Yehowa udi utupesha bukole
1 Tuetu basadidi ba Yehowa, tudi bapeshibue mudimu wa kuamba lumu luimpe pa kuikala “ne bienzedi bimpe munkatshi mua bisamba bia bende.” (1 Pet. 2:12; Mat. 24:14) Bu mutudi mu tshikondo tshisaluke ne bikala ne mateketa ne bilema, katuena mua kuenza mudimu eu ku madikolela etu nkayetu. (2 Tim. 3:1-5) Ndiakalenga kayipu dia kuikala bambuluishibue kudi Yehowa!
2 Mupostolo Paulo wakakama mateta mavule. (2 Kol. 11:23-27) Mmushindu kayi wakafikaye ku diyikolela ne kujikija mudimu uvua mumupesha? Yehowa wakamupesha “bukole budi bupite bukole bua pa tshibidilu.” (2 Kol. 4:7, NW) Paulo wakanyisha ne uvua upeta diambuluisha dia kudi Nzambi pakafundaye ne: “Ndi ne bukole mu malu wonso ku diambuluisha dia eu udi umpesha tshikandi.” (Fil. 4:13, NW) Yehowa neatuambuluishe bia muomumue. Mmushindu kayi utudi mua kupeta diambuluisha edi?
3 Pa kusambila katuyi tulekela: Yezu mmutukankamije bua kutungunuka ne ‘kulomba, kukeba ne kukokola,’ kabiyi kulekela. (Luka 11:5-10) Pa kusuminyina mu masambila, netuleje kudi Yehowa buondoke bua malu adi atutonda, bukole bua dijinga dietu ne bujalame bua ngenyi yetu. (Mis. 55:17; 88:1, 13; Lomo 1:9-11) Paulo mmuleje mushinga wa kusuminyina mu masambila pakafilaye mubelu wa ‘kusambila anu kusambila.’ (1 Tes. 5:17, NW) Disambila ng’umue wa ku mishindu ya kumpalampala idi ipetesha diambuluisha dia kudi Yehowa.
4 Pa kulonda bulombodi bua teokrasi: Muaku eu: “teokrasi” udi umvuija ‘bukokeshi bua Nzambi’; ne Nzambi udi dinanga. Tudi ne bua kuanyisha bumfumu buwule ne dinanga bua Yehowa ne kulonda mêyi mashikuluji ende, mu mapangadika manene ne makese atudi ne bua kuangata, bua tuetu kubabidila bukokeshi ebu. “Mupika wa lulamatu ne wa budimu” udi muleji mpala wa bukokeshi bua teokrasi pa buloba. (Mat. 24:45-47, NW) Bidi ne mushinga bua tukuatshishangane ne bulongolodi bukuata nabu mudimu kudi “mupika” bua tuetu kubeneshibua kudi Yehowa. (Tangila Ebelu 13:17.) Yehowa neafute lulamatu luetu ne dijinga dietu dia kunemeka mikenji yende, wenza nunku pa kutupesha bukole butudi tukengela pa dîba diakanyine.—Eb. 4:16.
5 Pa kushala pabuipi ne bana betu: Dinanga ntshimanyinu tshidi tshifunkuna bayidi ba Yezu. (Yone 13:34, 35) Bu mutudi ne bumuntu bushilashilangane, dipangakanangana didi mua kumueneka munkatshi muetu. Tudi ne bua kuikala ne mitshima ya luse, tulekelelangana ku budisuile bamue ne bakuabu. (Ef. 4:32) Ebi bidi bitupetesha mua kuikala pabuipi ne bana betu ne kuikala bakankamijibue kudi ditantamena mateta diabu ne lulamatu. ‘Bamanye se: makenga a muomumue adi akumbajibua mu nsangilu wa bana betu ba mu Kristo badi pa buloba ebu,’ tudi tupeta bukole budi bufuma kudi Nzambi budi butupetesha mua kutantamena mateta a muomumue.—1 Pet. 5:9.
6 Pa kulama programe muimpe wa didilongela dia muntu pa nkayende: Bituakolesha lungenyi luetu ne mutshima wetu mu malu a mu nyuma, netuikale mua kukandamena buluishi bua Satana. (1 Pet. 5:8) Programe muimpe wa didilongela dia muntu pa nkayende neatuambuluishe bua kuvudija dimanya dietu dia malu a Nzambi. Netuikale mua kusuna mu dimanya diunguija bua kuakama ntatu ya dituku dionso. Paulo wakaleja ne: bidi bia mushinga bua kuikala ne “dimanya dia malu malelela” bua kupandishibua. (1 Tim. 2:3, 4) Bidi bikengela tudie biakudia bia mu nyuma pa tshibidilu.
7 Mu tshisumbu tshia bena nkristo ke mutudi mua kupeta bionso bitudi tukengela bua kuikala ne bukole bukumbane. Bituadifila ne mutshima mujima mu midimu ya mu tshisumbu, bushuwa ‘netuende ne katuakuteketa.’—Yesh. 40:29-31.