“Ditabuja Mu Dîyi Dia Nzambi”—Mpuilu Wa Distrike 1997

¹ Mupostolo Paulo wakavuluija Timote ne: “Mufundu wonso mmufunda ku spiritu wa Nzambi.” (2 Tim. 3:​16, NW) Bu mudi Dîyi dia Nzambi difunda ku spiritu, tudi ne tubingila tuimpe tua kuditabuja. Tshidimu etshi, mpuilu wa distrike neikale ne tshiena-bualu “Ditabuja mu Dîyi dia Nzambi.” Nansha bituikala bamanye bulelela kukadi bidimu bivule peshi balue mu bulongolodi bua Yehowa anu matuku makese aa, programe eu neakoleshe ditabuja dietu mu Bible. Yonso wa kutudi neikale ne bua kudiakaja bua kubuela mu mpuilu mujima. Ndikankamija kayipu dikalabi pa kumona munkatshi muetu bantu badi baleja disankidila kutshidi matuku makese, nangananga aba batutu tulonga nabu Bible!

² Mpuilu wa matuku asatu: Tshidimu etshi, mpuilu wa distrike wa matuku asatu mmutulongoluela bua disanka dietu. Mudimu wetu wa Bukalenge wa Luishi 1997 udi uleja mulongolongo wa mpuilu 53 yenzeka mu Burundi, mu Congo ne mu Zaïre. Mpindieu, nudi bamanye mpuilu udi tshisumbu tshienu tshibikila ne nudi ne bua kuikala bamane kuenza madilongolola masunguluke bua kuikalaku mu matuku asatu aa. Ukadiku mulombe mfumuebe wa mudimu matuku a dikisha makengedibue anyi? Biwikala ne bana balongi ba kalasa, ukadiku mumanyishe balongeshi babu ne kanemu bua se: kabakuikalaku mu Ditanu ne Disambombo bualu kudi muanda wa mushinga mukole wa dishidimunyibua diabu mu malu a Nzambi anyi?​—⁠Dut. 31:12.

³ Dituku dionso, mpuilu neatuadije pa dîba 9:30. Nebunzulule biibi mu 8:00. Anu aba badi ne mudimu wa kuenza ke bikale ne bukenji bua kubuela kumpala kua dîba edi, kadi ki mbua kulaminangana miaba kumpala kua diunzuluila bantu bonso biibi.​—⁠Filip. 2:4.

⁴ Tudi tuenza bimpe pa kuteya ntema: Mu siekele wa kumpala, mupostolo Petelo wakavuluija bena nkristo ne: bivua bimpe kuteya ntema ku dîyi dia mulayi bu ku muinda udi ukenka mu mîdima. (2 Pet. 1:19) Bidi bilelela buetu kabidi. Bikale mu bulongolodi bukokesha kudi Satana, tudi bu badi mu mîdima. Tudi ne dianyisha dia kuikala babikidibue bua kumbushibua mu mîdima ya mu nyuma. (Kolos. 1:13; 1 Pet. 2:9; 1 Yone 5:19) Bua kushala mu bukenke, bidi bitukengela kulama ditabuja dishindame pa kuteya ntema ku Dîyi difunda ku spiritu dia Yehowa. Ke tshiatusaka bua kuenza menemene mpuilu wetu wa distrike utshilualua.

⁵ Bituajinga kutuishila ntema pa mpuilu, nebitukengele pamu’apa bua kuenza madikolela, kadi kakuyi mpata netubeneshibue bituenza nunku. Tutabalele bua kuikisha bimpe, ebi nebituambuluishe bua kuteleja ne ntema bitupa bishilangane bia programe. Dituku dionso, tulongolole dîba dikumbane bua kuya mu mpuilu ne kusomba bangabanga ne programe kutuadijaye. Pashishe tuimbe musambu wa ntuadijilu ne tulonde disambila. Bantu bakulumpe nebikale ne bua kufila tshilejilu, ne baledi nebadianjile kudimuija bana babu bua kuenza nunku.​—⁠Ef. 6:4.

⁶ Bituadianjila kutangila programe wa miyuki ya dituku, tudi mua kuteta kuela meji pa ngenyi ikalabu pamu’apa mua kuzangika. Ebi nebivudije disankidila dietu dîba diayilejabu mu muyuki. Tudi mua kuikala mu dikeba dia ngenyi yatuambuluisha bua kumvuija bakuabu tubingila tutudi tuitabila Nzambi ne dilaya diende dilelela dia kufuta aba badi bamukeba bushuwa. (Eb. 11:1, 6) Tudi balombibue bua kuangata note mikese ya malu manene a mu mpuilu. Bituangata note mipite bungi, tudi bafuana kulekela malu manene, bualu netuikale bafuile mu difunda.

⁷ Tshidimu tshishale, tuakamona kabidi munkatshi mua programe bantu bakulumpe ba bungi ne bansonga bendakana ne kalèngù mu biendedi, banyungulukangana pambelu ne bayukila ne bantu bakuabu, pamutu pa kuteleja bidi “mupika wa lulamatu ne wa budimu” mulongolole bua bimpe bietu. Yezu mmulaye bua kutupesha biakudia bia mu nyuma mu tshikondo tshiakanyine. (Mat. 24:45-47, NW) Nenku, tudi ne bua kuikalaku bua kupeta biakudia ebi, ne katupangi dianyisha nansha. (2 Kol. 6:1) Mbimueneke kabidi ne: bana batu ne muoyo kulukulu ne balomba bua kuya misangu mivule ku nkumba, bapeta nenku mushindu wa kujuka ne kuendakana. Mibelu miakanyine mifila kumbelu neyibambuluishe bua kuepuka diya njila ne njila ku nkumba ne dibungila munkatshi mua programe. Imue misangu, bansonga batu basomba badiunguije pa bule, bayukila, banungana. Mu matuku etu aa, bansonga mbafimpakaja ne bidi bibakengela kutuishila ntema pa malu adibu babambila, kabayi benza bualu bukuabu dîba dia mpuilu. Bidi bibakengela kulekela nkuka ya bunsonga ikena mu diumvuangana ne mêyi-maludiki a mu Bible. (Tangila 2 Timote 2:22.) Ntema ya bonso, bakulumpe ne bansonga, neyitumbishe Yehowa ne neyimusankishe.

⁸ Biamueneka dikengedibua dia se: muena mudimu wa diakidilangana kampanda udi ne bua kupesha muntu kansanga mubelu pa bualu ebu, nebikengele kuumona bu tshimanyinu tshia dinanga dia kudi Yehowa. (Gal. 6:1) Muntu yonso udi ne bua kuvuluka ne: bikalaye wenza madikolela bua kubuela mu mpuilu, mbua ‘kumvua ne kuyila lungenyi.’ (Dut. 31:12) Kabidi, ‘muena meji neumvue, neadiunde mu malu adibu bamuyisha.’ (Nsu. 1:5) Biangatshile ku mpindieu ne too ne ku mpuilu, tuyukidilangane mu dîku bua dikengedibua dia kusomba pamue, dia kushala pa muaba wetu munkatshi mua programe ne dia kuikala ne ntema mu tshipatshila tshia kubabidilaku bivule.

⁹ Mvuadilu udi usankisha Yehowa: Aba badi mu tshisamba tshia Yehowa badi bamueneka ku mêsu kua ba pa buloba. (1 Kol. 4:9) Pa tshibidilu tudi bamanyike bua mvuadilu wetu mulenga ne nkoseshilu wa nsuki. Bavule ba ku badi batumikila mêyi-maludiki a mu Mifundu mafila mu 1 Timote 2:9, 10 ne mu 1 Petelo 3:3, 4 mbamone mmuenekelu wabu yonso mushintuluke bikole pa kufuanyikija ne dîba diakatuadijabu kutantshila tshisumbu tshia bena nkristo. Ebi bidi bileja dishilangana didi dimueneka patoke ne dinyanguka dia munanunanu ditudi tumona mu mvuadilu ne nkoseshilu wa nsuki bia mu bulongolodi ebu. Tudi tujinga kuikala badimuke bua katulu kufuanangana ne bena bulongolodi ebu pa kuluata bivualu bidi bikemesha, kukankamija ngenzelu wa tshikondo etshi ku nkoseshilu wetu wa nsuki peshi ku dikala ne mvuadilu ukena wa budipope. Mvuadilu wetu ne nkoseshilu wetu wa nsuki bia tshitembu bidi ne bua kuambuluisha bapiabapia badi babuela mu mpuilu bua kumanyabu tshidi ne bua kuikala mvuadilu wa bena nkristo.

¹⁰ Tshidimu tshishale etshi bantu bavua bashale ne mmuenenu mulenga mutambe wa mpuilu; pabi, bamue bana betu batshidi ne mvuadilu ne nkoseshilu wa nsuki bia bena mu bulongolodi ebu, nangananga mu bikondo biabu bia dijikija lutetuku. Patudi tudilongolola bua kuya mu mpuilu, tudi ne bua kukonkonona mvuadilu wetu ne nkoseshilu wetu wa nsuki. Baledi, sungulayi ne meji biavuala bana benu batekete ne mipiankunde. Tuikale bajadike ne: katuena tulekela ngenzelu ya mu bulongolodi ebu peshi majinga abu bua bikale ne buenzeji bubi pa mmuenekelu wetu wa bena nkristo.

¹¹ Tuikalayi ne bikadilu bilenga: Bikadilu bilenga ntshimanyinu tshia bena nkristo balelela. (1 Pet. 2:12) Muaba kayi wonso utudi, mu mpuilu, mu nzubu wa tshidiilu, mu nzubu wa tshilala benyi ne mu ditambakana dietu, ngikadilu wetu udi mua kufila bumanyishi buimpe ne kuambuluisha bantu bua kumona tshidi ditabuja kudi Nzambi ne mu Dîyi diende mua kuenza. Ebi bidi mua kufikisha bamue ku dijinga kumanya Yehowa. (Tangila 1 Petelo 3:1, 2.) Tudi ne muabi wa kutumbisha Yehowa ku bikadilu bietu.

¹² Badi batuvuluija misangu ne misangu bua kutabalela bikadilu bia bana betu, bua katulekedi kubatangila peshi kubalekela banyemakana miaba yonso mu nzubu ya tshilala benyi (peshi ku nzubu kudibu batuteke), ebi bidi bisuya benyi bakuabu. Tshidimu tshionso, Société utu upeta luapolo ne: tutu tulekela bamue bana betu balela katuyi tubatangila. Nansha bikala mpuilu utupetesha mushindu wa kumonangana ne bana betu ne wa kudisangisha pamue nabu, baledi kabena ne bua kupua muoyo bujitu buabu bua kutabalela bana babu dîba dionso. Mbujitu budi Yehowa muambike tatu yonso ne mamu. (Nsu. 1:8; Ef. 6:4) Bana badi balekela kabayi babatangila batu benza malu adi mua kunyanga lumu ludi Bantemu ba Yehowa bakuabu biibake ku madikolela abu a disuminyina.​—⁠Nsu. 29:15.

¹³ Tuangatayi bujitu bua mfranga mitula bua mpuilu: Bonso tutu tutula mfranga bua kubuela mu mpuilu. Kudi dikuabu ditula dia mfranga ditudi ne bua kuelela meji. Miaba mienzela mpuilu mmifutshila mfranga ya bungi. Kudi kabidi malu makuabu adi akengela mfranga. Mapa enu a budisuile menza ne kalolo mu mpuilu mmanyisha bikole.​—⁠Bien. 20:35; 2 Kol. 9:7, 11, 13.

¹⁴ Miaba ya disomba: Mêyi-mashidimunyi mafila bidimu bishale adi amu ne mushinga: UDI NE BUA KULAMINYINA MIABA ANU BUA BENA MU DÎKU DIEBE NE BUA ABA BAWENZA NABU LUENDU PAMUE MU MASHINYI. Bidi bisankisha pa kumona se: bidimu bishale ebi, bateleji bavule badi banemeka mukenji eu, ebi bidi binemesha nsombelu wa dinanga udi mu mpuilu yetu. Mu miaba mivule mutu muenzekela mpuilu, bitu bipepele bua kufika ku imue miaba ya kusomba kupita mikuabu. Anyishayi nuikale ne kanemu pa kushiya miaba milenga bua aba badi bayikengela.

¹⁵ Biamu bia foto, kamera ne radio-kasete: Kudi mushindu wa kutumika ne biamu bia foto ne biamu bikuabu bia dikuata mêyi ne bindidimbi. Kadi, katuena ne bua kukuatshisha bateleji bakuabu ditanaji mu ditumika nabi. Katuena ne bua kutambakana munkatshi mua programe bua kukuata foto, bualu tudi mua kupumbisha bakuabu badi badikolesha bua kuteleja. Tshiamu kayi tshionso tshia dikuata natshi mêyi katshiena ne bua kuashibua ku nzembu peshi ku biamu bia dibandisha nabi mêyi ku mpuilu, kabiena ne bua kujika miaba ya kupitshila anyi kujika bateleji bakuabu bua kumonabu.

¹⁶ Diondapa dia diambuluisha: Tshibambalu tshia diondapa dia diambuluisha tshidiku anu bua badi bakengela luondapu lua lukasa. Katshiena ne bukokeshi bua kuondapa bena masama a munanunanu. Ke bua tshinyi nudi ne bua kudianjila kuela meji pa luondapu ludi makanda enu a mubidi ne a bena mu dîku dienu akengela. Anyishayi nuikale ne manga enu a aspirine, manga a diondapa dikuatakana dia tshifu, bia diondapa ne disuika ku mputa, mpengele yenu ya bana ba pambidi ne bikuabu bintu bia buena ebi bidi kabiyi mua kupeteka mu mpuilu. Bonso badi ne masama a muoyo, bena diabete, ne bakuabu, nebikale ne bua kudilongolola bimpe. Badi ne bua kuikala ne manga makengedibue, ne muena mu dîku diabu peshi muena mu tshisumbu tshiabu udi mumanye nsombelu wabu udi ne bua kuikala nabu pamue dîba dionso bua kubambuluisha padiku dijinga. Bikadi bienzeke se: bena masama a munanunanu ne balekela nkayabu disama dibajuke dikole, ebi bitu bikeba ntatu. Bena bulombodi bakenzejibua bua kubikila bena mudimu wa diondapa dia lukasalukasa bua kubafila ku lupitadi. Bikala muntu ne dikengela dia luondapu lua pa bualu ne kakuyi muena mu dîku diende nansha umue wa kumuambuluisha, nebikale ne bua kumanyisha bakulu ba mu tshisumbu tshiende bua bualu ebu ne buobu nebangate mapangadika adi akengedibua bua kumuambuluisha. Kakuakuikala miaba milongoluela badi mibidi yabu ibenga imue ngondapilu.

¹⁷ Biakudia: Dishipa mudimu wa biakudia ndiambuluishe bua kutamba kutuishila ntema pa biakudia bia mu nyuma munkatshi mua mpuilu. Katshia apu, tudi bapete mêyi a dianyisha mavule bua dikepesha mudimu edi. Muntu yonso udi ne bua kulongolola biakudia biakanyine bua kudia mu dikisha dia midi. Kanubuedi muaba wenzekela mpuilu ne milangi peshi ne maluvu makole. Tushete tua dilama mashika tudi ne bua kuikala tukese ne tukumbane bua kututeka muinshi mua bibasa bienu. Bakamona bamue bateleji badia munkatshi mua programe. Ndipanga kanemu. Ku imue miaba ya mpuilu, munda peshi pambelu payi, bavua basumbisha biakudia, ne bakamona bana betu bakuabu baya kusumba biakudia munkatshi mua programe. Ebi kabiena biakanyine nansha.

¹⁸ Tudi tuanyisha bikole difesto dietu dia mu nyuma ne nsombelu mudilekelele, wa ditalala ne buwetu udi mu dikisha dia midi. Mu diumvuangana ne tshipatshila tshia ndongoluelu eu, anyishayi nulue ne biakudia bienu, pamutu pa kumbuka muaba wa mpuilu bua kuya kusumba biakudia. Nenupete nenku dîba dia bungi bua kubabidila bunyana bua bana benu balume ne bakaji.

¹⁹ Mmunyipu mutudi tusangala pa kuela meji ku Mpuilu wa Distrike wa “Ditabuja mu Dîyi dia Nzambi” ukadi mpindieu pabuipi! Tudi tujinga bonso kushindika ne: tudi bangate mapangadika bua kubuela mu programe yonso, bua kubabidila biakudia bishême bia mu nyuma bidi Yehowa mutulongoluele ku butuangaji bua bulongolodi buende. Ebi nebituambuluishe bua kulua ‘balongolola tshishiki bua mudimu wonso muimpe’ mu matuku atshilualua.​—⁠2 Tim. 3:17.

[Memory Aid on page 6]

Mpuilu wa distrike​—⁠Tshivuluiji

Batismo: Balumbidi ba batismo nebasombe pa muaba mubalongoluela kumpala kua programe wa mu Disambombo mu dinda kutuadijaye. Mulumbidi yonso nealue ne tshilamba tshia diowa natshi mâyi tshia kanemu ne tshia kudikupula natshi mâyi. Matuku mashale, bamue bavua ne mvuadilu ukena wa bunême ne uvua unyanga mushinga wa batismo. Bakulu badi bakonkonona malu a mu mukanda wa Mudimu wetu ne balumbidi ba batismo nebajadike bikala yonso wa kudibu mmumvue bimpe malu aa. Pajikija ngamba-malu muyuki wa batismo ne disambila, muludiki wa programe neimbishe musambu. Panyima pa kakoso ka ndekelu ka musambu, bena tshibambalu tshia diakidilangana nebalombole balumbidi ba batismo muaba wa dinyibua mu mâyi. Batismo udi tshimanyinu tshia didilambula dia muntu, mbualu bua muntu nkayende ne Yehowa. Nenku kabiena bilongolola bua kutambuisha “batismo wa bantu-tshisumbu” bua balumbidi babidi peshi bavule badi belangane mu maboko anyi bakuatangane ku bianza umue ne mukuabu dîba dia dinyibua nansha.

Tukanda tua tshimanyishilu: Suayi nuvuale tukanda tua tshimanyishilu tua 1997 mu mpuilu ne mu ditambakana dienu dia kulua mu mpuilu ne kualukila. Ebi nebiambuluishe bua kufila bumanyishi bulenga. Nenusumbe tukanda tua tshimanyishilu ne tuzubu tuatu mu tshisumbu tshienu, bualu katuakuikalaku mu mpuilu nansha. Kanuindidi anu matuku a ndekelu kumpala kua mpuilu bua kukeba tumanyishilu buenu ne bua mêku enu nansha. Kanupu muoyo bua kuikala ne tuarte tuenu tua “Instructions médicales — Pas de sang.”

Miaba ya kulala: Tudi tunulomba bonso bua kueleshangana maboko mu ditumika ANU ne dibeji dia mêna a miaba ya kulala milongolola kudi Biro bia mpuilu. Biatupeshabu muaba wa kulala kudi bana betu ba muaba eu, katuena ne bua kunyanga muoyo wabu wa diakidilangana pa kushala ku nzubu yabu matuku mavule panyima pa mpuilu. Nansha mu tshikondo tshia mpuilu muntu kedi meji ne: bamuakididi nebamudishe. Bamue kabena ne mushindu wa kuenza nanku. Nunku tuanyishe bua kudilongolola anu ku mpindieu bua kutuala bituikala ne bua kudia mu tshikondo tshia mpuilu. Sekretere wa tshisumbu neatabalele bua Malomba a nzubu ya diladila a pa buawu atumibue pa lukasa mu adrese wa mpuilu watangila bualu ebu. Binuakengela kukupuisha dilaminyina dia nzubu wa diladila dia pa buadi, numanyishe pa lukasa muabanyi wa miaba ya kulala peshi ku nzubu wa tshilala benyi ne ku tshibambalu tshia difila miaba ya kulala tshia ku mpuilu, bua nzubu eu apeshibue mukuabu muntu.

Tulalu tua bana tua dipusa ne nkuasa ya dibunya: Mu miaba mivule mbikandikibue bua kulua ne tulalu tua bana tua dipusa mu masangisha a patoke. Mikenji ya bukubi kayena ifila bukenji bua kutushiya mu miaba ya dipitshila, mu biendedi peshi munkatshi mua milongo ya bibasa. Bu mudi bisumbu bia bantu mua kukebesha dibambakana, tulalu etu tudi mua kuikala ne njiwu bua bana batekete ne bua aba badi mua kuditutaku. Anyishayi nulekele kututuala mu mpuilu. Kadi, tunkuasa tua bana peshi tunkuasa tua mu mashinyi ntuanyishibue, bualu baledi badi mua kutulamakaja ku nkuasa ku luseke luabu. Anyishayi kabidi bua kubenga kulua ne nkuasa ya dibunya. Idi mua kuikala ne njiwu ne kabiena bianyishibue bua kutumika nayi mu masangisha manene a patoke. Dieleshangana maboko dienu pa malu abidi aa didi ne mushinga ne ndianyisha.

Tshibambalu tshia bena budisuile: Udiku mua kudisumbila tshikondo tshikese mu mpuilu bua kufila diambuluisha diebe mu bimue bia ku bibambalu anyi? Tudi mua kudiakaja bua kutumika ne kupeta disanka dinene bituasadila bana betu nansha bua mêba makese patupu. Biwajinga kufila diambuluisha diebe, suaku umueneke ku tshibambalu tshia bena budisuile mu mpuilu. Bana ba bidimu bishadile ku 16 badi kabidi mua kuenza tshiabu tshitupa mushindu mulenga pa kutumika ku bulombodi bua tatuabu, mamuabu peshi bua mukulumpe kampanda mukumbane kuambula majitu.

Didimuija: Tuikale badimuke bua kujingulula malu adi mua kutufikila bua kumona mua kuepuka ntatu ya patupu. Misangu mivule, aba bakena muaba wabu wa pa tshibidilu bidi bipepele bua kubibabu kudi bivi ne bantu babi bakuabu. Ushindike misangu yonso ne: biibi bia mashinyi ebe mbikanga ne nsapi ne kulekedi patoke tshintu kayi tshionso tshidi muntu mua kukumina mutshima. Bivi ne basomonyi ba bintu mu mpaya batu balonda bisangilu binene bia bantu. Kabiena kabidi bia meji bua kushiya tshintu tshia mushinga pa muaba webe. Kuena mua kujadika ne: bonso badi bakunyunguluke mbena nkristo nansha. Bua tshinyi kuteka muntu mu ditetshibua? Tuakapeta luapolo luleje muvua bantu bakena bamanya batete mua kukoka bana bakese pambelu. BANA KABANUJIMINYI KU MÊSU NANSHA.

Bidi bikengela kabidi kutabalela bua njiwu kayenzeki. Matuku mashale, bana betu bakangata mashinyi mûle tente peshi mâtu kabayi batabalele bujitu budiwu mua kuambula. Njiwu mikole yakenzeka. Bu mudi muoyo muikale wa tshijila, tudi basue kuikala badimuke pa kuepuka didiambika tshibawu tshia mashi. Mu disambuka njila, bidi bikengela kujadika ne: kakuena mashinyi adi mua kutututa tuetu bine peshi bana betu balela.

Mu dia 11 Kashipu 1997 ke muatuadija Mpuilu wa kumpala wa Distrike wa “Ditabuja mu Dîyi dia Nzambi.” Tudi tulomba Yehowa ne muoyo umue bua abeneshe madikolela etu bua kubuela mu mulongolongo wa mpuilu ya distrike eyi ne bua kudishibua ne bintu bimpe ku mesa Ende.