Tuyishe “bantu ba mishindu yonso”
1 Patudi tupetangana ne bantu ba nshidimukilu kabukabu ne ndongeshilu mishilashilangane ya bitendelelu, tudiambile mundamunda ne: Yehowa mmusue “bua bantu ba mishindu yonso bapandishibue ne bafike ku dimanya dijalame dia bulelela.” (1 Tim. 2:4, NW) Pa kumbusha trakte mivule ne broshire mifunda nangananga bua bualu ebu, tudi kabidi ne mikanda milenga ibidi itudi mua kutumika nayi dîba kayi dionso bua kuambuluisha bantu badi bitendelelu biabu kabiyi bibalongeshe bulelela pa bidi bitangila Nzambi ne Kristo.
2 Mukanda wa L’humanité à la recherche de Dieu udi uleja mu tshikoso mushindu wakatuadija bitendelelu binene bia pa buloba; nunku udi mua kuambuluisha bantu ba nsombelu yonso bua kuelekeja mitabuja abu ne tshidi Bible ulongesha pa bidi bitangila Nzambi umuepele mulelela. Mukanda wa Muntu mutambe bunene wa katshia ne katshia, bualu udi ukoka ntema pa nsombelu wa Yezu Kristo, udi mua kuambuluisha muntu bua kumanya bimpe muana wa Nzambi ne kukokibua kudiye, bu muakakokibua bantu ba bungi mu siekele wa kumpala. (Yone 12:32) Nenku, tutetayi ngenyi-mifila idi ilonda eyi musangu wonso utuamona se: mbiakanyine bua kufila mikanda eyi:
3 Biwela meji se: nebikale bimpe bua kuleja mukanda wa “Muntu mutambe bunene,” ela lukonko elu:
▪ “Ndungenyi kayi luudi nalu paudi wela meji bua Yezu Kristo? [Lekela muntu andamune.] Bafundi ba mianda ya kale badi bitaba ne: Yezu uvua muntu mutambe bunene wa katshia ne katshia. [Tela tshilejilu tshiangata mu mbuelelu wa mukanda wa Muntu mutambe bunene.] Bible udi uleja ne: nsombelu wa Yezu ntshitembelu tshia kulonda bua bantu.” Bala 1 Petelo 2:21 ne tshikoso tshia kumpala tshia mu dibeji dia ndekelu dia mbuelelu wa mukanda wa Muntu mutambe bunene. Bikala mukuteleji muanyishe bua kulonga bivule pa Yezu, muleje mukanda eu. Kumpala kua kumbuka, bala Yone 17:3 ne ebeja ne: “Mmushindu kayi utudi mua kupeta dimanya edi didi difikisha ku muoyo wa kashidi?” Pungayi nende dîyi bimpe bua kualukila bua kufila diandamuna ku lukonko elu.
4 Mu dikumbulula diebe, bua kumvuija mushindu wa kupeta dimanya didi difila muoyo, udi mua kuamba bu tshilejilu ne:
▪ “Mvua mulaye bua kualukila bua kukuleja mushindu utudi mua kupeta dimanya didi difikisha ku muoyo wa kashidi.” Muleje mukanda wa Dimanya, ne uleje mushindu wa kuulonga pa kutumika ne nshapita wa kumpala.
5 Biwajinga kufila mukanda wa “L’humanité à la recherche de Dieu,” tuadija ne lukonko elu:
▪ “Lelu’eu kudi bitendelelu bivulavulayi: ukadiku mudiebeje mushindu wa mua kumanya tshitendelelu tshidi Nzambi muanyishe anyi?” Mumane kuteleja diandamuna, bulula mukanda wa L’humanité à la recherche de Dieu mu dibeji 377. Zangika kanungu ka 7, ne ebeja muntu bikalaye wela pende meji ne: ntendelelu mulelela udi ne bua kusanga bantu ba makoba onso mu buobumue. Angata umue wa ku mvese mifila ne umvuija kanungu kakuabu mu mulongolongo eu bikalaku dîba. Bikala muntu uleja dijinga dilelela dia kumanya, muleje mukanda eu. Dîba dia kumbuka, udi mua kujula lukonko elu: “Ntendelelu mulelela udi ne bua kuikala ne buenzeji kayi pa bikadilu bia benamu?” Pungayi dîyi bua ulue kuandamuna ku lukonko elu.
6 Paudi walukila bua kumvuija buenzeji budi ntendelelu mulelela ne bua kuikala nabu pa nsombelu wa benamu, udi mua kukonka ne:
▪ “Bua diebe dimona, ntendelelu udi ne bua kuikala ne buenzeji pa bikadilu bia benamu anyi? [Lekela muntu andamune.] Kristo mmutupeshe dîyi-dikulu didi mua kuambuluisha bua kujoja ntendelelu.” Bala Matayo 7:17-20 buludiludi mu mabeji 12 ne 13 a mukanda wa L’humanité à la recherche de Dieu. Pashishe ulombe muntu bua abale tshikoso 20 mu mabeji 13 ne 14. Bikalaku dîba, yukidilanganayi pa bikoso 25-29 mu mabeji 16-18. Nunku netuikale pamu’apa mua kutuadija dilonga mu broshire wa Utulomba, anyi mu mukanda wa Dimanya.
7 Mushindu wa kutuadija diyuki: Kudi bintu bivule bidi biambuluisha bua kulongesha nabi mu mukanda wa L’humanité à la recherche de Dieu, bidi mua kuambuluisha bua kutuadija diyuki mu dikumbula dia kumpala, anyi mu dikumbula dialonda. Tudi mua kutuadija diyuki mu diela anu lukonko lua meji. Tshilejilu, mona nkonko misungula ne biena-bualu bidi biumvuija mu mabeji maleja aa:
“Des questions qui méritent une réponse” (Nkonko idi ikengela bua kuyandamuna): mabeji 17-18
“Jésus était-il un mythe?” (Yezu uvua muntu mufuikakaja anyi : dibeji 237
“Qui a écrit la Bible?” (Nnganyi udi mufunde Bible?): dibeji 241
“Le Qur’ān et la Bible” (Qurʼān ne Bible): dibeji 285
“Preuves de l’authenticité de la Bible” (Bijadiki bia bujalame bua Bible): mabeji 340-341
“Les croyances des Témoins de Jéhovah” (Mitabuja a Bantemu ba Yehowa): mabeji 356-357
“Comment identifier la vraie religion” (Mushindu wa kusunguluja ntendelelu mulelela): dibeji 377
8 Udi mua kutangila mu mabeji masunguluke mu mukanda wa L’humanité à la recherche de Dieu ne kumvuija lungenyi lukonkonona. Pashishe numvuangane dituku diwalukila ne wela lukonko lusuikakaja ku tshiena-bualu tshinudi bayukile ne luwikala mua kuandamuna ne broshire wa Utulomba, anyi ne mukanda wa Dimanya. Kupu muoyo bua kubikila muntu eu mu tshisangilu tshia patoke ne kumushila kabeji ka dibikila.
9 Bantu ba mishindu yonso ba muoyo muimpe badi bakeba bulelela pa bidi bitangila Nzambi ne Kristo. Tudi mua kubambuluisha dîba dia mudimu wetu wa bumanyishi. Ke bua tshinyi mbimpe tutungunuke ne ‘kuenza mudimu mukole ne kutshinta, bualu tudi batekemene Nzambi udi ne muoyo, udi Musungidi wa bantu [“ba mishindu yonso,” NW].’—1 Tim. 4:10.