Kristo: Tshitembelu bua bansonga

¹ Panyima pa diyukidilangana dilepa pa Bible, nsonga kampanda wakamba ne: “Mvua mulengibue pa kumona ngikadilu wa muoyo mukole wa Yezu. Yeye ke mfumu umvua mua kuitabija!” Bushuwa kabiena mua kuambibua nunku bua banene ba mu malu a tshididi, bua nzambi ya mu tshipalu ne bende lumu ba mu manaya. Bena nkristo balelela kabena bangata bu tshitembelu aba badi badifile patoke ku ngenzelu ya mu bulongolodi ebu ne basungule nsombelu ukena mu diumvuangana ne mêyi-maludiki a buena-nkristo.—Mus. wa 146:3, 4.

² Bansonga badi mua kutuishibua se: bialejabu ditabuja kudi Yezu Kristo, badi bamue ba ku mikoko ya Nzambi ne Yezu mmubamanye. Mulami mulenga wa mikoko udi ubakuba. (Yone 10:14, 15, 27) Bansonga badi bangata Yezu bu tshitembelu tshiabu mbabeneshibue.

³ Muanetu kampanda udi usadila mpindieu ku Betele wa ku Brooklyn uvua ne tshipatshila tshia disanka dia mudimu eu bituadije pavuaye ne bidimu muanda-mukulu. Wakakankamijibua bua kumona mudimu wa ku Betele bu mushindu mulenga wa kulonda tshilejilu tshia Kristo pavuaye ne tshia kukola. Baledi bende, pamue ne batangidi bena ngendu, bakamusaka bua kutungunukaye ne tshipatshila etshi. Bua kumuambuluisha ku didilongolola ku mudimu eu, bakamukankamija bua kuikalaye ne nsombelu bu wa muena dîku dia Betele, pa kuenza midimu ya ku nzubu kuabo ne ya ku Nzubu wa Bukalenge, ne kabidi kulubuluja dizanzamuka diende mu mudimu. Mpindieu udi usadila ku Betele kukadi bidimu bivule, udi ne disanka dia kuikala muenze madikolela mu bunsonga buende bua kuidikija tshilejilu tshishiya kudi Kristo.

⁴ Yezu kakalonda mudimu kampanda mu bulongolodi ebu; wakasungula mudimu wa buambi. Muanetu wa bakaji kampanda úvuá nsonga uvua musue kuikala mpanda-njila pakajikijaye tulasa tuende, kadi uvua ushinshila bualu kavua mupete mudimu wa mêba makese muakanyine. Uvua udiambila ne: ‘Nganji kupeta mudimu ne pashishe nendombe bumpanda-njila.’ Mukulu kampanda wakamuleja ne: mu kupita kuindila, neasakibue bua kuitaba mudimu wa mêba mavule, bualu kakuvua tshivua mua kumukandika nansha. Wakalonda ne: “Ngakasambila Yehowa bua kundombolaye ne spiritu munsantu wende.” Wakatuadija diakamue mudimu wa bumpanda-njila buambuluishi, ne pashishe wakalua mpanda-njila wa pa tshibidilu. Matuku makese pashishe, wakapeta mudimu uvua umushila dîba dia kuenza mudimu wende wa bumpanda-njila.

⁵ Yezu wakamanyisha lumu lua Bukalenge ne bukitu kudi buonso. (Mat. 4:23) Bansonga bena nkristo badi pabu mua kuleja bukitu mu buambi, kabayi batshina bantu nansha. Ntemu kampanda wa bidimu 14 wakalonda ne: “Mu kalasa buonso mbamanye se: ndi Ntemu. . . . Mbamanye bimpe nanku, ne patudi tupetangana ne balongi nanyi mu buambi, tshitu mfua bundu nansha. Pa tshibidilu batu bateleja ne misangu mivule kabidi badi bitaba bua kuangata mikanda miumvuiji ya Bible.”

⁶ Dilonda dia tshilejilu tshia Kristo didi mua kuambuluisha bansonga bua kuangata mapangadika a lungenyi bua matuku abu atshilualua. Pamutu pa kudiina ne kasuki mu bipatshila bia mu bulongolodi ebu, badi ‘bavuluka Mufuki wabu’ pa kuikala ne mitalu mu mudimu wa Yehowa. (Muambi 12:1) Anu bu Yezu Kristo, badi badima “dinanga dia Tatu” didi dipetesha masanka mavule mapita tshintu kayi tshionso tshidi bulongolodi ebu mua kutupesha. Badi mua kuikala ne ditekemena dia ‘kushala tshiendelele’ pamutu pa ‘kujimina’ ne bulongolodi budi buamba kukula muoyo ebu.—1 Yone 2:15-17.