Mandamuna ku nkonko yenu

◼ Mmushindu kayi utudi mua kulengeja mumvuija etu mu bisangilu?

Tutu ne luzukuzuku lua kudisangisha dîba dia bisangilu bidi tshisumbu tshienza lumingu luonso. Tutu ne mushindu wa kumuleja ditabuja dietu ne kukankamija bakuabu ne mumvuija etu. (Nsum. 20:15; Eb. 10:23, 24) Tudi ne bua kubimona bu muabi ne kuenza madikolela bua kuenza nunku pa tshibidilu. Mmushindu kayi utudi mua kulengeja mandamuna etu mu bisangilu?

Tshia kumpala, tudilongolole. Mbimpe kudianjila kubala bituamona ne kueleelapu meji. Tuenze madikolela bua kumvua tshipatshila tshia ngenyi mileja. Nansha bikala tshiena-bualu etshi tshimana kukonkonona matuku mashala, tukebulule malu mapiamapia peshi aa adi mazangika. Tulame mu lungenyi mutù wa bualu bukonkonona. Patudi tulongolola mumvuija ku diambuluisha dia mukanda udi wenza dilonga diondoke dia mukanda kampanda wa mu Bible, tshilejilu mukanda wa Buakabuluibua—Nkomenu, tutete bua kumvua tshidi tshituangaja mvese kampanda ne mikuabu idi mimunyunguluke. Bituatumika ne mibelu eyi, bukole buetu bua diela meji nebusonsodibue. Ebi nebituambuluishe bua kulongolola mumvuija mimpe ne kupetelamu disanka.

Mumvuija matambe buimpe adi mîpi, mafile mu miaku mipepele ne mangatshila mu mukanda mulonga. Muntu wa kumpala ku diakula udi ne bua kuandamuna buludi ku lukonko, pa kulekeela bakuabu mushindu wa kusakidila ku diandamuna. Bidi bikengela kuepuka mumvuija malepa ne makodiakane, adi adia dîba ne apangisha bakuabu mua kuandamunabu pabu. Pamutu pa kubala mumvuija etu mu mukanda muaku ku muaku, tuakule mu miaku yetu nkayetu. Mumvuija a disakidila adi mua kukongoloja malu mumvuija mu mvese mifila. Tutelejayi ne ntema tshidi bakuabu bamba bua tuetu kuepuka diambulula kayi dionso dia patupu.

Mbimpe kuela tshianza mulu misangu mivule, kadi ki mpa tshikoso tshionso nansha. Tudi tukankamija bansonga bua kuandamunabu. Biwikala ushinshila bua kuandamuna, udi mua kudianjila kumanyisha mulombodi wa dilonga bua tshikoso tshiwasua kuandamuna, ne yeye neakupeshe pamu’apa mushindu wa kuandamuna.

Buonso tudi ne bua kuenza madikolela ne muoyo mujima bua kuandamuna nansha bualu bukese padi bateleji babikidibue bua kuandamuna. Tuvulukayi se: dilengela dia bisangilu ndishindamene pa dijinga dietu dia kufila mumvuija ne pa bulenga buawo.—Mus. wa 26:12.