Tuambuluishayi aba badi bapange ditabuja
1 Mu tshikondo tshietu etshi, bantu badi banemesha bena mukanda ne badi bikale ne lungenyi lutabale. Filozofi ya bantu ne ngenyi mifuikakaja mbiende lumu, kadi malu a mu nyuma a mushinga mmalengulula. Bantu ba muoyo muimpe bàdì bitabuja anu mianda mijadika ne malelela mumvuike nebanyishe kukonkonona mukanda wa La vie: comment est-elle apparue? Évolution ou création? Mukanda eu udi mua kuambuluisha badi bapange ditabuja. (Lomo 1:19, 20) Sankayi nualukile kutangila buonso bàlejà dianyisha bua bumanyishi buetu.
2 Tudi mua kutuadija diyuki mushindu’eu:
◼ “Kakuyi mpata nudi bamanye se: balongeshi ba bungi badi bela meji ne: muntu mmufume ku didimenena, ne bionso bidiku mbilue mu mpukapuka. Udi wela meji kayi? [Lekela muntu andamune.] Lungenyi elu ludi amu difuikakaja kampanda, mbuena kuamba ne: ‘ditshinka,’ ‘difuanyikija dia ku meji kâyi tshijadiki.’ Mu siekele mivule kumpala, bavua bela meji ne: buloba buvua tshipapu; mpindieu, mbimanyike se: mbualu budi buenza tuseku bua dipanga mianda mijadiki. Kadi bu biobi nanku bua dilongesha dia didimenena?” Bala mêyi a mbuelelu mu dibeji 4, pashishe nuyukidilangane pa Yeshaya 42:5.
3 Peshi tudi mua kutuadija diyuki mu mushindu eu:
◼ “Mu matuku etu aa, tudi tupetangana misangu mivule ne bantu babule ditabuja kudi Nzambi. Kale bivua anu mu mpukapuka. Bua kuebe kumona, bua tshinyi bantu ba bungi mbapange ditabuja? [Lekela muntu andamune.] Ba bungi badi bajadika se: mbua tshikisu ne dikenga bidi bivule mu bulongolodi ebu ne lubilu lukuata buowa. Badi bela meji ne: bu bikala Nzambi koko, uvua ne bua kujikija dikenga dionso edi. Bu mudibu bapangile kupeta diumvuija dijalame, badi misangu mivule babenga dikalaku dia Nzambi. Pabi, mianda mivule idi ijadika ne: Nzambi udiku ne yeye neavuije buloba mu tshitupa tshîpi emu muaba utuasomba mu disanka ne mu ditalala.” Utungunuje diyuki pa kutumika ne ngenyi ya mu tshikoso 19, dibeji 196.
4 Ne Bible webe mu bianza, udi mua kutuadija diyuki mushindu’eu:
◼ “Tudi tualukila ku tshiibi tshiebe bua kukumvuija bua tshinyi dilonga dia Bible didi ne mushinga mu tshikondo tshitudi ne muoyo. Bantu bavule badi ne Bible, kadi bakese ke bàdì bangata dîba dia kumubala. Bamue badi batuambila patoke ne: kabena kabidi ne dieyemena mu Bible. Kadi wewe, udi wela meji kayi? [Lekela muntu andamune.] Tshidi tshituitabijija kabidi ne: Bible n’Dîyi dia Nzambi, ndikumbana dia milayi idimu.” Tutangile mvese ya mu Bible idi mu tshikoso 6, dibeji 234.
5 Mubelu eu udi mua kumvuika bimpe:
◼ “Tudi mua kumona se: bukua-bintu mbulengele ne budi bumuenesha meji. Tshimfuanyi tshilenga tshia dibuela dia dîba etshi ntshilejilu tshimpe.” Leja tshimfuanyi tshia mu mabeji 12 ne 13. Uzangike ngenyi idi mu kazubu kadi kamba ne: “Quelques sujets de réflexion” (bimue biena-bualu bia dieleela meji) ne uleje mudi mukanda ufila mandamuna adi asankisha ku nkonko minene ya mu tshikondo tshietu.
6 Tudi mua kuikala dibenesha bua muntu netu pa kutumika ne mukanda wa Création bua kumuambuluisha bua kupetaye ditabuja dikole kudi Mufuki wende.