Tuikalayi Ne Tshipatshila Mu Makumbulula Etu
1 Paudi ukumbulula muntu, enza madikolela bua kutumika ne mvese kampanda wavudija dimanya dia muntu eu pa tshiena-bualu tshia mu Bible tshiuvua muyukidilangane nende.
2 Tshimue tshia ku bipatshila bia makumbulula paudi ushiya bibejibeji ntshia kunzulula njila wa diabanya dia bibejibeji. Dileja dipepele dia buena didi dilonda edi didi mua kupatula bipeta bimpe:
◼ “Ndi ntekemena se: uvua muanyishe dibala dia tshiena-bualu tshidi tshiumvuija bua tshinyi tudi ne bua kutshina Nzambi, mu Tshibumba tshia Nsentedi tshimvua mukushile. Lelu ndi mukutuadile tshiena-bualu tshia mu Réveillez-vous! tshidi tshijula lukonko elu: ‘Pourquoi la vie est-elle si courte?’ (Bua tshinyi matuku a muoyo mmakese nunku?) Ndukonko luimpe, ki mmuomu’anyi?” Tungunuka, tshilejilu, pa kuamba nunku: “Yone 3:16 udi umanyisha mêyi mende lumu a Yezu pa bidi bitangila dilaya dia kuikala ne muoyo wa kashidi. Biwanyisha tshibejibeji etshi, neukankamijibue bua ditekemena dishindame difila mu Dîyi dia Nzambi.” Amba pashishe ne: newalukile bua kumutuadila nimero yalonda, kabidi ne: nenuakule imue misangu pa bidi Nzambi mulaye bena butumike. Uvuluke ne: musangu wonso uudi utuadila muntu bibejibeji, udi mua kubala dikumbulula dimue.
3 Biwikala mushiye tshibejibeji tshidi ne tshiena-bualu tshia “Bulongolodi bukena mvita, tshikondo kayi?” udi mua kuamba ne:
◼ “Nsombelu uvua mua kuikala mushindu kayi bu mvita kayitshiyiku? [Lekela muntu andamune.] Tangila tshidi Nzambi mupangadije bua kuenza.” Bala Musambu wa 37:10, 11, ne leja nsombelu wikalaku pa buloba pikala disua dia Nzambi dienzekapu. Vuluija muntu eu malu avua Yezu mulongeshe bayidi bende bua kulombabu mu disambila, bilondeshile Matayo 6:9, 10. Umufikishe ku dieleela meji pa diumvuija dia mêyi a Yezu. Bialeja muntu eu dijinga dilelela dia kumanya bia bungi, udi mua kumulomba bua kuenzaye abonema ya Tshibumba tshia Nsentedi peshi ya Réveillez-vous! ne nupunge dîyi bua kuyukidilangana nende.
4 Biwalukila bua kuyukidilangana pa tshiena-bualu tshia “Pourquoi la vie est-elle si courte?” (Bua tshinyi matuku a muoyo mmakese nunku?) udi mua kutuadija diyukidilangana nunku:
◼ “Musangu mushale, tuvua bakule pa bidi bitangila bungi bua matuku a muoyo wa muntu. Anu muudi mujingulule kakuyi mpata ku biena-bualu bia Réveillez-vous!, bena sianse badi ne ditekemena dikese didi mua kutuambuluisha bua kuikala ne muoyo kupita pa bidimu 70 anyi 80. Kadi udi wela meji kayi bua tshidi Bible ulaya? [Lekela muntu andamune.] Bible udi uleja ne: Nzambi mmulongoluele bantu bualu kampanda butambe buimpe.” Bala Yone 17:3, ne amba ne: dimanya didi mua kufikisha ku muoyo wa kashidi. Bafike pa tshitupa etshi, ulombe muntu bua nuenu kutuadija dilonga dia Bible peshi nupunge dîyi bua kuyukidilangana kabidi pa Bible.
5 Kutuadija dilonga dia Bible ntshipatshila tshia mushinga mu mudimu webe. Imue misangu ukadi mukumbule misangu mivule muntu kampanda utu wangata bibejibeji. Udi mua kuenza nunku musangu walonda panuapetangana:
◼ “Bantu batu ne ngenyi mishilangane pa bidi bitangila ntendelelu ne mushinga wende mu nsombelu wa matuku aa. Mitabuja pa bidi bitangila tubingila tudi Nzambi mulekelele bubi anyi tua dikulakaja ne lufu mmabengangane. Bamue nebajinge kabidi kumanya tshidi tshikengedibua kuenza bua Nzambi kutelejaye masambila abu.” Bulula umue wa ku mikanda mienza bua dilonga dia Bible, mu tshitupa kampanda tshia tshiena-bualu tshitudi bamone se: netshilengelele muntu eu, ne leja mu tshikoso mushindu udi dilonga dia Bible dienzeka.
6 Yehowa utu udifundila bipatshila. Tumuidikijayi mu ngondo wa Tshisanga pa kuikala ne tshipatshila mu makumbulula etu.