Tukankamije bantu netu bua balue balongi bende

¹ Paulo wakafunda, mu 1 Kolinto 3:6 ne: ‘Meme nakakuna bintu, Apolo wakabimiamina mâyi, kadi Nzambi wakabidiundisha.’ Wakatumika ne tshimfuanyi etshi bua kuambuluisha bana babo bua kujingulula dikengela dia kutumika mu buobumue ku bulombodi bua Kristo. Ku mêyi aa, wakabambuluisha kabidi bua kumanya muaba wa mushinga uvuabo nawu mu mudimu munene wa kukuna ne kumiamina mâyi.

² Mudimu eu wa dipandisha udi ne bua kutua ku tshibungubungu mu tshikondo tshietu etshi. Tuetu badi bena nkristo, tudi ne bujitu bua kuambuluisha bantu netu bua kulua balongi ba Yezu. (Bienz. 13:48) Mmushindu kayi utualonda dijinga dia kumanya bivule dijula ku diambuluisha dia mukanda wa Le plus grand homme de tous les temps?

³ Biwapingana kukumbula muntu uvua muangate mukanda, udi mua kuamba ne:

◼ “Musangu mushale utuvua bamonangane, tuvua bayukile pa ngikadilu ya bu-muntu bua Yezu. Mvua ne disanka pa kukushila mukanda wa Le plus grand homme de tous les temps. Ntshinyi tshidi tshitamba kukulenga mu dilongesha ne bu-muntu bia Yezu?” Lekela andamune. Tangila mu nshapita wa 113, ne akula pa tshilejilu tshilengele tshia budipuekeshi tshishiya kudi Yezu. Bala Filipoi 2:8 bua kuleja mushindu uvua mupostolo Paulo wangata ngikadilu wa budipuekeshi wa Yezu. Apu, udi mua kujadika mudiku mushindu wa kulonga bipitshidile ku diambuluisha dia dilonga dia Bible pa tshibidilu.

⁴ Neusungule pamu’apa mbuelelu eu:

◼ “Tuvua bakule pa midimu mienza kudi Yezu tshikondo tshivuaye pa buloba ivua ileja mudiye bushuwa uditatshisha buetu. Buebe wewe, neenze tshinyi ndekelu wa bionso bua kufila disulakana kudi aba bavua bakenge bikole?” Lekela andamune. Bulula mukanda mu nshapita wa 133, ne konkonona ngenyi ya mu tshikoso tshitanu. Leja tshimfuanyi tshia mu dibeji didi dilonda ne umvuija muikala nsombelu wa bantu pikala disua dia Nzambi mua kuenzeka pa buloba bu mukadidi dienzeka mu diulu. Zangika masanka atudi mua kupeta pa kulongelamu bipitshidile.

⁵ Bikala dijinga kadivua dikumbane bua kushiya mukanda musangu wa kumpala, pamu’apa kudi mua kuikala mushindu wa kubanga diyukidilangana nunku:

◼ “Ndi ngela meji ne: udi witaba se: bantu ba bungi lelu’eu badi baludika nsombelu wabo pa kulonda muntu udibo bangate bu tshitembelu. Yezu Kristo udi tshitembelu tshimpe tshitambe bikuabo bionso bitudi mua kulonda. Ndi musue kukumanyisha dilongesha dia mushinga dindi mupete pa kulonga tshilejilu tshishiya kudi Yezu. [Tangila mu nshapita wa 40 mu mukanda wa Le plus grand homme ne koka ntema pa dilongesha dia dilekelela dilenga dia Yezu.] Dilongesha edi ndivuluije bikole mudibi bikengela bua meme kuleja muntu nanyi ngikadilu eu.” Bala Matayo 5:7. Pikala dijinga dia kumanya bivule dimueneke bu didiunde mpindieu, udi mua kumulomba bua kuangata mukanda, anyi broshire wa Dieu se soucie-t-il vraiment de nous?

⁶ Anyi pamu’apa neusue kuteta dileja dia buludiludi edi:

◼ “Musangu mushale umvua mulue, tuvua bayukile pa mushinga wa kulonga bua kumanya Yezu. Tudi tubala mu Yone 17:3 (NW) ne: dipeta dimanya edi ‘didi diumvuija muoyo wa kashidi.’ Mmunyi mutudi mua kudipeta?” Lekela andamune. Tungunuka pa kumvuija mushindu udi dilonga dia Bible dienzeka ne mushindu wa kubabidilaku.

⁷ Paulo udi wamba patoke ne: munowi yonso ‘neangate difutu bu mudi mudimu wende mene.’ (1 Kol. 3:8) Bituenza madikolela bua kuambuluisha menemene bantu netu bua kulua balongi ba Kristo, bushuwa difutu dietu nedikale dinene.