Baledi Bàdì Ne Disanka!
1 Buebe wewe utshidi nsonga ne muikale mu dîku dia bena nkristo, kudi mushindu wa pa buawu wa kuvuija baledi bebe bena disanka. Biwikala wenda mu buakane, ‘tatuebe ne mamuebe nebasanke.’ (Nsum. 23:22-25) Baledi bebe batu pa tshibidilu bakujingila malu adi mapite bulenga. Kakuena bualu nansha bumue budi mua kubasankisha kupita ebu bua kukumona wangata bulelela ne mushinga ne ulambula muoyo webe kudi Yehowa.
2 Ndiakalengapu kayi dia kuikala ne baledi bena nkristo! Bituadije ku diledibua diebe, badi bakudisha, bakuvuadika, bakuladika ne bakukuba. Kupita apu kabidi, badi baditatshisha bua kukumanyisha Yehowa ne ngenzelu yende miakane ya malu; ndongeshilu eu udi mua kukupetesha muoyo wa kashidi. (Ef. 6:1-4) Mmunyi muwaleja dianyisha diebe?
3 Angata bulelela ne mushinga: Baledi bebe mbenze madikolela bua kukuambuluisha bua wangate bulelela ne mushinga, bua ulubuluke mu nyuma ne bua ushale pabuipi ne bulongolodi bua Yehowa. Udi mua kuleja dianyisha diebe pa kuikala ne dijinga dia muoyo mudisuile bua dilonga dia mu dîku. Leja dijinga dia kubuela mu bisangilu, keba mushindu wa kudilongolola bua dîku kufikadi pa dîba. Somba ku luseke lua baledi bebe ne ikala muteye ntema; ikala ulondesha mu mikanda idibu bakonkonona. Enza madikolela bua kufila mumvuija. Wikale mulongi mushindame wa mu Kalasa ka mudimu wa teokrasi, witabe midimu ne uyilongolole muebe muonso. Ku nzubu wa Bukalenge, wikale wambuluisha mu midimu mishilashilangane ya kuenza. Pa kuenza nunku, newikale ne lungenyi lushindamija pa malu adi ne mushinga bua nsombelu webe wa mu nyuma.
4 Difundila bipatshila bilubuluki. Kuanyishi amu bua kuenza mudimu wa bumanyishi wa budingidiji to; kuna dijinga dia kulua mumanyishi mupiluke. Londa programe wa dibala dia Bible dia ku lumingu ku lumingu, peshi bitambe buimpe, bala Bible mu bujima buende pa kulonda programe webe nkayebe. Udifundile tshipatshila tshia kukumbaja malu malombibue bua didilambula diebe kudi Nzambi ne bua batismo. Baledi bebe badi mua kukuambuluisha bua ulonde tulasa tudi mua kukupetesha dishidimunyibua diakuambuluisha bua wewe kusadila Yehowa tshishiki. Wikale ne lumu luimpe luakupetesha mushindu wa kupeshibua masanka a mudimu a pa buawu, bu mudi mudimu wa bumpanda-njila peshi wa ku Betele. (Bienz. 16:1, 2) Udifundile bipatshila bua ‘wikala mujadike bintu bia mushinga, bua se: wikale . . . muule tente ne mamuma a buakane.’—Fil. 1:10, 11, NW.
5 Bunsonga ntshikondo tshia kushidimuka, tshia kupeta dimanya ne kulonga mudi kusomba ne bantu. Ntshikondo tshia kusanka bua dikala ne muoyo kumpala kua kupetangana ne disumpakana ne majitu bia tshikondo tshia bukulumpe. Solomo wakamba ne: “Wewe nsongalume, usanke mu bunsongalume buebe, mutshima webe ukusankishe mu matuku a bunsongalume buebe.” (Muambi 11:9) Biwikala mupangadike kusadila Yehowa mu bunsonga buebe, neupete mabenesha a kashidi.—1 Kul. 28:9.
6 ‘Biwipatshila buakane’ pamutu pa “nkunka ya bunsonga,” neukube baledi bebe ku tunyinganyinga ne ntatu. (2 Tim. 2:22, NW) Mutshima webe mene newikale ne kabingila ka kusanka. (Nsum. 12:25) Kupita bionso, neusankishe mukufuki webe, Yehowa Nzambi.—Nsum. 27:11.