Tuibakanganayi mu difila mandamuna mu bisangilu
1 Ebelu 10:24 (NW), udi utukankamija bua ‘kusakangana ku dinanga ne ku midimu milenga.’ Kuenza nanku kudi kumvuija kuibakangana mu difila mandamuna malenga mu bisangilu bia tshisumbu tshietu. Bua tshinyi tudi ne bua kuandamuna? Mmunyi mutudi mua kuandamuna? Nnganyi wapetelaku diambuluisha?
2 Tuelayi meji ku misangu mivule itutu tupetela diambuluisha ku mandamuna mapepele ne matokesha adi adiundisha ngumvuilu wetu ne atukolesha mu nyuma. Tudi ne diakalenga dia kuenza bia muomumue bua bakuabu. Mu diandamuna, tudi tuleja dijinga dietu dia ‘kufila kupa kukuabu kua nyuma’ kudi kukankamija bateleji bonso.—Lomo 1:11, 12.
3 Mushindu wa kufila mandamuna malenga: Epuka difila mandamuna mapite bule adi akonga ngenyi yonso idi mu tshikoso. Pa tshibidilu, kaatu afila diandamuna disunguluke ku lukonko ne adi mua kutekesha bakuabu mu maboko bua kuandamunabu. Diandamuna dia kumpala pa tshikoso kampanda didi ne bua kuikala dîpi ne ditangija buludiludi ku lukonko. Mandamuna adi alonda adi mua kuleja mua kutumikila malu adi mu tshikoso mu nsombelu peshi kuleja diumvuangana ne mvese. Tangila mukanda wa Manuel pour l’École, mabeji 90-92.
4 Biwikala umvua buôwa bua kuandamuna, longolola diandamuna dîpi pa tshikoso kampanda ne lomba muntu udi ulombola tshisangilu bua akuele lukonko pa tshikoso atshi. Pawenza nunku misangu ne misangu, kuandamuna nekukupepelele. Vuluka ne: Mozese ne Yelemiya bavua ne dielakana pa makokeshi abu a diakula munkatshi mua bantu. (Ekes. 4:10; Yel. 1:6) Kadi Yehowa wakabambuluisha bua kuakulabu mu dîna diende, ne neatuambuluishe petu.
5 Nnganyi wapetela diambuluisha ku mandamuna etu? Netuikale bantu ba kumpala bapetelaku diambuluisha, bualu mandamuna etu neabueje menemene bulelela mu lungenyi luetu ne mutshima wetu. Netuavuluke kunyima kua matuku. Kabidi, bakuabu nebapetele diambuluisha ku mandamuna etu mimpe. Bushuwa, tudi bakankamija padi bantu bonso, nansha bikale bamonemone malu, bansonga, bena bumamamama peshi bapiabapia, benza madikolela bua kuleja ditabuja diabu mu bisangilu bia tshisumbu.
6 Tudi batuishibue pa kumona ne: ‘dîyi diamba mu tshikondo tshiakane didi diakane’ padidi dipatula bua kuibakangana mu bisangilu!—Nsu. 15:23.