Tuikalayi amu ne mudimu wa bungi

¹ Basadidi ba Yehowa badi ne bia bungi bia kuenza. Badi ne majitu a bungi a kukumbaja mu mêku abu, ku mudimu ne mu tulasa. Kusakidila pa bionso ebi, badi amu ne “mudimu wa bungi mu mudimu wa Mukalenge.” (1 Kol. 15:58, NW) Bidi bikengela bua tuetu kulongolola bisangilu bia ku lumingu bia tshisumbu ne kubuelamu. Tudi bakankamijibue bua katupitshishi lumingu katuyi bapatuke mu buambi. Tudi ne bua kudilamina dîba dikumbanyine bua kulonga pa tshibidilu Bible pa nkayetu ne mu dîku. Bakulu ne basadidi ba midimu badi ne majitu a bungi mu tshisumbu. Imue misangu, badi batulomba bua kuambuluisha badi bakengela diambuluisha.

² Bitu bienzeka ku musangu ne ku musangu bua bamue ba ku tuetu badiumvue bu badi ne bia bungi bidibu ne bua kuenza bibapite. Pabi, bantu badi batamba kuikala ne bia bungi bia kuenza badi mua kuikala munkatshi mua aba bena disanka ditambe bunene, pa kushala ne nkatshinkatshi ne pa kulama mmuenenu muimpe.—Muam. 3:12, 13.

³ Mupostolo Paulo uvua muntu uvua ne mudimu wa bungi. Nansha muvuaye udipetela bivuaye ukengela pa kuenza ntenta, wakadifila ne kasuki kupita bakuabu bapostolo. Wakadileja mumuangalaji wa evanjeliyo ukena upungila, uyisha mu bantu ne ku nzubu ne ku nzubu, kadi kayi ulengulula majitu ende a mulami munkatshi mua tshisumbu tshia mikoko. (Bienz. 20:20, 21, 31, 34, 35) Nansha muvuaye ne dîba difinakane, Paulo uvua amu mudiakaje bua kuenza bipitshidile mu mudimu wende bua Yehowa.—Tangila Lomo 1:13-15.

⁴ Paulo wakalama nkatshinkatshi wende ne mutshima wa disanka pa kushindamena pa bukole buvua Yehowa mua kumupesha. Ku mêsu kuende, mudimu wende uvua ne kenzela kawu ne uvua upetelaku disankishibua. (Fil. 4:13) Uvua mumanye se: Nzambi kakupua mudimu wende muoyo. (Eb. 6:10) Disanka dia kuambuluisha muntu nende bua amanye Yehowa divua dimusaka. (1 Tes. 2:19, 20) Dishindika divuaye nadi dia kumona ditekemena diende diashila pa Bible dikumbana divua dikuatshisha disuminyina diende.—Eb. 6:11.

⁵ Bia muomumue, tutangile masanka adi mudimu wetu mua kutupetesha. Dikalaku dietu ne dienza tshietu tshitupa mu bisangilu bia ku lumingu bidi bituibaka ne bikankamija bakuabu. (Eb. 10:24, 25) Madikolela malelela atudi tuenza bua kumanyisha bantu buonso lumu luimpe adi apetesha tshisumbu mushindu wa kudiunda, bualu tudi tulonda disankidila didi bantu baleja ne tuambuluisha bapiabapia bua kudisanga kutudi. (Yone 15:8) Pa kukolesha mu maboku buonso badi bakengela, tudi tusuikakaja bikole bisuikidi bietu ne tulubuluja mmuenenu wa buena dîku munkatshi mua tshisumbu. (Yak. 1:27) Pa mutu pa bionso, amu bu Paulo, katupu muoyo nansha kakese ne: pa kuditua mu dienza midimu mimpe tudi tusankisha Yehowa Nzambi. Tudi tuangata bu disanka dinene dia mudimu pa kumusadila. Buetu tuetu, kakuena nsombelu muimpe mutambe kupita eu.

⁶ Pa kuikala ne mudimu wa bungi, tudi tudipetela disanka dikuabu. Dîba ndimueneke bu didi dipita ne lukasa luonso patudi tulonda programe muimpe wa mu nyuma. Pa kumanya se: dituku dionso didi dipita didi ditusemeja pabuipi ne bulongolodi bupiabupia, netuanyishe ne disanka nsombelu mûle ntente utudi nende mpindieu. Tudi tumanya kabidi ne: mbia meji bua kushala ne bia kuenza, bualu netuikale nunku ne dîba amu dikese dia kulondakaja bipatshila bia patupu bia mu bulongolodi ebu.—Ef. 5:15, 16.

⁷ Bushuwa, kudi bia kuenza bia bungi mu mudimu wa Mukalenge. Kadi tudi mua kusanka bituatungunuka ne kueyemena Yehowa Nzambi ne Yezu Kristo, badi bobu batukankamija ne batufuta.—Mat. 11:28-30; 1 Yone 5:3.