Mandamuna ku Nkonko Yenu

◼ Mmunyi mutudi mua kuleja budimu patudi ne muntu ukena mulume netu peshi mukaji netu mu mudimu wetu?

Tudi ne bua kuela meji se: bana betu balume ne bakaji badi bajinga kuikala ne bikadilu bidi mu diumvuangana ne mêyi-makulu a mu nsombelu matumbuke. Diakabi, tudi mu bulongolodi bukena bukezuke mudi malu onso manyisha ne mudi mikalu ya malu a mu nsombelu mikale amu mikese. Ke bua tshinyi, nansha tuetu mua kuikala ne meji mimpe matambe, tudi ne bua kuikala misangu yonso badimuke bua katuenji bualu bubi peshi katukebeshi divuambuka. Ebi mbilelela nangananga mu mudimu wa buambi.

Mu buambi, tutu misangu mivule tupetangana ne bantu badi kabayi balume netu peshi bakaji netu badi baleja disankidila didi dimueneka dia muoyo mujima bua bulelela. Bituikala tuyisha nkayetu ne muntu yeye muikale nkayende kumbelu, nebikale pa tshibidilu bitambe buimpe bua kufila bumanyishi ku tshiibi ne katuyi tubuela munda nansha. Bialeja muntu disankidila, netuikale mua kuangata mapangadika bua kualukila kumutangila pamue ne mumanyishi mukuabu peshi dîba didi bena ku nzubu bakuabu bikaleku. Pikalaku kakuyi mushindu, nebikale bia meji bua kutumina muntu eu mumanyishi udi mulume nende peshi mukaji nende bua kumukumbula. Mibelu eyi idi kabidi miakanyine mu malonga a Bible malombola ne muntu ukena mukaji nebe peshi mulume nebe.​—⁠Mat. 10:16.

Budimu budi kabidi ne mushinga patudi tusungula muntu wa kupatuka nende mu buambi. Nansha bikala bamanyishi babidi badi kabayi bonso balume peshi bakaji mua kudiakaja bua kuyisha babidi imue misangu, bidi bimpe bua kudisangabu ne tshisumbu kampanda. Pa tshibidilu, kabiena bia meji bua kupitshisha dîba nkayebe ne muntu udi kayi mulume nebe peshi mukaji nebe ne kayi muena dibaka nebe, nansha bikale mu mudimu wa buambi. Nenku, muanetu udi ne bujitu bua kuakaja kasumbu nealeje busunguluji mu diabanya bamanyishi, pamue ne mipiankunde kabidi.

Pa kuikala misangu yonso ne mmuenenu mujalame, ‘katuakulenduisha muntu mu bualu’ nansha tuetu bine peshi nansha bakuabu.​—⁠2 Kol. 6:3.