Masanka awudi mua kulabula, wewe pebe!

Bamue bamanyishi badi bamueneka bikale matuku wonso ne malu masankishi ne makankamiji a kulonda, diyukidilangana peshi makumbula mapiamapia adi mabuuje ntente ne disanka. Apo, misangu kana yonso, mayuki mimpe ki ntshipeta tshia ku mpukapuka nansha. Mbipeta bia madikolela a musangu mule ne akena atentuluka. Ki mmalamina anu bamanyishi bena ludimi lupepele anyi badi ne makokeshi mavule.

Ngenzelu ya muomumue eyi ivua mimueke kudi aba batu bapeta bipeta bimpe mu mudimu wa buambi: 1) Batu benza mudimu wa buambi pa tshibidilu, misangu mivule ku lumingu, ke tshidi tshibambuluisha bua kutamba kupeta bikondo bia kupetangana ne bantu badi banyisha mukenji; 2) badi balama mmuenenu muimpe kumpala kua bantu badi babunzuluila tshiibi, kabayi badianjila kuela meji ne: nebabenge kubateleja; 3) badi ne ngakuilu wa dinanga ne baleja ditabalela dia musangelu ne dilelela kudi babateleji; 4) badi basuminyina mu dialukila bua kukumbula bavua bateleje musangu wa kumpala anyi aba bavua kabayiku; ndekelu wa bionso 5) badi ne tshipatshila tshia kutuadija malonga a Bible.

Kunyima kua mumana kukonkonona mudimu webe, udi imue misangu mutambe kujingulula bimpe mushindu wa kubabidila ngenzelu eyi misankishi idi ipetesha bipeta bilenga mu buambi ne isaka ku ditumika pa tshibidilu.