Tubikilayi muntu netu bua kulonda muntu mutambe bunene
1 Bilondeshile Matayo 5:14 (NW), Yezu wakambila balongi bende ne: “Nudi butoke bua bukua-bantu.” Buobo aba bavua ne bua kuakula miaba yonso bua Bukalenge bua Yehowa ne bua malongolola muule tente ne dinanga adiye muenze bua lupandu, ku butuangaji bua Yezu. Ne mudimu eu mu lungenyi, netufile mukanda wa Le plus grand homme de tous les temps mu Kabalashipu. Monayi imue ngenyi ituasua pamu’apa kulonda.
2 Mumane kudimanyisha, udi mua kuamba mu mêyi ebe bidi bilonda ebi:
◼ “Bavule badi badiebeja ne: Yezu uvua muntu wa mushindu kayi pakaluaye pa buloba. Buebe wewe, nku malu kayi kuvuaye mushilangane ne bakuabo? [Lekela andamune.] Mukanda udi ukoka ntema eu, wa Le plus grand homme de tous les temps, udi ulonda malu manene a mu nsombelu wende ne mu mudimu wende ne udi utuambuluisha bua kujingulula né uvua muntu wa mushindu kayi. Bamane kuubala, bamue bakadiumvua bu bavua nende pamue, babanyangana nende makenga ende, ne bu bavua bantemu ba mudimu wende.” Koka ntema pa tshimfuanyi tshia kumpala tshia mu mukanda padi tshiena-bualu. Pashishe, leja mbangilu, ne bala tshikoso tshibidi muinshi mua ka-tshiena-bualu “Apprenons à le connaître, pour notre bien.” (Tulonge bua kumumanya, bua diakalenga dietu.) Bikala muntu muleje disankidila, umuleje mukanda.
3 Udi kabidi mua kuamba ne:
◼ “Pa kumona malu wonso mabi adi enzeka pa buloba bujima, bamue badi badiebeja bikala pamu’apa Yezu uditatshisha buetu bushuwa. Udi wela meji bishi?” Lekela muntu andamune. Bulula mukanda wa Le plus grand homme mu nshapita wa 24 ne leja mu mêyi makese bua tshinyi Yezu wakalua pa buloba. Pashishe, bala Yone 15:13 pa kuzangika dinanga dilelela dia Yezu bua muntu nende. Vuluka bua wikale ne bibejibeji bipiabipia, broshire anyi trakte mukumbanyine, bua kupesha muntu pabengaye kuangata mukanda.
4 Mona lungenyi lukuabo:
◼ “Bavule ba ku bansonga badi bakeba tshitembelu tshia kulonda, kadi bitembelu bimpe mbibale. Yezu Kristo mmutushile tuetu buonso tshilejilu tshipuangane. [Bala 1 Petelo 2:21.] Nsombelu wende mujima uvua mushindamene amu pa ntendelelu wende bua Tatuende wa mu diulu. Buebe wewe, ntshinyi tshidi mua kuenzeka bu bantu bavule ne bua kuenza madikolela bua kumuidikija?” Lekela muntu andamune. Konkonona tshikoso tshisatu mu dibeji dia mukanda didi kumpala kua dia ndekelu, mudibo bafunde ngikadilu ya Yezu. Umvuija mushindu udi mukanda wa Le plus grand homme mua kuambuluisha yonso wa kutudi bua kulua bena nkristo ba tshitembu.
5 Pamu’apa neusue kutumika ne lungenyi bu elu:
◼ “Patudi tutela Yezu Kristo, bavule badi bamumona bu muana wa katoto, anyi bu muntu ukadi pa kukula muoyo. Ngenyi yabo pa Yezu idi ishikila amu pa diledibua diende ne pa lufu luende. Misangu mivule, kabena batela malu mimpe avuaye muambe ne muenze mu nsombelu wende. Bivuaye mukumbaja mbitangile bantu buonso bavua balue ku muoyo. Bua bualu ebu, mbia mushinga bua tuetu kukeba bua kumanya bipitshidile pa bidi bitangila malu a dikema avuaye mutuenzele.” Bala Yone 17:3. Leja dibeji dia kumpala dia mbangilu wa mukanda wa Le plus grand homme ne bala tshikoso tshinayi. Jadika se: kudi mushindu wa kupeta mukanda eu ne leja mushindu wa kutumika nawu bua dilonga dia muntu pa nkayende.
6 Tutabalele bua kufunda disankidila disangana ne mikanda mishiya, bua kulongolola makumbulula. Patshidiku dîba apa, tukebulule ne disuminyina bantu badi badiakaje bua kuteleja, ne tubambuluishe bua kulua balongi ba Mupandishi wetu, Yezu Kristo.—Mat. 16:24.