Baledi​—⁠Longeshayi Bana Benu Bua Mudimu Wa Buambi

¹ Bisumbu bietu bidi ne disanka dia kubala munkatshi mua benamu bana ba bungi badi ne dijinga dia kusadila Nzambi ne muoyo umue. (Muam. 12:⁠1) Badi ku aba badi bapeta dibikila dia kusamuna Yehowa. (Mus. 148:​12-14) Kabidi dilongesha didi baledi bapesha bana babu dituku dionso didi ne bua kubakaja bua kumanyisha ditabuja diabu kudi bakuabu mu buambi.​—⁠Dut. 6:​6, 7.

² Tulongeshe bana betu mu mushindu udi ulubuluka: Bana mbakanyine kubalongesha bituadijile anu ku buana buabu bua kufilabu baledi babu mu mudimu wa buambi. Bangabanga ne kutuadija mudimu, tulongolole bana betu bua kudifilamu ne disuminyina. Tudianjile kubambila patoke tshitudi tujinga bua kuenzabu ku tshiibi ne ku tshiibi. Bana batshidi bapuekele badi mua kufila trakte peshi mabeji a dibikila ne kulomba bantu bua balue ku Nzubu wa Bukalenge. Kudi mushindu wa kulomba bana batekete batu babala bimpe bua kubala mvese ya mu Mifundu. Badi mua kufila bibejibeji mu dibileja patupu. Padibu benda balubuluka, tubalongeshe mua kutumika ne Bible mu maleja abu. Bamanyishi bavule bansonga batu bashiya pa tshibidilu bibejibeji kudi bantu ne benza makumbulula. Mbianyishibue bua muana kupatukaye pamue ne muntu mukulumpe pamutu pa kumutuma ne nsonga mukuabu muena nkristo. Muntu mukulumpe udi mua kumvuija mubayukidishi ne: muana udi mu dilonga bua mudimu wa buambi.

³ Muana wa bakaji kampanda mutekete wakalomba bakulu bua bamuambuluishe bua kukumbaja malu-malomba a mumanyishi wa Bukalenge. Utshivua anu ne bidimu bitanu tshikondo atshi ne kavua mumanye kubala, kadi uvua mukumbane bua kumanyisha mukenji wa Bukalenge ku biibi mu mushindu muimpe. Uvua mukuate mvese ya mu Mifundu mu mutu, uvua ubulula Bible pa miaba ayi, ulomba mumuteleji bua kubala ne ufila diumvuija.

⁴ Ku tshilejilu tshiabu, baledi badi ne bua kulongesha bana babu mushinga wa kuikala badiakaje bimpe bua kuenza pa tshibidilu mudimu wa buambi. Mbia mushinga bua kuenzabu programe muimpe wa mudimu wa dituku dionso ne bamunemeka, bua bana bamanye matuku a mu lumingu a kuenza buambi.

⁵ Bialonga bana bua kunanga mudimu wa buambi ne kuwenza bituadijile ku buana buabu, nebibasake bua kulubuluka bua kupeta, mu matuku atshilualua, masanka a mudimu matambe bunene ne, pamu’apa, kutuadija mudimu wa bumpanda-njila. (1 Kol. 15:58) Bonso tudi ne bua kukankamija bana batudi tuyukila nabu bua kuenza malubuluka mimpe bua butumbi bua Yehowa.