Bua Tshinyi Badi Bawenza?

¹ Bakamanyisha bua Kristo ne: ‘lukunukunu bua nzubu wa Nzambi nelumudie.’ (Mus. 69:​9) Lukunukunu lua Yezu bua ntendelelu mulelela mulambula Yehowa luakamusaka bua kuteka mudimu wende pa muaba wa kumpala. (Luka 4:43; Yone 18:37) Mu matuku etu aa, Bantemu ba Yehowa badi baleja diluijakana dia muomumue mu mudimu wabu mu difila bumanyishi bua bulelela. Tshidimu tshishale, muayene wa bamanyishi 645 509 bavua badifile ngondo yonso mu mushindu umue anyi mukuabu wa mudimu wa bumpanda-njila. Bu mutudi badilambule kudi Nzambi, tudi bonso ne bua kukonkonona mu disambila bituikala mua kudilongolola bua kuikala bampanda-njila bambuluishi peshi ba pa tshibidilu.​—⁠Mus. 110:3; Muam. 12:1; Lomo 12:1.

² Tudi mu ndongoluelu wa malu wa budisui ne wa dinanga dinekesha dia bintu bia ku mubidi; bantu bavule badi badiebeja bua tshinyi bamue badi badifila nunku mu mudimu padiwu kawuyi ubapetesha nansha mfranga peshi butumbi. Bua tshinyi bampanda-njila badi bawenza? Mbamanye ne: badi badifila mu mudimu mupandishi. Basaka kudi dinanga diondoke bua Yehowa ne bua muntu nabu, badi badiumvua benzejibue bua kufila diambuluisha diabu bua kupandisha mioyo. (Lomo 1:14-16; 1 Tim. 2:4; 4:16) Bena dibaka kampanda bampanda-njila bakumvuija bimpe nsombelu eu: “Bua tshinyi tudi bampanda-njila? Tuvuaku mua kupeta kabingila kakanyine ka kufila kudi Nzambi bu katuyi bampanda-njila anyi?”

³ Muanetu mukuabu wa bakaji wakakula bua dipangadika diende dia kutuadija mudimu wa bumpanda-njila wamba ne: “Bayanyi ne meme tudi badilongolole bua kujikija majinga onso a mu nsombelu anu ne difutu dimuepele, ebi biakenza ne: tubenge bintu bikena bia mushinga. Pabi, Yehowa mmutubeneshe bikole, katu muanji kutulekela mu bupele anyi mu dikengela nansha. . . . Ndi mupete kabingila kalelela ka kuikala ne muoyo: ndi ngambuluisha bantu badi mu dikengedibua bua kumanya se: Yehowa, Nzambi mulelela, kêna kule ne badi bamukeba nansha.” Bamanye se: tshikondo ntshifimpakane, bampanda-njila badi basanka anu ne bintu bikese bidi bikengedibua bua nsombelu wabu eku badiunguijila biûma bilelela bia mu nyuma bianenga bua kashidi.​—⁠1 Tim. 6:8, 18, 19.

⁴ Bikala nsombelu webe ukupetesha mushindu, bua tshinyi kubenga kuditua mu mulongo wa nkama ya binunu bia bana betu balume ne bakaji badi bampanda-njila pa buloba? Ebi nebikuambuluishe bua kuabanyangana disanka diabu.