipembu dia tshiakudia kampanda tshitudi basue didi mua kutuenza dijinga dia kudia bualu didi dituvuluija bintu bisheme. Mêba mîpi a didilongela adi mua kuikala ne bipeta bia muomumue mu malu a mu nyuma. Pa kusankidila bua kudia bimue biakudia bia mu nyuma bia dipembu, tudi mua kupeta muoyo bua kudia malelela matambe kuondoka. Disankishibua didi difumina ku dimanya ditudi tupeta didi mua kutukankamija bua kumbula bikole mu Dîyi dia Yehowa.
4 Tudifundile programe udi muakanyine: Padi bamue badilamine dilolu dijima bua didilongela diabu, bakuabu mbasungule bua kupitshisha bikondu bîpi, kadi misangu mivule. Bituamona se: mbipepele bua kudilongela mu dinda dîba dimpe, pamu’apa netupangadije bua kulonga kumpala kua kunua tshiayi. Bikala lungenyi luetu luzanzuke ku dilolu, tudi mua kusungula bua kulonga kumpala kua kulala. Nansha bishi, tshidi ne mushinga ntshia se: dilonga edi dienjibue pa tshibidilu ne tunemeke programe udi muakanyine bimpe bitudi tukengela.
5 Padibu batukankamija bua kutamba kulonga, pamu’apa tudi ne lukasa lua kuamba ne: tukadi bamane kuikala ne programe mûle tente. Kadi, muntu yonso udi ne bua kuikala ne bululame padiye ukonkonona mushindu udiye utumika ne dîba diende. Tudi tupitshisha dituku dionso mêba a bungi bua kubandila televizion anyi? Tudiku badiakaje bua kulekela amue majinga etu nkayetu anyi? Ku dikonkonona dilelela dia mushindu utudi tutumika ne dîba dietu, netufike pamuapa ku dijingulula se: tudi ne mêba a bungi dituku dionso atudi mua kufila mu mushindu mukuatshishi ku didilongela.—Ef. 5:15, 16.
6 Dilonga dia Dîyi dia Nzambi ndikumbanyine ntema yetu yonso. Netupeteleku masanka makese bituasua kuenza bunga bualu dîba dimue dimue adi. Bituikala ne ngikadilu wa kulonga eku tudia, tuteleja tshisanji anyi tubandila televizion, katuakufika ku dishindamena pa bitudi tukeba mua kulonga. (1 Tim. 4:15) Nunku, tulekele ku luseke mpokolu yonso wa ditanaja.—Tangila Manuel pour l’École, mabeji 32-3.
7 Bidi ne mushinga bua kulonga ne kutumikila dituku dionso mibelu idi Bible ufila, bualu ku diambuluisha diende ke kudi Yehowa utulombola. Tuikale ne tshipatshila tshia kubueja menemene mu mitshima yetu bulelela budi mu mikanda. Tubabidile bikondu bionso bua kubala, kukonkonona anyi kueleela meji pa ngenyi ya mu nyuma, nansha bituikala amu ne dîba dikese bua kuenza nunku.—Dut. 6:6-8; Kolos. 1:9, 10.