Tufilayi Bibejibeji Mu Disambombo Dia Kumpala Ne Disatu Ngondo Yonso
1 Kukadi bidimu 118, Tshibumba tshia Nsentedi, anu bu mulumbuluidianganyi mukumbane, tshidi tshiakuila malelela ne malongesha a mu Bible. Miliyo ya babadi bena dianyisha badi ne dieyemena kuditshi. Mupika wa lulamatu ne wa budimu utshiena anu utumika natshi bu tshiamu tshia mudimu tshia nshindamenu bua kumanyisha Bukalenge bujadika bua Yehowa ne bua kuabanya biakudia bia mu nyuma ‘mu tshikondo tshiakanyine.’—Mat. 24:14, 45.
2 Katshia ku dipatuka diatshi mu dia 1 Kasuamansense 1919 ne dîna dia Âge d’or, lelu’eu Réveillez-vous !, tshibejibeji etshi tshidi tshishindika dikengedibua dia kutabeja bantu bua bidi bitangila diumvuija dia malu adi enzeka pa buloba. Tshidi tshiakula pa biena-bualu kabukabu ne bidi ne dikuatshisha bidi bidisunguluja pa kumona ngikadilu wabi mutshintshika ne muondoke. Biena-bualu ebi bidi bikoka ntema ya mubadi pa mukenji wa mushinga mukole wa mu tshibejibeji etshi, wa se: malu adi enzeka pa buloba adi akumbaja milayi ya mu Bible, amanyisha ne: tudi mu matuku a ku nshikidilu ne mu katupa kîpi emu, Bukalenge bua Nzambi nebumuangalaje mabenesha a tshiendelele pa aba badi benza disua dia Nzambi.
3 Mu matuku aa, Tshibumba tshia Nsentedi ntshipatula mu miakulu 125 ne bungi bututa bua bibejibeji 20 980 000 ku ngondo, eku Réveillez-vous ! mmupatula mu miakulu 82 ne bungi bututa bua ku ngondo bua bibejibeji 18 350 000. Mu teritware wetu, Tshibumba tshia Nsentedi tshidi tshipatuka mu mekala mavule mu Lingala, Swahili ne Tshiluba ne kudi mpatuidi ya mu Kiluba, Kirundi, Monokutuba ne Otetela. Tshidimu tshishale, mumanyishi yonso uvua mufile muayene wa bibejibeji wa 0,3 ku ngondo. Ntshinyi tshitudi mua kuenza bua kuvudija difila dia bibejibeji mu teritware wetu?
4 Tshia kumpala, tudi ne bua kuvuluka se: difila dia bibejibeji ne mikanda didi ne mushinga wa muomumue ne bumanyishi bufila mukana. Pashishe, tudi ne bua kudifundila tshipatshila tshia kufila bungi kampanda bua bibejibeji ngondo yonso. Tshibumba tshia Nsentedi tshia dia 1 Tshiongo 1994 tshivua ne mubelu eu: “Bamanyishi kampanda badi bajinga pamu’apa bua kuabanya bibejibeji 10 ku ngondo, bilondeshile nsombelu yabu; bampanda-njila badi mua kuenza madikolela bua kukumbaja tshipatshila tshia bibejibeji 90 ku ngondo.”
5 Bua kukumbaja bipatshila ebi, tshisumbu tshionso tshidi ne bua kulongolola matuku a bibejibeji, nangananga mu Disambombo dia kumpala ne disatu ngondo yonso. Bikala bisangilu bia mudimu bilongolola mu dinda, mu mapingaja ne ku dilolo, nekuikale kampanye kanemesha bimpe. Nkuepi kutudi mua kufidila bibejibeji?
6 Miaba itu bantu bapitshila bikole mmiakanyine. Muntu udi mua kuimana pa masangu a njila mivule ne kufila bibejibeji kudi bapitshi ba njila. Magazen, butike ne bisalu bidi kabidi miaba miakanyine bua kufila bibejibeji. Bamue bampanda-njila batu bafila bibejibeji nansha mu binuinu bia maluvu ne batu bapatula bipeta bimpe.
7 Tudi kabidi mua kufila bibejibeji kudi balela betu bakena bena kuitabuja, balunda betu, bena mutumba netu peshi kudi bena mudimu netu. Tuenze kabidi bua mulongi wa Bible yonso ikale ne tshibejibeji tshiende tshia Tshibumba tshia Nsentedi ne tshia Réveillez-vous ! Balongi ba Bible badi mua kuikala pabu mu njila wetu wa difila bibejibeji kusakidila ne bantu bakuabu.
8 Bu mutudi bapete bukenji bua kuyisha patoke, tutumikayi ne mishindu yonso mitupetesha. Mikanda ne bibejibeji bidi biakula bimpe kupita bitudi mua kuamba mu minute mikese. Bua kupatula bipeta bimpe, tudi ne bua kudianjila kubala bibejibeji, kukeba tshiena-bualu tshidi mua kukoka ntema ya bantu bashilashilangane, kuakula mu tshikoso ne mu mushindu musunguluke, bitulubitulu, kufukisha mimuemue ya bulunda, kuikala ne luya ne musangelu, kuenza dileja pa tshibejibeji tshimuepele nansha paudi ufila bivule. Padi difila kadiyi dianyisha, bidi bikengela kukoma dileja ne mêyi a bulunda ne adi aleja mmuenenu muimpe.
9 Mbulelela se: tudi ne ntatu ya malu a lupetu. Kadi, bituadienzeja bua kuikala ne bibejibeji bikese muaba wonso utudi tuya ne bituabileja mu mushindu wa kupatula bipeta bimpe, kakuyi mpata madikolela etu neabeneshibue ne neatupeteshe disanka divule. Nenku, tudiakajayi bua kufila bibejibeji mu Disambombo dia kumpala ne disatu dia mu ngondo. Bikala dilomba dia tshisumbu tshietu dikale dishadile, tudiakaje bilondeshile tshipatshila etshi tshipiatshipia pa kulonda dilomba dia mumanyishi yonso.
10 Bakulu mbalombibue bua kulama ndongoluelu eu ku mutshima. Mu dikumbula diabu mu bisumbu, batangidi bena ngendu nebatabalele bua kulongolola difila dia bibejibeji mu Disambombo dia lumingu lua pa bualu. Biangata mumanyishi yonso dipangadika dishindame dia kufila bibejibeji ngondo yonso, netulenge bantu bavule mu teritware wetu, ne bibejibeji ebi nebienze mudimu pa muaba wetu.
11 Katuikadi ne bundu bua kuleja bibejibeji miaba yonso ne mu tshikondo tshionso. Ba-misionere ne bana betu ba balume bakulakaje ba mu Kasumbu Kaludiki batu benza mudimu eu ne disanka kukadi bidimu bivule. Tshilejilu tshiabu tshidi tshitukankamija bonso. Bu muakamba mupostolo Paulo, tudi tujinga kuamba ne: ‘Tshiena mfua bundu bua lumu luimpe; bualu bua ludi bukole bua Nzambi bua lupandu kudi muntu yonso udi witabuja.’—Lomo 1:16.