Programe Wa Mpuilu Wa Tshijengu Bua 1995-1996
1 Dilondangana dilualua dia mpuilu ya bijengu yatuadije mu Kabitende 1995 idi ne tshiena-bualu: “Nushale batabale, nuikale bashindame, nutantamane.” Aa mmêyi a mupostolo Paulo a dikankamija nawu bena nkristo ba mu siekele wa kumpala, mafunda mu 1 Kolinto 16:13 (NW).
2 Bua aba badi kabayi banji kumutantshila, mpuilu nealeje diambedi ne: tudi tukengela kudikonkonona mu nyuma ku musangu ku musangu. Bua kushala bapangadije ne dishindika bua kuenza tshidi tshiakane mu “matuku a ku nshikidilu aa,” bidi bikengela bua tuetu kukonkonona ne muoyo umue malanda etu ne Yehowa kabidi ne bulongolodi buende. (2 Tim. 3:1) Nebatuvuluije ne: Yehowa udi wanyisha madikolela etu. Tudi tukengela kulongeshibua bua kutamba kuleja ngikadilu ya Buena-nkristo ne kulama nsombelu wa tshitembu.
3 Kashonyi nekedibue kabidi pa mushinga wa kudifila ne mitalu mu mudimu wa kuenza bayidi, pa kuipatshila dilubuluka dia mu nyuma ne diambula majitu. Mibelu miakanyine idi ileja mushindu utudi mua kulonda programe wa pa tshibidilu wa dididiisha mu nyuma, wa muntu pa nkayende peshi mu dîku, neyifidibue mu miyuki kabukabu, mu manaya ne mayukidilangana.
4 Mu disambombo, balumbidi badi bakumbaja malu malombibue nebikale mua kuleja patoke didilambula diabu kudi Yehowa pa kutambuishibua. Kadi, buonso netusanke bua kuikalaku mu Dia lumingu bua kuteleja muyuki wa patoke udi ne tshiena-bualu ne: “Muaba webe udi tshinyi kumpala kua Nzambi?”
5 Programe neashikile ne makankamija bua kushala bashindame mu ditabuja, eku bikale tuenzelangana malu mu dinanga ne ditalala bamue kudi bakuabu. Mpuilu wa tshijengu ng’umue wa ku mishindu ya pa buayi idi Yehowa utupetesha bua ‘kusakangana ku dinanga ne ku midimu mimpe.’ (Eb. 10:24, 25, NW) Tudilongololayi bua kuikalaku mu matuku abidi’au.