Programe Wa Dituku Dia Mpuilu Wa Pa Buende Mupiamupia
1 Bua tshinyi tudi ne bua kumanyisha lumu luimpe katuyi tutekesha? Mmalu kayi adi malombibue bua kuikala mumanyishi wa lumu luimpe? Mmushindu kayi udi bantu bakatale nansha bena buôwa mua kuangatabu dipangadika dia kumanyisha lumu luimpe kudi bantu nabu? Nkonko idi yelesha meji eyi ne mikuabu kabidi neyipete diandamuna mu Dituku dia Mpuilu wa pa buende mupiamupia didi dituadije mu Kabitende mushale. Didi ne tshiena-bualu etshi: “Bakumbane bua kuikala ba-ministre ba lumu luimpe.”—Tangila 2 Kol. 3:5.
2 Tudi basadidi ba Yehowa; ke bua tshinyi tudi ne bua kutabalela bienzedi bietu. Bansonga nebalonde malu makankamiji adi aleja mushindu uvuabu bakandamena buenzeji bua balunda babu. Baledi mbakankamijibue ne dinanga bua kumvuabu dikengedibua dia kushidimuja bana babu balela bua kuluabu ba-ministre ba Nzambi. Bonso tudi tupeta mibelu idi ituambuluisha bua kuvuluka mushinga wa kuyisha, ne mabenesha atuapeta tuetu mene, ne aba badi batuteleja.—1 Tim. 4:16.
3 Ditambula didi bushuwa muanda wa mushinga bua dituku edi. Kadi kumpala, kudi muyuki muashila pa Bible muenzela nangananga aba batshidi badilambuilaku kudi Nzambi. Bu pa tshibidilu, bateleji bonso mbalombibue bua kuteyabu ntema ku muyuki eu udi uleja patoke diumvuija dia ditambula. Bonso badi bajinga kutambula mu Dituku dia Mpuilu wa pa buende badi ne bua kuyukila kumpala kua dîba ne mutangidi-muludiki pa bualu ebu, bua kuangataye mapangadika bua bakulu kukonkonona ne balumbidi nkonko milongolola.
4 Dituku adi kabidi kudi muyuki munene muenza kudi ngamba-malu muenyi. Muyuki eu udi ne tshiena-bualu etshi: “Bakumbane ne bakaja bua kuikala ba-ministre ba Nzambi,” udi uleja malongolola manene anayi adi atuambuluisha bua kuikala bakumbane bu ba-ministre. Malu menzeka miibaki nealondibue kabidi.
5 Tudilongolole kutshidi ku mpindieu bua kuteleja miyuki yonso (tudi mua kulekela anu bituikala bamane kubuelamu). Katupangidi kubikila bantu badi ne dijinga dia kumanya bia bungi pa Bible bua ne, bobu pabu, bababidile dituku edi dia nshidimuinu wa Teokrasi. Nenku netuikale ne dijadika dia kuikala “bakumbane” bu ba-ministre ba lumu luimpe.