Tudi ‘Tuyisha Dîyi’
1 Mu tshikondo tshietu etshi, bilondeshile mushindu udi Bible umvuija “matuku a ku nshikidilu,” bantu bavule badi ne “tshimuenekelu tshia bulamate kudi Nzambi.” (2 Tim. 3:1, 5, NW) Ebi mbifume ku dipangila dia bamfumu ba bitendelelu bua kufila bulombodi bulelela bua mu nyuma kudi bena kuitabuja babu. Bamfumu ba mu Bukua-buena-nkristo kabena banemesha Bible. Pamutu pa kuyisha Dîyi dia Nzambi, bena mu Bukua-buena-nkristo badi banyisha bua kuambulula malongesha a tshianana a nkindi ne teoloji, peshi bua kufila ngenyi-miludiki mu malu a nsombelu ne a tshididi. Bamfumu ba bitendelelu bavule kabena bitabuja Bible. Badi bela meji ne: ukadi mupite tshikondo ne, mu mushindu ukena mumvuike, badi batuma kumpala dilongesha dia didimenena, pamutu pa dilongesha dia mu Bible pa bidi bitangila Mufuki Munene. Bamfumu ba malu a Nzambi mene ba bungi kabatu nansha batumika ne dîna dia nsungasunga dia Nzambi ne kabena bamona bualu budi bupumbisha bua dîna edi kukupudibuadi mu nkudimuinu ya buena-lelu ya Bible.
2 Bifuanangane ne bamfumu ba bitendelelu ba mu tshikondo tshia Yezu, bamfumu ba ekleziya ba lelu’eu badi bayisha tshianana. (Mat. 15:8, 9) Ke muakamba muprofete Amosa bushuwa. Kudi ‘tshiyole tshidi katshiyi tshia biakudia, ne nyota idi kayiyi ya mâyi, kadi ntshiyole tshia kumvua mêyi a Yehowa.’ (Amosa 8:11) Kupita bualu kayi buonso, bantu badi ne dijinga dia biakudia bia mu nyuma bidi mu Dîyi dia Nzambi.
3 Mushindu wa kusankisha ku makengela a mu nyuma a bantu: Paulo wakabela Timote bua kushala mulamate ku “mifundu ya tshijila, idi mua . . . kuvuija muena meji bua lupandu,” ne wakamupesha patoke bujitu bua ‘kuyisha dîyi.’ (2 Tim. 3:14, 15, NW; 4:2, NW) Bu mutudi Bantemu ba Yehowa, tudi ne bua kulamata ku bidi Bible ulongesha patudi tuyisha, pa kuidikija nunku Yezu, Tshitembelu tshietu, eu wakamba ne: “Dilongesha dindi ndongesha ki ndianyi meme to, ndifume kudi Udi muntume.” (Yo. 7:16, MMM) Dilongesha dietu ndishindamene pa Dîyi dia Nzambi, bualu tudi tumonamu meji a Nzambi ne tudi tujinga kuleja bantu mpokolo wa mamanyisha atudi tubapetesha.—1 Kol. 2:4-7.
4 Bua bantu kumanyabu Yehowa ne kuikalabu ne ditabuja kudiye, bidi bibakengela kuanji kuteleja bulelela budi mu Bible. Paulo wakafunda mu bulelela ne: “Apu, mmunyi muitabujabu eu udibu kabayi bumvue bualu buende? Apu, mmunyi mumvuabu padiku kakuyi muntu bua kuyisha?” (Lomo 10:14, NW) Pa kuyisha Dîyi dia Nzambi, tudi tuambuluisha bakuabu bua kupeta ditabuja ku diambuluisha dia dimanya dijalame. Dimanya edi didi ne bukokeshi bua kulengeja nsombelu ya bantu, ne ke tshididi dienza. Charles Dickens, mufundi muena Angleterre, wakafunda pa bidi bitangila Bible ne: “Mmukanda uvuaku ne wikaleku mupite yonso pa buloba, bualu udi ufila malongesha malenga mapite onso adi alombola muntu udi udienzeja bua kuikala muena bululame ne lulamatu.”
5 Aba badi ne nzala ya bulelela bua mu nyuma badi bajingulula ne: buin’ebu mbuashila miji yabu mu Dîyi dia Nzambi mene. Mu 1913, bakapesha Frederick Franz, patshivuaye nsonga mulongi wa mu université, broshire wa Où sont les morts ? (Bafue badi penyi?) Panyima pa mumane kubala ne ntema yonso diandamuna dia mu Bible pa lukonko elu, wakamba ne: “Ebu ke bulelela!” Miliyo ya bantu badi bakeba bulelela mbanyishe mmuenenu eu. Tutungunukayi ne kuyisha Dîyi ne tshisumi ne lukunukunu, tupetelaku disanka dia kumvua mudi bakuabu bamba ne: “Ebu ke bulelela!”