Bantu Ba Mishindu Yonso Nebapandishibue

¹ Yehowa mmusue “ne: bantu ba mishindu yonso bapandishibue ne bafike ku dimanya dijalame dia bulelela.” (1 Tim. 2:⁠4, NW) Bushuwa, bantu badi bapetangana, mu bualabale kampanda, ne bipeta bia bumpianyi bua mu mubidi, ne buenzeji bua miaba idibu baledibue ne bua miaba idibu basombele, kadi badi ne budisunguidi ne badi bapangadija nkayabu bua tshienzabu mu nsombelu wabu. Badi mua kuenza malu mimpe ne kushala ne muoyo, peshi kuenza malu mabi ne kubutuka. (Mat. 7:​13, 14) Ebi bidi ne bua kuikala ne buenzeji kayi pa mushindu utudi tumona bantu batudi tumanyisha lumu luimpe lua Bukalenge?

² Katuena ne bua kuela meji ne: disankidila bulelela dia muntu didi ku buenzeji bua malu bu mudi buena-ditunga, nshidimukilu, peshi nsombelu wa mu tshinsanga tshia bantu. Bulelela budi bukoka bantu badi balonge kakese ne badi balonge bia bungi, pamue ne aba badi mu malu a tshididi, badi benza mudimu pa budikadidi, aba badi bavila dikalaku dia Nzambi, bena ne: Nzambi kêna ututangila, nansha bena mibi banene. Bantu ba miaba yonso ne ba nsombelu ya mishindu yonso mbashintulule bikadilu ne badi batekemena mpindieu bua kuikala ne muoyo wa kashidi mu Mparadizu. (Nsum. 11:19) Nenku katuena ne bua kuelakana bua kumanyisha mukenji wa Bukalenge kudi bantu ba mishindu yonso.

³ Tutangilayi bilejilu bidi bilonda ebi: Muntu kampanda uvua mupangadije bua kushipa tatuende muenu, kadi kakenza nanku. Panyima pa matuku, wakangata dipangadika dia kudishipa, kadi kakafika ku dikumbaja dijinga diende edi. Pashishe bakamuela mu buloko bua tshilumbu tshia buivi ne bua dienda mushinga wa bintu bia lulengu, ne dibaka diende diakafua. Lelu’eu, muntu eu udi ne nsombelu mululame, udi ne disanka mu dibaka diende ne umvuangana bimpe bitambe ne tatuende muenu. Ntshinyi tshidi tshimushintulule lungenyi? Dilonga dia Bible ne Bantemu ba Yehowa ne ditumikila bivuaye mulonge mu nsombelu wende. Yehowa kakatshinka ne: mmuntu ukena mua kushintuluka.

⁴ Mukaji kampanda utshivua nsonga uvua muena manaya munene wa ku televizion, kadi ebi kabivua bimupetesha disanka nansha. Bu muvuaye mukemeshibue pa kumona nsombelu munonoke wa Bantemu, wakitaba dilonga dia Bible ne wakatuadija pa lukasa kumanyisha bakuabu lumu luimpe lua Bukalenge. Miaba yonso ivuaye uyisha ku tshiibi ne ku tshiibi, bavua bamumanya, kadi uvua umvuija ne disanka ne: uvua wanyisha kumanyika bu Ntemu wa Yehowa pamutu pa muena manaya.

⁵ Muanetu wa bakaji kampanda wakapunga dîyi ne muntu kansanga uvua ne abonema wa Tshibumba tshia Nsentedi bua kulonga Bible, ne mukaji muena mutumba uvua mumvue bualu ebu, wakadibueja mu dilonga edi. Yeye eu wakamona diakamue ne: ke bulelela buvuaye ukeba! Yeye ne bayende bakalekesha tshilumbu tshia dishipa dibaka ne bakapingajangana. Uvua munange bikole lubuku lua mitoto ne uvua muditue mu ntendelelu wa spiritu mibi, kadi wakanyisha bua kuimansha mikanda yende misumba ku mushinga mukole ne bintu bikuabu bivuaye nabi bivua mu diumvuangana ne malu a bademon. Kakanenga nansha e kutuadijaye kubuela mu bisangilu ne kuyukila ne bena dîku diende ne balunda bende bua ditabuja diende dipiadipia. Lelu’eu, udi ufila bumanyishi kudi bakuabu ne musangelu.

⁶ Katuena ne bua kuikala ne ngenyi midianjila kufumba pa muntu nansha umue. Bishilangane, tumanyishe ne lukunukunu lumu luimpe mu miaba yonso. Tudi ne tubingila tuonso tua kutekemena se: Yehowa, udi “utangila mu mutshima,” nealue “Musungidi wa bantu ba mishindu yonso.”​—⁠1 Sam. 16:7; 1 Tim. 4:⁠10, NW.